ປັດຈຸບັນ ສປປ ລາວ ໄດ້ຮັບການຊ່ວຍເຫຼືອວັກຊິນປ້ອງກັນໂຄວິດ-19 ຈໍານວນໜຶ່ງຈາກ ປະເທດພັດທະນາແລ້ວ ເພື່ອເລັ່ງສັກປ້ອງກັນກຸ່ມຄົນທີ່ມີຄວາມສ່ຽງ ໂດຍອີງໃສ່ເງື່ອນໄຂຂອງອົງການອະນາໄມໂລກທີ່ໄດ້ກໍານົດໃຫ້ໃຊ້ສະເພາະບັນຊີວັກຊິນສໍາລັບພາວະສຸກເສີນ, ສ່ວນປີ 2021 ເມື່ອໄດ້ຮັບວັກຊິນຈາກສະຫະພັນສາກົນແລ້ວ ຈະເລີ່ມສັກໃຫ້ປະຊາກອນທົ່ວໄປ ຄາດວາດເບື້ອງຕົ້ນຈະສາມາດສັກໄດ້ 1,4 ລ້ານຄົນ. ຕາມການລາຍງານຂອງທ່ານ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ໃນວັນທີ 31 ທັນວາ 2021 ທີ່ກະຊວງສາທາລະນະສຸກ.

Image may contain: 2 people, people sitting

ທ່ານ ບຸນກອງ ສີຫາວົງ ໃຫ້ຮູ້ວ່າ: ປັດຈຸບັນທາງການ ສປ ຈີນ ໄດ້ມອບວັກຊິນ SINOPHARM ໃຫ້ ສປປ ລາວ ຈໍານວນ 2000 ໂດສ (doses) ແລະໄດ້ເລີ່ມສັກຮອບທໍາອິດໃຫ້ກຸ່ມເປົ້າໝາຍຈໍານວນໜຶ່ງແລ້ວ. ນອກນັ້ນ, ສະຫະພັນຣັດເຊຍຍັງໃຫ້ວັກຊິນ SPUTNIK V 500 doses ແລະຈະມາຮອດ ສປປ ລາວ ໃນວັນທີ 2 ມັງກອນ 2021 ເຊິ່ງວັກຊິນທີ່ໄດ້ຮັບທັງໝົດແມ່ນເພື່ອນຳໃຊ້ເຂົ້າໃນພາວະສຸກເສີນ. ນອກຈາກນີ້, ສປປ ລາວ ຍັງຈະໄດ້ຮັບວັກຊິນຕ້ານໂຄວິດ-19 ໂດຍການຊ່ວຍເຫຼືອລ້າຈາກສະຫະພັນວັກຊີນສາກົນ (COVAX FACILITY) ແລະ ຈະເລີ່ມການສັກໃຫ້ປະຊາກອນທົ່ວໄປໃນເດືອນເມສາ ປີ 2021 ຄາດວ່າປະຊາກອນ 1.4 ລ້ານຄົນຈະໄດ້ຮັບ.

ຕາມຂໍ້ມູນໃຫ້ຮູ້ຕື່ມວ່າ: ກຸ່ມເປົ້າໝາຍທີ່ໄດ້ຮັບການສັກວັກຊິນໃນເບື້ອງຕົ້ນນີ້ ແມ່ນອາສາສະໝັກ, ພະນັກງານແພດໝໍ ທີ່ປະຕິບັດງານຕາມປ້ອມ ຫຼືດ່ານ, ພົວພັນກັບຄົນເຈັບ ເຊິ່ງເຫັນວ່າວັກຊິນດັ່ງກ່າວໄດ້ຮັບຜົນດີ ແລະບໍ່ມີຜູ້ໄດ້ຮັບຜົນຂ້າງຄຽງ. ສ່ວນກຸ່ມເປົ້າໝາຍທີ່ຈະໄດ້ຮັບການສັກວັກຊິນຂອງສະຫະພັນວັກຊີນສາກົນ ກໍ່ຍັງອີງຕາມການສັກວັກຊິນແກ້ໄຂພາວະສຸກເສີນ ເຊິ່ງຈະສຸມໃສ່ກຸ່ມທີ່ມີຄວາມສ່ຽງສູງ ຫາປານກາງ ເຊັ່ນ: ແພດໝໍ, ພະຍາບານ ທັງໝົດໃນຂະແໜງສາທາລະນະສຸກ, ໂຮງໝໍທະຫານ, ໂຮງໝໍຕໍາຫລວດ, ອາສາສະໝັກແພດບ້ານ, ອາສາສະໝັກສັງຄົມສົງເຄາະ, ຜູ້ສູງອາຍຸ, ຜູ້ມີພະຍາດປະຈຳຕົວ (ບໍ່ນອນໃນຂໍ້ຫ້າມສັກວັກຊິນ), ຜູ້ອອກແຮງງານເຄື່ອນຍ້າຍ, ຜູ້ເດີນທາງເຂົ້າອອກ ແລະແຮສຸກເສີນ.

ທ່ານລັດຖະມົນຕີກ່າວຕື່ມວ່າ: ປັດຈຸບັນ, ລັດຖະບານລາວກໍ່ໄດ້ຈັດງົບປະມານໄວ້ຈຳນວນໜຶ່ງສໍາລັບບັນຫາດັ່ງກ່າວ ແລະສືບຕໍ່ຂົນຂວາຍການຊ່ວຍເຫຼືອ, ການຈັດຫາງົບປະມານຊື້ ແລະນໍາວັກຊິນມາສັກໃຫ້ແກ່ພໍ່ແມ່ປະຊາຊົນລາວທຸກຖ້ວນໜ້າ ແລະການສັກຄືນອີກທຸກ 2 ຫາ 3 ປີ ເພື່ອໃຫ້ປະຊາຊົນລາວ ມີພຸມຄຸ້ມກັນ ບໍ່ຕິດເຊື້ອຈາກພະຍາດດັ່ງກ່າວ.

Image may contain: airplane, shoes, sky and outdoor

ສ່ວນບັນຊີວັກຊິນໃຊ້ໃນພາວະສຸກເສີນຂອງອົງການອະນາໄມໂລກ ແມ່ນສາມາດນຳໃຊ້ໃນສະພາບການທີ່ສຸກເສີນ ໃຫ້ກຸ່ມທີ່ມີຄວາມສ່ຽງ ເພື່ອຢັບຢັ້ງການລະບາດຂອງໂຄວິດ 19 ໃນບັນດາປະເທດ ຕ່າງໆຄື: ວັກຊິນ SINOPHARM ສັກ 2 ເຂັມ, ສາມາດສ້າງພູມຄຸ້ມກັນ ໄດ້ເຖີງ 3 ປີ, ວັກຊິນ SINOVAC ຈາກ ສປ ຈີນ, SPUTNIK V ຈາກ ລັດເຊຍ ສັກ 2 ເຂັມສາມາດສ້າງພຸມຄຸ້ມກັນ ໄດ້ເຖີງ 2 ປີ. , ວັກຊີນຈາກ COVAX FACILITY GAVI.

ຂ່າວ-ພາບ: Sonepaserth

LEAVE A REPLY

Please enter your comment!
Please enter your name here