ເຈົ້າໜ້າທີ່ພະແນກຕໍາຫຼວດ ປກສ ເມືອງຈັນທະບູລີ ນວກັກ ຕົວກຸ່ມແກ້ງສໍ້ໂກງຊັບພົນລະເມືອງ 3 ຄົນ ຄື:
1. ນາງ ວັນນະພອນ ອາຍຸ 43 ປີ ຢູ່ບ້ານທາດຫຼວງກາງ ເມືອງໄຊເສດຖາ ນວ.
2. ທ້າວ ພອນສະຫວັນ ອາຍຸ 60 ປີ ຢູ່ບ້ານໄຊສົມບູນ ເມືອງໄຊທານີ ນວ.
3. ທ້າວ ວົງກົດ ອາຍຸ 60 ປີ ຢູ່ບ້ານນາໄຮ່ ເມືອງຫາດຊາດຟອງ ນວ ສ້າງຜົນເສຍຫາຍທັງໝົດ 390.000.000 ກີບ ໄປດໍາເນີນຄະດີຕາມກົດໝາຍ.
.
ພັທ ພອນໃຈ ພາມຸງຄຸນ ຮອງຫົວໜ້າກອງບັນຊາການ ປກສ ເມືອງຈັນທະລີ ກ່າວວ່າ: ໃນຕົ້ນເດືອນມີນາ 2021, ພາຍຫຼັງໄດ້ຮັບແຈ້ງຄວາມຈາກຜູ້ເສຍຫາຍວ່າ: ຖືກສໍ້ໂກ້ງຊັບ.
ຫຼັງ ຈາກນັ້ນ, ເຈົ້າໜ້າທີ່ຕໍາຫຼວດ ຈຶ່ງໄດ້ທໍາການເກັບກຳຂໍ້ມູນຫຼັກຖານຢ່າງລະອຽດຊັດເຈນ ຈຶ່ງໄດ້ຮຽກຕົວນາງ ວັນນະພອນ ມາສອບສວນ. ຜ່ານການສອບສວນຕົວຈິງ, ຜູ້ກ່ຽວໄດ້ຮັບສາລະພາບວ່າ: ໄດ້ສ້າງຂໍ້ມູນເທັດຂຶ້ນມາແທ້ ໂດຍອ້າງວ່າ: ຈະມີເງິນກອງທຶນຊ່ວຍເຫຼືອຈາກຕ່າງປະເທດ ເພື່ອມາຊ່ວຍ ເຫຼືອປະຊາຊົນທຸກຍາກ ເຂົ້າມາເປັນຈໍານວນຫຼວງຫຼາຍ, ຖ້າຫາຜູ້ໃດຢາກໄດ້ແມ່ນ ໃຫ້ມາລົງທະບຽບຜູ້ລະ 500.000 ກີບ ແລ້ວຈະໄດ້ເງິນຊ່ວຍເຫຼືອ ໂດຍການໂອນເງິນເຂົ້າບັນຊີ 50.000 ໂດລາຕໍ່ຄົນ.
ເມື່ອປຸກລະດົມຫຼາຍຄັ້ງ ຈຶ່ງເຮັດໃຫ້ຜູ້ເສຍຫາຍຫຼົງເຊື່ອ ຈຶ່ງໄດ້ເອົາຊັບສິນຂອງຕົນໄປຂາຍແລ້ວນໍາເອົາເງິນຈໍານວນດັ່ງກ່າວໄປລົງທະບຽບ ແລະ ໄດ້ລົງທະບຽນຕົກເປັນຈໍານວນ 780 ຄັ້ງ ລວມເປັນເງິນທັງໝົດ 390.000.000 ກີບ.
ນອກນັ້ນ, ນາງ ວັນນະພອນ ໄດ້ຮັບສາລະພາບຕື່ມອີກວ່າ: ໃນການຕົວະຍົວະຫຼ ອ ກ ລ ວ ງ ຄັ້ງນີ້ ບໍ່ແມ່ນຕົນເອງເຮັດພຽງຄົນດຽວ ຍັງມີຜູ້ຮ່ວມຂະບວນການອີກ ຄື: ທ້າວ ວົງກົດ ແລະ ທ້າວ ພອນສະຫວັນ ທີ່ໄດ້ຮ່ວມກັນປືກສາຫາລືວາງແຜນ. ສະນັ້ນ, ເຈົ້າໜ້າທີ່ຈຶ່ງໄດ້ຮຽກຕົວ ທ້າວ ວົງກົດ ແລະ ທ້າວ ພອນສະຫວັນ ເຂົ້າມາສອບສວນ ແລະ ພວກກ່ຽວທັງສອງ ໄດ້ຮັບສາລະພາບວ່າ: ໄດ້ຮ່ວມກັນຕົວະຍົວະຫຼອກ ລວງຄັ້ງນີ້ແທ້, ສ່ວນເງິນທັງໝົດທີ່ໄດ້ມານັ້ນ ພວກກ່ຽວທັງ 3 ຄົນ, ໄດ້ແບ່ງປັນກັນເອົາໄປໃຊ້ຈ່າຍ ແລະ ເຈົ້າໜ້າທີ່ເກັບກູ້ຄືນມາໄດ້ ຄື: ເງິນ 1.300 ໂດລາ, ເງິນກີບ 10 ລ້ານກີບ, ຄໍາ 4 ບາດເຄິ່ງ, ລົດຕູ້ 1 ຄັນ ແລະ ໄດ້ມອບຄືນໃຫ້ຜູ້ເສຍຫາຍ.
ຈາກນັ້ນ, ເຈົ້າໜ້າທີ່ຕຳຫຼວດ ໄດ້ນຳພວກກ່ຽວທັງ 3 ຄົນໄປດຳເນີນຄະດີຕາມກົດໝາຍ.
ໝາຍເຫດ: ຂໍໃຫ້ພໍ່-ແມ່ປະຊາຊົນທຸກທ່ານ ຈົ່ງມີສະຕິ, ຢ່າຫຼົງຄາລົມຄົນງ່າຍ ເພາະອາດຈະຕົກເປັນເຫຍື່ອຂອງກຸ່ມຄົນບໍ່ດີໄດ້.