ໃນວັນທີ 6 ມັງກອນ 2021, ທ່ານ ສອນໄຊ ສີພັນດອນ ຮອງນາຍົກລັດຖະ ມົນຕີ, ລັດ ຖະມົນຕີ ກະຊວງແຜນນການ ແລະ ການລົງທຶນ, ທັງເປັນຫົວໜ້າອະນຸກໍາມະການງົບປະມານ ແລະ ບໍລິຫານກະກຽມກອງປະຊຸມໃຫຍ່ ຄັ້ງທີ XI ຂອງພັກ, ພ້ອມດ້ວຍຄະນະ ແລະ ພາກສ່ວນກ່ຽວຂ້ອງ ລົງຕິດ ຕາມກວດກາຄວາມພ້ອມວຽກງານດ້ານຕ່າງໆ ໃຫ້ແກ່ການຈັດກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກປະຊາຊົນ ປະຕິວັດລາວ, ເຊິ່ງຄາດວ່າຈະໄດ້ຈັດຂຶ້ນໃນລະຫວ່າງວັນທີ 13-15 ມັງກອນ 2021 ທີ່ນະຄອນຫລວງວຽງຈັນ.

ໃນການລົງກວດກາຄັ້ງນີ້, ບັນດາອະນຸກຳມະການ ໄດ້ລາຍງານຄວາມພ້ອມຂອງໜ້າວຽກດ້ານຕ່າງໆ ໃຫ້ທ່ານຮອງນາຍົກລັດຖະມົນຕີ ຮັບຊາບ ແລະ ມີທິດຊີ້ນຳເພີ່ມຕື່ມ, ເຊິ່ງໂດຍລວມແມ່ນມີຄວາມພ້ອມເກືອບ 100% ແລ້ວ ແລະ ຍັງມີບາງໜ້າວຽກທີ່ກຳລັງຂຸ້ນຂ້ຽວສືບຕໍ່ປະຕິບັດໃຫ້ສຳເລັດ.

ໂອກາດນີ້, ທ່ານ ສອນໄຊ ສີພັນດອນ ໄດ້ຕີລາລາສູງ ແລະ ສະແດງຄວາມຊົມເຊີຍຕໍ່ທຸກຄວາມພະຍາຍາມໃນການເອົາໃຈໃສ່ຂອງທຸກໆອະນຸກຳມະການ ສຳລັບການກະກຽມຄວາມພ້ອມ, ພ້ອມທັງໄດ້ເນັ້ນ ແລະ ຮຽກຮ້ອງໃຫ້ພາກສ່ວນທີ່ກ່ຽວຂ້ອງ ສືບຕໍ່ເອົາໃຈໃສ່ປະຕິບັດບັນດາວຽກງານທີ່ຍັງຄ້າງຄາໃຫ້ສຳເລັດຕາມຈຸດປະສົງ, ຄາດໝາຍ ແລະ ທັນເວລາ ແນໃສ່ເພື່ອຮັບປະກັນຄວາມພ້ອມຮອບດ້ານ ເປັນຕົ້ນແມ່ນ ຄວາມປອດໄພ, ຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ອື່ນໆ ເພື່ອປະກອບສ່ວນເຮັດໃຫ້ການດຳເນີນກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ XI ຂອງພັກ ໄດ້ຮັບຜົນສຳເລັດຢ່າງຈົບງາມ.

ພ້ອມກັນນັ້ນ, ກໍໄດ້ເນັ້ນໃຫ້ເອົາວຽກງານປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ເປັນບັນຫາສຳຄັນ ແລະ ໃຫ້ທຸກຄົນປະຕິບັດຕາມຢ່າງເຄັ່ງຄັດ ໂດຍສະເພາະການກວດວັດ ແທກອຸນຫະພູມຮ່າງກາຍ, ການໃສ່ຜ້າອັດປາກ-ດັງ, ການຮັກສາໄລຍະຫ່າງ ແລະ ອື່ນໆ.

ຂ່າວ-ພາບ: ສິງຄຳ

LEAVE A REPLY

Please enter your comment!
Please enter your name here