ໃນຕອນເຊົ້າຂອງວັນທີ 30 ທັນວາ 2020 ຜ່ານມາ, ພະແນກສຶກສາທິການ ແລະ ກີລາ ແຂວງສະຫວັນນະເຂດ ໄດ້ຈັດພິທີມອບ – ຮັບໂຄງການປັບປຸງສະພາບແວດລ້ອມຂອງໂຮງຮຽນມັດທະຍົມສຶກສາໃຫ້ແກ່ 4 ແຂວງພາກກາງ ແລະ ພາກໃຕ້ ທີ່ເດີ່ນໂຮງຮຽນ ມສ ພີນ ເມືອງອຸທຸມພອນ.

ເຂົ້າຮ່ວມໃນພິທີມີ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກີລາ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ທ່ານ ທາເກວາກະ ເຄໂຊ ເອກອັກຄະລັດຖະທູດ ຜູ້ມີອໍານາດເຕັມປະເທດຍີ່ປຸ່ນ ປະຈໍາ ສປປ ລາວ, ທ່ານ ໂຢຊິ ຮາຣຸໂຢເນຢາມະມີ ຫົວໜ້າໂຄງການໄຈກາ ປະຈໍາ ສປປ ລາວ, ບັນດາຕົວແທນຈາກແຂວງຄໍາມ່ວນ, ສາລະວັນ ແລະ ແຂວງຈໍາປາສັກ ພ້ອມດ້ວຍພະນັກງານທີ່ກ່ຽວຂ້ອງ, ຄູ – ອາຈານ ແລະ ນັກຮຽນເຂົ້າຮ່ວມຢ່າງຫຼວງຫຼາຍ.

ໃນໂອກາດນີ້, ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ຫົວໜ້າພະແນກສຶກສາທິການ ແລະ ກີລາແຂວງ ກໍໄດ້ລາຍງານຜົນຂອງການກໍ່ສ້າງໂຄງໂຮງຮຽນມັດທະຍົມຢູ່ແຂວງພາກກາງ ແລະ ພາກໃຕ້ ວ່າ: ລັດຖະບານ ສປປ ລາວ ໄດ້ຮັບທຶນຊ່ວຍເຫຼືອລ້າຈາກລັດຖະບານຍີ່ປຸ່ນ ຈໍານວນ 1.415 ລ້ານເຢນ ຫຼື 12,46 ລ້ານໂດລາສະຫະລັດ ເພື່ອປັບປຸງສະພາບແວດລ້ອມຂອງໂຮງຮຽນມັດທະຍົມໃນ 4 ແຂວງພາກກາງ ແລະ ພາກໃຕ້ ຄື: ແຂວງສະຫວັນນະເຂດ, ຄໍາມ່ວນ, ສາລະວັນ ແລະ ແຂວງຈໍາປາສັກ.

ໂຮງຮຽນທີ່ນອນໃນບຸລິມະສິດເປົ້າໝາຍຂອງໂຄງການໃນ 4 ແຂວງນີ້ ລວມມີທັງໝົດ 37 ແຫ່ງ. ໃນນີ້, ມີຫ້ອງຮຽນ 238 ຫ້ອງ, ຫ້ອງການຄູ 9 ຫ້ອງ, ຫ້ອງລວມ 4 ຫ້ອງ, ຫໍສະໝຸດ ແລະ ຫ້ອງເກັບເຄື່ອງ 28 ຫ້ອງ, ຫ້ອງນໍ້າ 144 ຫ້ອງ, ກະດານດໍາ 251 ແຜ່ນ, ເຟີນີເຈີ, ຕິດຕັ້ງລະບົບໄຟຟ້າ ແລະ ອື່ນໆ.

ການດໍາເນີນໂຄງການແບ່ງອອກເປັນ 2 ໄລຍະ ຄື: ໄລຍະທີ 1 ແມ່ນເລີ່ມດໍາເນີນຢູ່ແຂວງສາລະວັນ ແລະ ແຂວງຈໍາປາສັກໃຊ້ເວລາກໍ່ສ້າງ 10 ເດືອນ ແລະ ໄລຍະທີ 2 ແມ່ນດໍາເນີນການກໍ່ສ້າງຢູ່ແຂວງສະຫວັນນະເຂດ ແລະ ແຂວງຄໍາມ່ວນ ຕາມແຜນແມ່ນໃຊ້ເວລາກໍ່ສ້າງ 10 ເດືອນ ແຕ່ເນື່ອງດ້ວຍເກີດການແຜ່ລະບາດໜັກຂອງພະຍາດໂຄວິດ – 19 ຈຶ່ງເຮັດໃຫ້ການກໍ່ສ້າງຫຼ້າຊ້າເປັນ 12 ເດືອນ ຈຶ່ງສໍາເລັດຜົນ.

ໂອກາດດຽວກັນນີ້, ບັນດາຄະນະປະທານ, ແຂກທີ່ຖືກເຊີນ, ພະນັກງານ, ຄູ – ອາຈານ, ພາກສ່ວນທີ່ກ່ຽວຂ້ອງກໍໄດ້ຮ່ວມກັນຕັດແຖບຜ້າ ແລະ ປ່ອຍໝາກປູ່ມເປົ້າເປີດງານຢ່າງເປັນທາງການ.

LEAVE A REPLY

Please enter your comment!
Please enter your name here