ເຈົ້າໜ້າທີ່ ປກສ ກຸ່ມບ້ານທົ່ງແສງຈັນ ມອບງົວ ທີ່ຖືກລັກຄືນເຈົ້າຂອງ

ຕາມການງາຍຂອງເຈົ້າໜ້າທີ່ ປກສ ກຸ່ມບ້ານທົ່ງແສງຈັນ ເມືອງຫ້ວຍຊາຍ ໃຫ້ຮູ້ວ່າ: ໄດ້ມີເຫດການຄົນບໍ່ດີເຄື່ອນໄຫວຊອກລັກງົວ ຢູ່ຕາມຄອກງົວ, ທົ່ງນາ, ຮົ້ວສວນຂອງປະຊາຊົນ ຢ່າງເປັນຂະບວນຕໍ່ເນື່ອງ ເຫດການດັ່ງກ່າວແມ່ນເກີດຂື້ນເລີ້ມແຕ່ເດືອນ 9 ປີ 2021 ຈົນມາຮອດຕົ້ນປີ 2022 ມີປະຊາຊົນຫຼາຍຄອບຄົວ ຢູ່ບ້ານທົ່ງແສງຈັນ ເມືອງຫ້ວຍຊາຍ ໄດ້ເຂົ້າມາແຈ້ງຄວາມງົວເສຍຢູ່ຫ້ອງການ ປກສ ກຸ່ມບ້ານ ຈຳນວນ 11 ໂຕ ລວມມູນຄ່າເສຍຫາຍທັງໝົດ 52,800,000 ກວ່າກີບ ຕໍ່ສະພາບການດັ່ງກ່າວ ທາງເຈົ້າໜ້າ ປກສ ກຸ່ມບ້ານທົ່ງແສງຈັນ ໄດ້ເອົາໃຈໃສ່ສົມທົບກັບຫຼາຍພາກສ່ວນ ເຄື່ອນໄຫວຕິດຕາມ, ເກັບກຳຂໍ້ມູນເປົ້າໝາຍລັກງົວ ຢ່າງຕໍ່ເນື່ອງ ຈົນສາມາດກັກຜູ້ຕ້ອງສົງໃສລັກງົວໃນວັນທີ 8 ກຸມພາ 2022 ໄດ້ຈຳນວນ 2 ຄົນຄື: ທ້າວ ສົມລົດ ເອລາວົງ ອາຍຸ 18 ປີ, ອາຊີບ ຫວ່າງງານ ເປັນປະຊາຊົນ ຢູ່ບ້ານ ທົ່ງແສງຈັນ ແລະ ທ້າວ ຈ໋ອງ ເຊັ່ງລີ ອາຍຸ 40 ປີ, ອາຊີບ ປະຊາຊົນ ຢູ່ບ້ານ ນ້ຳຈ້າງ ເມືອງຫ້ວຍຊາຍ ແຂວງບໍ່ແກ້ວ

