ສໍ້ໂກງຊັບຄົນອື່ນ 945.000.000 ກີບ

ປກສ ເມືອງສີສັດຕະນາກ ກັກຕົວເປົ້າໝາຍສໍ້ໂກງຊັບ 945.000.000 ກີບ

ທ້າວ ພະຍັກ ຫຼື ກົບ ອາຍຸ 48 ປີ ກໍາມະກອນ ສັນຊາດໄທ ພັກເຊົ່າ ຢູ່ບ້ານໂພນທອງ ເມືອງໄຊເສດຖາ ນະຄອນຫຼວງວຽງຈັນ ໄດ້ສໍ້ໂກງຊັບພົນລະເມືອງ ລວມມູນຄ່າເສຍຫາຍເປັນເງິນ ຈໍານວນ 945.000.000 ກີບ, ຖືກເຈົ້າໜ້າທີ່ ປກສ ເມືອງສີສັດຕະນາກ ກັກຕົວ ໃນວັນທີ 6 ມັງກອນ 2022 ມາດໍາເນີນການສອບສວນ.

ຜ່ານການສືບສວນ-ສອບສວນ ຂອງເຈົ້າໜ້າທີ່ ປກສ ເມືອງສີສັດຕະນາກ ທ້າວພະຍັກ ຮັບສາລະພາບວ່າ: ໄດ້ສໍ້ໂກງຊັບພົນລະເມືອງແທ້ ເບື້ອງຕົ້ນໃນປີ 2019 ມີ ທ້າວຄໍາສອນ (ຜູ້ເສຍຫາຍ) ຕັ້ງອາພາດເມັ້ນ 8 ຊັ້ນ ຢູ່ບ້ານໂພນປາເປົ້າ ເມືອງສີສັດຕະນາກ ນວ

ຈາກນັ້ນ ຜູ່ກ່ຽວໄດ້ຕິດຕໍ່ທາງໂທລະສັບມາຫາຕົນ ໃຫ້ເປັນຄົນຮັບເໝົາວຽກແກ້ວໂຊໜ້າອາພາດເມັ້ນ ຈໍານວນ 8 ຊັ້ນ ເລີ່ມແຕ່ຊັ້ນສອງຂຶ້ນໄປ ເປັນເງິນ 525.000.000 ກີບ ຕົນຈຶ່ງຂໍເອົາກ່ອນ 50% ເປັນເງິນ 245.000.000 ກີບ ຕໍ່ມາຕົນໄດ້ຮັບເໝົາວຽກຕື່ມອີກ ເປັນວຽກຕິດຕັ້ງປະຕູປ່ອງຢ້ຽມແກ້ວ ທີ່ເຮັດດ້ວຍຂອບ ຢູພີວີຊີ ຈໍານວນ 8 ຊັ້ນ ເປັນເງິນຈໍານວນ 1.400.000.000 ກີບ ຂໍເອົາເງິນກ່ອນ 50% ເພື່ອໄປຊື້ວັດສະດຸ;

ໃນວັນທີ 19 ຕຸລາ 2020 ໄດ້ເອົາເງິນສົດໄປ ຈໍານວນ 350.000.000 ກີບ ແລະ ວັນທີ 26 ພະຈິກ 2020, ໄດ້ເອົາເງິນສົດຕື່ມອີກ ຈໍານວນ 350.000.000 ກີບ ລວມມູນຄ່າທັງໝົດເປັນເງິນຈໍານວນ 945.000.000 ກີບ ແລະ ຕົນບໍ່ໄດ້ເຮັດວຽກຕາມສັນຍາ ທີ່ຕົກລົງກັນ ກັບຜູ້ເສຍຫາຍ.

ຕົກມາໃນວັນທີ 6 ມັງກອນ 2022 ຕົນຈຶ່ງຖືກເຈົ້າໜ້າທີ່ ປກສ ເມືອງສີສັດຕະນາກ ກັກຕົວ. ປັດຈຸບັນຄະດີດັ່ງກ່າວ ເຈົ້າໜ້າທີ່ ປກສ ເມືອງສີສັດຕະນາກ ພວມດໍາເນີນຄະດີ ຕາມຂັ້ນຕອນຂອງກົດໝາຍ.
ຂໍ້ມູນ: ປກສ ນວ

ປັດຈຸບັນຄະດີດັ່ງກ່າວ ເຈົ້າໜ້າທີ່ ປກສ ເມືອງສີສັດຕະນາກ ພວມດໍາເນີນຄະດີ ຕາມຂັ້ນຕອນຂອງກົດໝາຍ.

ຂໍ້ມູນ: ປກສ ນວ