ແຮງງານລາວ ລັກຂ້າມນໍ້າຂອງມາ ບໍ່ພົບໂຄວິດ-19 ແຕ່ຍັງສືບຕໍ່ຈຳກັດບໍລິເວນຢູ່ສູນທີ່ທາງການຈັດໃຫ້

ທ່ານ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາ ທາລະນະສຸກ ໄດ້ລາຍງານໃຫ້ຮູ້ ໃນວັນທີ 5 ມັງກອນ 2021 ນີ້ວ່າ: ລາວ ຍັງບໍ່ພົບຜູ້ຕິດເຊື້ອໂຄວິດ-19 ເພີ່ມ, ແຕ່ເຖິງຢ່າງໃດກໍຕາມ ສະພາບການແຜ່ລະບາດຂອງພະຍາດດັ່ງກ່າວໃນທົ່ວໂລກຍັງ ສືບຕໍ່ແຜ່ລະບາດເປັນວົງກວ້າງ, ສ້າງຄວາມກັງວົນໃຫ້ແກ່ຫລາຍປະເທດໃນທົ່ວໂລກ ເນື່ອງຈາກມີລາຍງານຜູ້ຕິດເຊື້ອໃໝ່ ແລະ ຜູ້ເສຍຊີວິດເພີ່ມສູງຂຶ້ນຢ່າງຕໍ່ເນື່ອງ.

ສຳລັບ ສປປ ລາວ ໃນກໍລະນີ ມີຂ່າວໃນສື່ອອນລາຍ ກ່ຽວກັບແຮງງານລາວ ມາຈາກປະເທດມາເລເຊຍ, ລັກຂ້າມນໍ້າຂອງມາລາວ ປັດຈຸບັນໄດ້ຖືກຈຳກັດບໍລິເວນ ຢູ່ສະຖານທີ່ ທີ່ຄະນະສະເພາະກິດກະກຽມໄວ້, ເຊິ່ງລາຍລະອຽດ ມີດັ່ງນີ້: ວັນທີ 1 ມັງກອນ 2021 ຄະນະສະເພາະກິດຂັ້ນບ້ານ ນາລ້ອງ, ເມືອງຫາດຊາຍຟອງ, ນະຄອນຫລວງວຽງຈັນ ສົມທົບກັບເຈົ້າໜ້າທີ່ຮັກສາຄວາມສະຫງົບບ້ານ ໄດ້ກັກໂຕແຮງງານລາວ ຈຳນວນ 11 ຄົນ ແລະ ຄົນຂັບເຮືອ 2 ຄົນ ລວມເປັນ 13 ຄົນ, ທັງໝົດເປັນເພດຊາຍ ທີ່ລັກລອບຂ້າມຂອງມາດ້ວຍເຮືອຫາງຍາວ ຈາກປະເທດໄທ ມາຫາເຂດນາລ້ອງ, ເມືອງຫາດຊາຍຟອງ ນະຄອນຫລວງວຽງຈັນ.

ຈາກນັ້ນ ກໍ່ໄດ້ປະສານ ແລະ ລາຍງານຄະນະສະເພາະກິດ ພວກກ່ຽວໄດ້ຖືກນຳສົ່ງໄປຈຳກັດບໍລິເວນ ຢູ່ສູນຈຳກັດບໍລິເວນຫລັກ 27 ໄດ້ຕິດຕາມອາການທຸກຄົນ, ບໍ່ມີອາການໄຂ້ ຫລື ໄອ ແລະ ໄດ້ເກັບຕົວຢ່າງມາກວດຫາເຊື້ອໂຄວິດ-19 ຜົນກວດແມ່ນບໍ່ພົບເຊື້ອ, ພວກກ່ຽວຈະສືບຕໍ່ຈຳກັດບໍລິເວນຈົນກ່ວາຈະຄົບກຳນົດ 14 ວັນ. ຕໍ່ສະພາບດັ່ງກ່າວ, ຄະນະສະເພາະກິດຂັ້ນສູນກາງ ແລະ ທ້ອງຖິ່ນ ໄດ້ເອົາໃຈໃສ່ຕິດຕາມເຝົ້າລະວັງສະພາບການຢ່າງໃກ້ຊິດ ແລະ ຄະນະຮັບຜິດຊອບແຕ່ລະພາກສ່ວນ ໄດ້ມີການເອົາ ໃຈໃສ່ ຈັດຕັ້ງປະຕິບັດມາດຕະການຢ່າງເຂັ້ມງວດ ຕາມຈຸດຜ່ານແດນ, ຊາຍແດນ.

ລາຍງານຈາກ ອ້າຍນ້ອງທະຫານ ກ້ອງຮ້ອຍຊາຍແດນ 243 ໃຫ້ຮູ້ວ່າ ໃນວັນທີ 1 ມັງກອນ 2021 ຜ່ານມາ ກອງຮ້ອຍທະຫານຊາຍແດນ 243 ໄດ້ອອກລາດຕະເວນເຂດເມືອງຫາດຊາຍຟອງ, ນະຄອນຫຼວງວຽງຈັນ ໄດ້ພົບເຫັນຄົນລັກລອບເຂົ້າເມືອງ (ມາຈາກປະເທດໄທ) ຈໍານວນ 11 ຄົນ.

ດັ່ງນັ້ນ, ທະຫານຊາຍແດນຈືງປະສານງານຫາພາກສ່ວນທີ່ຂ້ອງເພື່ອນໍາເອົາພວກດັ່ງກ່າວໄປກັກຕົວ ຕາມມາດຕະການ ປ້ອງກັນ ໂຄວິດ-19. ພ້ອມທັງແຈ້ງເຕືອນໃຫ້ ທຸກຄົນ ໂດຍສະເພາະແຮງງານລາວ ທີ່ລັກລອບເຂົ້າເມືອງຜິດກົດໝາຍ ອາດນໍາເອົາເຊື້ອໂຄວິດ-19 ມານໍາ, ຄວນເຂົ້າອອກ ໃຫ້ຖືກຕາມມາດຕະການ ແລະ ເຂົ້າກັກຕົວ ເພື່ອປ້ອງກັນຕົນເອງ, ຄອບຄົວ ແລະ ປະເທດຊາດ. ປ້ອງກັນ ໂຄວິດ-19 ແມ່ນໜ້າທີ່ຂອງທຸກຄົນ.

ຄລິບຈາກຈຸດ ກວດພົບຜູ່ລັກລອບເຂົ້າປະເທດແບບຜິດກົດໝາຍ

LEAVE A REPLY

Please enter your comment!
Please enter your name here