ສະຫຼຸບການຈັດຕັ້ງປະຕິບັດວຽກວິຊາສະເພາະ, ກໍານົດທິດທາງ ແລະ ມາດຕະການປີ 2022 ຂອງຂະແໜງພາສີ

ໃນວັນທີ 13 ມັງກອນ 2022 ກົມພາສີ ກະຊວງການເງິນ, ໄດ້ເປີດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານວິຊາສະເພາະໃນການຄຸ້ມຄອງ ແລະ ຕ້ານການຮົ່ວໄຫຼ່ຂອງລາຍຮັບງົບປະມານແຫ່ງລັດ ປະຈໍາປີ 2021; ກໍານົດທິດທາງແຜນການ ແລະ ມາດຕະການ ປະຈໍາປີ 2022 ຂອງຂະແໜງພາສີ, ໂດຍການເປັນປະທານຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ມີທ່ານ ພູເຂົາຄໍາ ວັນນະວົງໄຊ ຫົວໜ້າກົມພາສີ, ຮອງຫົວໜ້າກົມ, ຜູ້ຕາງໜ້າກົມອ້ອມຂ້າງກະຊວງການເງິນ, ຫົວໜ້າພະແນກຂອງກົມພາສີ, ຫົວໜ້າພາສີປະຈຳແຂວງ, ນະຄອນຫຼວງວຽງຈັນ, ຫົວໜ້າດ່ານພາສີສາກົນເຂົ້າຮ່ວມ.

ໃນກອງປະຊຸມໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານວິຊາສະເພາະປະຈໍາປີ 2021, ໃນການຈັດຕັ້ງປະຕິບັດວາລະແຫ່ງຊາດໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ກໍານົດທິດທາງແຜນການ ແລະ ມາດຕະການປະຈໍາປີ 2022 ຂອງຂະແໜງພາສີ, ຊຶ່ງທ່ານ ພູເຂົາຄໍາ ວັນນະວົງໄຊ ຫົວໜ້າກົມພາສີ ກະຊວງການເງິນ ໄດ້ລາຍງານໂດຍສັງເຂບ ຄວາມຄືບໜ້າໃນການຈັດຕັ້ງປະຕິບັດວາລະແຫ່ງຊາດ ໂດຍສະເພາະ ການຈັດຕັ້ງປະຕິບັດຄໍາສັ່ງນາຍົກລັດຖະມົນຕີ ສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼ່ຂອງລາຍຮັບງົບປະມານແຫ່ງລັດ ແລະ ຄໍາສັ່ງນາຍົກ ລັດຖະມົນຕີ ສະບັບເລກທີ 20/ນຍ, ລົງວັນທີ 08 ຕຸລາ 2021 ວ່າດ້ວຍການກວດກາ ແລະ ປະຕິບັດມາດຕະການຕໍ່ຜູ້ທີ່ນໍາເຂົ້າ ແລະ ນໍາໃຊ້ຍານພາຫະນະທຸກປະເພດແບບບໍ່ຖືກຕ້ອງ ແລະ ບັນດານິຕິກໍາຂອງກະຊວງການເງິນທີ່ຕິດພັນກັບວາລະແຫ່ງຊາດ.

ນອກຈາກນັ້ນ, ດ້ານການຈັດເກັບລາຍຮັບປີ 2021 ກົມພາສີໄດ້ຮັບແຜນຈັດເກັບລາຍຮັບ 8.200 ຕື້ກີບ, ປະຕິບັດໄດ້ 6.982 ຕື້ກີບ ເທົ່າກັບ 85,15% ຂອງແຜນການປີສົມທຽບໄລຍະດຽວເພີ່ມຂຶ້ນ 7,66% ເທົ່າກັບ 486 ຕື້ກີບ, ໃນນັ້ນ, ແຂວງທີ່ປະຕິບັດໄດ້ລື່ນແຜນມີ

  • ແຂວງສະຫວັນນະເຂດປະຕິບັດໄດ້ລື່ນແຜນການປີ 92,01ຕື້ກີບ
  • ແຂວງຫຼວງນໍ້າທາລື່ນແຜນການ 62,82 ຕື້ກີບ
  • ແຂວງອັດຕະປື ປະຕິບັດໄດ້ລື່ນແຜນການ 9,13 ຕື້ກີບ ແລະ
  • ແຂວງຫົວພັນປະຕິບັດໄດ້ລື່ນແຜນການ 0,81 ຕື້ກີບ.

ກອງປະຊຸມໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາໃນວຽກງານຈຸດສຸມຂອງທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ,ຊຶ່ງທ່ານໄດ້ຊີ້ນຳບາງບັນຫາທີ່ຂະແໜງພາສີຄວນເອົາໃຈໃສ່ໃນການຈັດຕັ້ງປະຕິບັດໃຫ້ສຳເລັດເປັນຕົ້ນ: ໃຫ້ເພີ່ມທະວີການເຊື່ອມຊຶມ ແລະ ເປັນເຈົ້າການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການຈັດຕັ້ງປະຕິບັດ ຄໍາສັງເລກທີ 18/ນຍ ເພື່ອສ້າງທ່າຫັນປ່ຽນໃຫ່ມ ໃນການຈັດຕັ້ງປະຕິບັດວຽກງານພາສີ ໃຫ້ເລິບກເຊິງ ແຂງແຮງຮອບດ້ານ, ເອົາໃຈໃສ່ຄຸ້ມຄອງການນໍາເຂົ້ານໍ້າມັນເຊື້ອໄຟ ເພື່ອຕ້ານປະກົດການຫຍໍ້ທໍ້ໃນການລັກລອບນໍາເຂົ້າ ແລະ ຫັນເອົາຫົວໜ່ວຍທຸລະກິດທີ່ນໍາເຂົ້ານໍ້າມັນເຊື້ອໄຟໃຫ້ປະຕິບັດຖືກຕ້ອງຕາມ ແຈ້ງການເລກທີ 4491/ກງ, ສູ້ຊົນຫັນເອົາບັນດາຫົວໜ່ວຍທຸລະກິດ ນໍາເຂົ້າ-ສົ່ງອອກໃຫ້ເຂົ້າສູ່ລະບຽບການ ແລະ ສົ່ງເສີ່ມໃຫ້ມີການແຂ່ງຂັນຂອງບັນດາຫົວໜ້າທຸລະກິດທີ່ປະຕິບັດຖືກຕ້ອງຕາມກົດໜາຍ ໂດຍໄດ້ຮັບນະໂຍບາຍອໍານວນຄວາມສະດວກໃນການນໍາເຂົ້າ-ສົ່ງອອກ ສິນຄ້າຕາມຄໍາແນະນໍາກະຊວງການເງິນ ເລກທີ 4490/ກງ ແລະ ເລກທີ 5916/ກງ,

ສືບຕໍ່ປັງປຸງໂຄງຮ່າງການຈັດຕັ້ງໃຫ້ສໍາເລັດ ແນໃສ່ເພື່ອສ້າງກົນໄກໃຫ່ມໃນການບັນຊາຊີ້ນໍາລັດຖະການພາສີໃຫ້ກະທັດຮັດ, ໂລ່ງລ່ຽນ, ແທດເຖິງ ຕາມຄໍາສັ່ງຂອງຄະນະເລຂາທິການສູນກາງພັກ ເລກທີ 190/ຄລສພ, 29 ກັນຍາ 2021, ປະຕິຮູບຄຸນນະພາບຂອງພະນັກງານ, ຂອງຂະແໜງພາສີ ໃຫ້ໄດ້ມາດຖານເງື່ອນໄຂ ເພື່ອຮອງຮັບການຂະຫຍາຍຕົວທາງດ້ານເສດຖະ -ສັງຄົມ ເປັນຕົ້ນ :

ການການຂົນສົ່ງເຄື່ອນຍ້າຍສິນຄ້າທາງລົດໄຟ, ແລະ ການເປີດບໍລິການນໍາໃຊ້ທ່າບົກ, ຍົກສູງວຽກງານຝຶກອົບຮົມ-ຍົກລະດັບວິຊາສະເພາະ ເພື່ອປັບປຸງບຸກຄະລາກອນຂອງຂະແໜງພາສີໃຫ້ມີຄວາມເຂັ້ມແຂງ

ສະຫຼຸບ, ຕີລາຄາຂໍ້ສະດວກ, ຂໍ້ຫຍຸ້ງຍາກ ໃນການການແກ້ໄຂລົດນໍາເຂົ້າບໍ່ຖືກຕ້ອງຕາມ ຄໍາສັ່ງນາຍົກລັດຖະ ມົນຕີ ຕາມຄໍາສັ່ງ ສະບັບເລກທີ 20 ນຍ/, ລົງວັນທີ 08 ຕຸລາ 2021, ດໍາເນີນການແກ້ໄຂ, ປັບປຸງບັນດາຂອດຂັ້ນ ແລະ ຂະບວນການດໍາເນີນການແຈ້ງພາສີໃຫ້ກະທັດຮັດ, ໃຫ້ສາມາດຫັນການນໍາໃຊ້ລະບົບເອເລັກໂຕຼນິກເພື່ອບໍລິຫານວຽກງານໃຫ້ເຕັມປະສິດທິພາບ ແລະ ຮັບປະກັນຄວາມຖືກຕ້ອງຕາມຂັ້ນຕອນກົດໝາຍ,ລະບຽບການພາຍໃນ, ສາກົນ ແລະ ພາກພື້ນທີ່ໄດ້ກໍານົດ ໂດຍສະເພາະການຄ້ມຄອງສິນຄ້າຜ່ານທາງລົດໄຟ ລາວ-ຈີນ ແລະ ສິນຄ້າຜ່ານດ່ານສາກົນທ່າບົກທ່ານາແລ້ງ.

ທີ່ມາ: ກະຊວງການເງິນ

Leave a Reply

Your email address will not be published.