ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ການລະບາດຂອງພະຍາດ COVID-19 ຍັງສຶບຕໍ່ປະສານສົມທົບກັບພາກສ່ວນກ່ຽວຂ້ອງ ເພື່ອລົງເກັບຕົວຢ່າງ ແລະ ຊອກຫາ ເຊື້ອພະຍາດ ໂຄວີດ-19 ໃນກຸ່ມ ພະນັກງານຂອງ ບໍລິສັດນຳເຂົ້າອາຫານສົດ ແລະ ແຊ່ແຂງ ພ້ອມນີ້ຍັງໄດ້ເກັບຕົວຢ່າງ ຈາກຜູ້ປະກອບການຂາຍອາຫານສົດ ແລະ ແຊ່ແຂງ ຢູ່ໃນ 10 ຕະຫຼາດສົດ ຂອງນະຄອນ ຫຼວງວຽງຈັນ ຈໍານວນ 138 ຄົນ ເຊິ່ງ ຜົນກວດເປັນຜົນລົບທັງໝົດ.

ດຣ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຖະແຫລງຂ່າວປະຈໍາວັນທີ 4 ມັງກອນ ວ່າ: ການເຝົ້າລະວັງພະຍາດ COVID-19 ຢູ່ປະເທດເຮົາ ມາ ຮອດ 5 ໂມງແລງ ຂອງວັນທີ 03 ມັງກອນ 2021 ທົ່ວປະເທດມີຜູ້ເດີນທາງເຂົ້າມາ ທັງໝົດ 1.399 ຄົນ:

ໃນນັ້ນຈຸດຜ່ານດ່ານ ລາວ – ໄທ ທັງໝົດ 472 ຄົນ ເປັນແຮງງານລາວກັບມາແຕ່ໄທ 130 ຄົນ; ຈຸດຜ່ານດ່ານ ລາວ – ຈີນ ທັງໝົດ 27 ຄົນ; ຈຸດຜ່ານດ່ານ ລາວ – ຫວຽດນາມ ທັງໝົດ 868 ຄົນ; ຈຸດຜ່ານດ່ານ ລາວ – ກຳປູເຈຍ ທັງໝົດ 02 ຄົນ; ເດີນທາງຜ່ານ ສະໜາມບິນສາກົນວັດໄຕ ທັງໝົດ 30 ຄົນ, ທັງໝົດແມ່ນ ຄົນຈີນ; ທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ແລ້ວຈຶ່ງນຳສົ່ງໄປຫາສະຖານທີ່ ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ດຣ ນາງ ພອນປະເສີດ ໄຊຍະມຸງຄຸນ ຍັງລາຍງານໃຫ້ຮູ້ກ່ຽວກັບ ສະພາບຂອງພະຍາດໄຂ້ເລືອດອອກຢູ່ໃນປະເທດເຮົາ ໃນວັນທີ 03 ມັງກອນ 2021 ແມ່ນ ບໍ່ພົບຜູ້ຕິດເຊື້ອກໍລະນີໃໝ່ເພີ່ມ ຍັງຄົງມີແຕ່ຜູ້ຕິດເຊື້ອສະສົມທັງໝົດ 8.248 ຄົນ ໃນປີ 2020 ໃນນີ້ມີລາຍງານກໍລະນີໃນ 18 ແຂວງ, ຫຼາຍກວ່າໝູ່ແມ່ນ ນະຄອນຫຼວງວຽງຈັນ ສ່ວນຈຳນວນຜູ້ເສຍຊີວິດ ຍ້ອນພະຍາດໄຂ້ເລືອດອອກມີ ທັງໝົດ 13 ຄົນ ປະກອບມີນະຄອນຫຼວງ 04 ຄົນ, ບໍລິຄຳໄຊ 02 ຄົນ, ຄຳມ່ວນ 02 ຄົນ, ໄຊຍະບູລີ 01 ຄົນ, ຊຽງຂວາງ 01 ຄົນ, ສະຫວັນນະເຂດ 01 ຄົນ, ຜົ້ງສາລີ 01 ຄົນ ແລະ ອຸດົມໄຊ 01 ຄົນ.

LEAVE A REPLY

Please enter your comment!
Please enter your name here