ຫ້ອງຕຳຫຼວດ ປກສ ນວ ສົມທົບກັບພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ໄດ້ທຳລາຍສິ້ນຄ້າທີ່ຫ້າມນຳເຂົ້າ ປະເພດອາຫານທະເລ ນໍ້າໜັກ 700 ກິໂລ ແລະ ໝາກຖົ່ວ 450 ກິໂລ ທີ່ບໍ່ໄດ້ ຜ່ານການກວດກາຈາກເຈົ້າໜ້າທີ່ ແລະ ມີຄວາມສ່ຽງຕິດພະຍາດໂຄວິດ-19, ໃນວັນທີ 30 ມັງກອນ 2021 ທີ່ສູນຖິ້ມຂີ້ເຫຍື້ອ ຫຼັກ 32 ເມືອງໄຊທານີ ນວ ໂດຍມີ ພັທ ຄໍາພອນ ພົມມະຈັນ ຫົວໜ້າພະແນກຕໍາຫຼວດປ້ອງກັນເສດຖະກິດ ຫ້ອງຕໍາຫຼວດ ປກສ ນວ, ມີທ່ານ ມະໂນສັກ ໄຊສິລິກຸນ ຮອງຫົວໜ້າຂະແໜງການຄ້າພາຍໃນ ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ.
.
ພັທ ຄໍາພອນ ພົມມະຈັນ ໃຫ້ຮູ້ວ່າ: ໃນວັນ 30 ມັງກອນ 2021, ເວລາ 4 ໂມງ ໄດ້ຮັບແຈ້ງຄວາມຈາກພົນລະເມືອງດີວ່າ: ມີລົດຕູ້ໝາຍເລກທະບຽນ ກຕ 5425 ກຳແພງນະຄອນ ລັກຂົນສິນຄ້າທີ່ຫ້າມນໍາເຂົ້າຈາກປະເທດເພື່ອນບ້ານ ເຂດບ້ານສໍາພັນນາ ເມືອງສັງທອງ ນະຄອນຫຼວງວຽງຈັນ ເພື່ອສົ່ງໃຫ້ແມ່ຄ້າຢູ່ບັນດາຕະຫຼາດ, ຈາກນັ້ນ ໜ່ວຍງານວິຊາສະເພາະສະເພາະກິດ ໄດ້ອອກຕິດຕາມລົດຄັນດັ່ງກ່າວ ມາຮອດເວລາ 6 ໂມງ ຂອງວັນດຽວກັນ ຈິ່ງໄດ້ພົບເຫັນລົດເປົ້າໝາຍ ແລ່ນມຸງໜ້າມາເຂດບ້ານເກົ້າລ້ຽວ ເມືອງສີໂຄດຕະບອງ ນວ ເຈົ້າໜ້າທີ່ສະເພາະກິດຈິ່ງໄດ້ສະເໜີຕົວເຂົ້າກວດຄົ້ນ ພົບເຫັນສິນຄ້າຫ້າມນຳເຂົ້າ ປະເພດອາຫານທະເລ ມີ: ກຸ້ງປອກ 150 ກິໂລ; ປາເມີກສົດແຊ່ແຂງ 500 ກິໂລ; ໜວດປາມຶກ 50 ກິໂລ ແລະ ໝາກຖົ່ວ 490 ກິໂລ, ສິນຄ້າຈໍານວນດັ່ງກ່າວ ນໍາເຂົ້າຜິດລະບຽບການກ່ຽວກັບລະບອບພາສີອາການຂອງລັດ ແລະ ລະເມີດຕໍ່ແຈ້ງການ ສະບັບເລກທີ 1149/ອຄ.ກຂອ, ລົງວັນທີ 23 ທັນວາ 2020 ວ່າດ້ວຍການຫ້າມນໍາເຂົ້າຊົ່ວຄາວ ອາຫານທະເລ ຈາກປະເທດໄທ ແລະ ຂໍ້ຕົກລົງ ສະບັບເລກທີ 51/ນຍ, ລົງວັນທີ 30 ສິງຫາ 2020 ວ່າດ້ວຍການແຕ່ງຕັ້ງຄະນະສະເພາະກິດ ສົ່ງເສີມການຜະລິດ ແລະ ຊົມໃຊ້ຜະລິດຕະພັນທີ່ຜະລິດຢູ່ພາຍໃນ ແລະ ການຄຸ້ມຄອງການນໍາເຂົ້າສິນຄ້າ ອຸປະໂພກ-ບໍລິໂພກ.
.
ການທໍາລາຍສິນຄ້າຄັ້ງນີ້ ເປັນການປ້ອງກັນບໍ່ໃຫ້ເກີດການແຜ່ລະບາດພະຍາດໂຄວິດ-19 ຈາກປະເທດເພື່ອນບ້ານ ເພື່ອບໍ່ໃຫ້ປະຊາຊົນ ນຳສິນຄ້າຈໍານວນດັ່ງກ່າວ ໄປບໍລິໂພກ ເພາະສິນຄ້າຈໍານວນດັ່ງກ່າວ ບໍ່ໄດ້ຮັບການກວດກາມີສານເຄມີປົ່ນເປື້ອນເກີນຄ່າມາດຖານທີ່ກໍານົດໄວ້ ຕໍ່ຜູ້ລະເມີດ ແລະ ພາຫະນະຮັບໃຊ້ ເຈົ້າໜ້າທີ່ສະເພາະກິດ ໄດ້ນຳມາຫ້ອງຕຳຫຼວດ ປກສ ນວ ເພື່ອສືບສວນ-ສອບສວນ ຊອກຫາຜູ້ຮ່ວມຂະບວນການ ນໍາເຂົ້າສິນຄ້າທີ່ບໍ່ຖືກຕ້ອງຕາມກົດໝາຍ ແລະ ລະບຽບການ.
.
.
