ຂ່າວສານຫວຽດນາມລາຍງານວ່າ: ລັດຖະບານອົສຕຣາລີ ຈະໃຊ້ງົບປະມານ 3,4 ຕື້ໂດລາ ເຂົ້າໃນແຜນການຄວາມໝັ້ນຄົງທາງດ້ານເສດຖະກິດຂອງແມ່ຍິງ ເພື່ອເພີ່ມເງິນອຸດໜູນໃນດ້ານການເບິ່ງແຍງເດັກ, ຮັບປະກັນຄວາມປອດໄພ ແລະ ສຸມໃສ່ການນຳເອົາແມ່ຍິງ ກັບຄືນສູ່ກຳລັງແຮງງານ.
ຂ່າວລະບຸວ່າ: ລັດຖະບານອົສຕຣາລີ ໃຫ້ຄຳໝັ້ນສັນຍາຈະໃຊ້ງົບປະມານຫຼາຍຕື້ໂດລາອົສຕຣາລີເພື່ອຟື້ນຟູເສດຖະກິດທີ່ກຳລັງອ່ອນລົງ ຍ້ອນໂຣກລະບາດໂຄວິດ-19. ນີ້ເປັນການເຄື່ອນໄຫວທີ່ຄາດວ່າ: ຈະເຮັດໃຫ້ສະຖານະການການເງິນສາທາລະນະຂອງປະເທດ ຍັງສືບຕໍ່ຢູ່ໃນລະດັບເຕືອນໄພໃນອີກຫຼາຍປີຂ້າງໜ້າ.
ພາຍໃຕ້ຄຳໝັ້ນສັນຍາຂ້າງເທິງນີ້, ລັດຖະບານອົສຕຣາລີ ຈະໃຊ້ງົບປະມານ 3,4 ຕື້ໂດລາອົສຕຣາລີ (ເທົ່າກັບ 2,6 ຕື້ໂດລາ) ເຂົ້າໃນແຜນການຄວາມໝັ້ນຄົງທາງດ້ານເສດຖະກິດ ສຳລັບແມ່ຍິງ ເພື່ອເພີ່ມເງິນອຸດໜູນໃນດ້ານການເບິ່ງແຍງເດັກ, ຮັບປະກັນຄວາມປອດໄພ ແລະ ສຸມໃສ່ການນຳເອົາແມ່ຍິງ ກັບຄືນສູ່ກຳລັງແຮງງານ. ນອກນີ້, ລັດຖະບານ ຍັງໄດ້ໃຊ້ງົບປະມານ 15,2 ຕື້ໂດລາ ອົສຕຣາລີ ເພື່ອລົງທຶນໃສ່ພື້ນຖານໂຄງລ່າງ ໂດຍສະເພາະ ແມ່ນທາງລົດໄຟ, ໂຄງການເສັ້ນທາງ ແລະ ສູນຂົນສົ່ງທີ່ສຳຄັນໃນເມືອງເມວເບີນ.