ຈຶ່ງໄດ້ປະສານຫາເຈົ້າໜ້າທີ່ວິຊາສະເພາະ, ໜ່ວຍງານສືບສວນ-ສອບສວນ ກອງບັຊາການ ປກສ ເມືອງຫ້ວຍຊາຍ ເຮັດການສອບສວນເກັບກຳຂໍ້ມູນຈາກຫຼັກຖານ ແລະ ຄຳໃຫ້ການຈາກຜູ້ຕ້ອງສົງໃສທັງ 2 ຄົນ ເຫັນວ່າ ມີມູນຄວາມຈິ່ງແທ້ ໂດຍທັງ 2 ຄົນໄດ້ພົວພັນປະສານຫາກັນທາງໂທລະສັບແຕ່ລະຄັ້ງ ກ່ອນການຊື້-ຂາຍງົວ. ທ້າວ ຈ໋ອງ ຜູ້ຊື໊ຈະໂທຖາມ ທ້າວ ສົມລົດ ແລ້ວຖາມວ່າມີງົວບໍ່ ທ້າວ ສົມລົດ ຕອບວ່າມີ ຈາກນັ້ນ ທ້າວ ສົມລົດ ກໍ່ຢ່າງອອກຈາກເຮືອນຕົນເອງ ໄປຊອກລັກງົວເອົາ ຢູ່ຕາມຄອກງົວ, ທົ່ງນາ, ຮົ້ວສ່ວນຂອງປະຊາຊົນ ໃນເວລາປະມານ 19 ຫາ 20 ໂມງທຸກຄັ້ງ ແລ້ວນຳໄປສ່ົງຂາຍໃຫ້ ທ້າວ ຈ໋ອງ ຢູ່ເຂດທາງ 3 ແຍກບ້ານທົ່ງແສງຈັນ ກັບ ບ້ານຫ້ວຍສາລາໃນລາຄາທີ່ທັງ 2 ຄົນພໍໃຈ ພາຍຫຼັງສຳເລັດ ກໍ່ສືບຕໍ່ພົວພັນ ຊື້-ຂາຍງົວ ຈາກການລັກງົວຂອງປະຊາຊົນຢ່າງຕໍ່ເນື່ອງ ລວມ 10 ຄັ້ງ ມີງົວຖຶກລັກທັງໝົດ 11 ໂຕ.

ພາຍຫຼັງເຈົ້າໜ້າທີ່ສາມາດກັກຕົວ ທ້າວ ສົມລົດ ເອລາວົງ ແລະ ທ້າວ ທ້າວ ຈ໋ອງ ເຊັ່ງລີ ໃນຂໍ້ຫາ ລັກຊື້-ຂາຍງົວແລ້ວ ທາງເຈົ້າໜ້າທີ່ໄດ້ເລັ່ງຄົ້ນຫາງົວທີ່ຖຶກລັກໄປ ຈົນສາມາດເກັບກູ້ຄືນມາໄດ້ ຈຳນວນ 5 ໂຕ ແລະ ຈັດພິທີມອບສົ່ງຄືນເຈົ້າຂອງຢູ່ທີ່ ຫ້ອງການ ປກສ ກຸ່ມບ້ານທົ່ງແສງຈັນ ໃນວັນທີ 27 ພຶດສະພາ 2022ນີ້. ຕາງໜ້າເຈົ້າໜ້າທີ່ມອບໂດຍ ທ່ານ ຮອ ສຸວິດ ໄຊຍະລິນຄຳ ຮອງພະແນກຕຳຫຼວດ ກອງບັນຊາການ ປກສ ເມືອງຫ້ວຍຊາຍ ຮັບໂດຍແມ່ນປະຊາຊົນທີ່ເປັນເຈົ້າຂອງງົວທັງ 5 ໂຕ ໂດຍມີບັນດາອົງການປົກຄອງບ້ານ, ຫົວໜ້າ-ຮອງຫົວໜ້າ ປກສ ກຸ່ມບ້ານ, ການຈັດຕັ້ງບ້ານ, ພະນັກງານກໍ່ສ້າງຮາກຖານການເມືອງ, ພະນັກງານອ້າຍນ້ອງ ປກສ ກຸ່ມບ້ານເຂົ້າຮ່ວມເປັນສັກຂີພິຍານ.

ສ່ວນຜູ້ຖຶກຫາທັງ 2 ຄົນ ແມ່ນຈະຖຶກນຳໄປ ກັກຂັງ ຢູ່ຄ້າຍຄຸມຂັງ-ດັດສ້າງ ກອງບັນຊາການ ປກສ ເມືອງຫ້ວຍຊາຍ ເພື່ອລໍຖ້າການດຳເນີນຄະດີຕາມລະບຽບກົດໝາຍຕໍ່ໄປ.

ຂ່າວ ທອງເພັດ, ພາບ ຮອ ສົມລິດ ມີໄຊຜົນ

Leave a Reply

Your email address will not be published. Required fields are marked *