ທ່ານ ດຣ. ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຖະແຫຼງຂ່າວ ປະຈຳວັນທີ 28 ທັນວາ 2020 ວ່າ: ໃນວັນທີ 27 ທັນວາ 2020 ໄດ້ເກັບຕົວຢ່າງມາກວດວິເຄາະທັງໝົດ 322 ຄົນ; ໃນນັ້ນ ມີ 1 ຕົວຢ່າງຈາກບຸກຄົນທົ່ວໄປທີ່ມີອາການ, 21 ຕົວຢ່າງຈາກບຸກຄົນທົ່ວໄປທີ່ບໍ່ມີອາການ, ແຮງງານລາວກັບມາແຕ່ໄທ 72 ຕົວຢ່າງ,ແຮງງານຈີນ 200 ຕົວຢ່າງ,ແຮງງານຫວຽດນາມ 26 ຕົວຢ່າງ, ຜູ້ຕິດເຊື້ອນ້ຳເບີ 29 ແລະ 41 ມາກວດຄືນ 2 ຕົວຢ່າງຜົນກວດວິເຄາະທັງໝົດ ແມ່ນບໍ່ພົບເຊື້ອ, ໝາຍຄວາມວ່າ ວັນທີ 27 ທັນວາ 2020 ບໍ່ພົບຜູ້ຕິດເຊື້ອໃໝ່. ສຳລັບຜູ້ຕິດເຊື້ອນ້ຳເບີ 29 ແລະ 41 ຜົນກວດແມ່ນບໍ່ພົບເຊື້ອ ຕິດຕໍ່ກັນ 2 ຄັ້ງ ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 27 ທັນວາ 2020 ໄດ້ເກັບຕົວຢ່າງມາກວດທັງໝົດ 90.556 ຕົວຢ່າງ, ກວດພົບເຊື້ອສະສົມ 41 ຄົນ.

ມື້ນີ້ ແມ່ນມີຄົນເຈັບອອກໂຮງໝໍ ຈຳນວນ 2 ຄົນ (ນໍ້າເບີ 29 ແລະ ນໍ້າເບີ 41) ເນື່ອງຈາກຜົນກວດ ບໍ່ພົບເຊື້ອຕິດຕໍ່ກັນ 2 ຄັ້ງ. ເຮັດໃຫ້ຍັງມີຄົນເຈັບຕິດເຊື້ອພະຍາດໂຄວິດ-19 ທີ່ຍັງສືບຕໍ່ນອນປິ່ນປົວຢູ່ໂຮງໝໍທີ່ຖືກກຳນົດໄວ້ ຈຳນວນ 1 ກໍລະນີ ເຊິ່ງຄົນເຈັບແມ່ນມີອາການເບົາບາງ, ບໍ່ມີອາການສົນຫຍັງ. ສະພາບການລະບາດຂອງພະຍາດໂຄວິດ-19 ຂອງບັນດາປະເທດໃກ້ຄຽງ ແລະ ໃນໂລກ ຮອດວັນທີ 28 ທັນວາ 2020 ທົ່ວໂລກມີການລາຍງານການລະບາດ ທັງໝົດ 218 (ປະເທດ/ເຂດ) ເຊິ່ງມີການຢັ້ງຢືນຜູ້ຕິດເຊື້ອພະຍາດໂຄວິດ-19 ແມ່ນ 81.113.255 ຄົນ, ເສຍຊີວິດ 1.771.225 ຄົນ ເຊິ່ງກວມເອົາ 2,18% ຂອງຜູ້ຕິດເຊື້ອທັງໝົດ; ປິ່ນປົວຫາຍດີ 57.264.840 ຄົນ ເຊິ່ງກວມເອົາ 70,5% ຂອງຜູ້ຕິດເຊື້ອທັງໝົດ.

No photo description available.

ປະເທດທີ່ມີການລາຍງານການຕິດເຊື້ອ ແລະ ເສຍຊີວິດຫຼາຍກວ່າໝູ່ ແມ່ນ ສະຫະລັດອາເມຣິກາ ເຊິ່ງມີຜູ້ຕິດເຊື້ອສະສົມ 19.558.302 ຄົນ ແລະ ເສຍຊີວິດສະສົມ 341.007 ຄົນ; ຂົງເຂດອາຊີ ກໍແມ່ນປະເທດ ອິນເດຍ ທີ່ມີທ່າອ່ຽງ ໃນການຕິດເຊື້ອໂຄວິດ-19 ເພີ່ມຂຶ້ນ ມີຜູ້ຕິດເຊື້ອສະສົມ 10.208.725 ຄົນ ແລະ ຜູ້ຕິດເຊື້ອມື້ດຽວສູງເຖິງ 20.333 ຄົນ; ໃນບັນດາກຸ່ມປະເທດອາຊຽນ ມາຮອດວັນທີ 28 ທັນວາ 2020 ມີການຢັ້ງຢືນ ຜູ້ຕິດເຊື້ອພະຍາດໂຄວິດ-19 ແມ່ນ 1.476.878 ຄົນ ແລະ ເສຍຊີວິດ 33.526 ຄົນ.

ດັ່ງນັ້ນ ຈິ່ງຂໍຮຽກຮ້ອງໃຫ້ພໍ່ແມ່ປະຊາຊົນລາວ ຈົ່ງມີສະຕິ ເປັນເປັນເຈົ້າການຕົນເອງໃນການປ້ອງກັນ ເພື່ອສະກັດກັ້ນ ການລະບາດບໍ່ໃຫ້ຂະຫຍາຍເປັນວົງກວ້າງ ໃນ ສປປ ລາວ. ໃຫ້ສືບຕໍ່ປະຕິບັດມາດຕະການປ້ອງກັນການຕິດເຊື້ອ ຢ່າງເຄັ່ງຄັດ ແລະ ເປັນປະຈຳ ເປັນຕົ້ນ ແມ່ນ ໃສ່ຜ້າອັດປາກ-ດັງ, ໝັ່ນລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວລ້າງມື, ຮັກສາໄລຍະຫ່າງ 1-2 ແມັດຂຶ້ນໄປ, ຫຼີກລຽງການເດີນທາງໄປຍັງສະຖານທີ່ແອອັດ, ບໍ່ໃຊ້ເຄື່ອງຮ່ວມກັນ ເພື່ອຫຼຸດຜ່ອນໂອກາດໃນການແຜ່ເຊື້ອ ແລະ ໃຫ້ໝັ່ນສັງເກດອາການຂອງຕົນເອງ ຫາກມີອາການຫາຍໃຈຝືດ, ດັງບໍ່ໄດ້ກິ່ນ, ລິ້ນບໍ່ໄດ້ລົດຊາດ ໃຫ້ທ່ານໄປພົບແພດທັນທີ ເພື່ອທຳການເກັບຕົວຢ່າງກວດຊອກຫາເຊື້ອ.

LEAVE A REPLY

Please enter your comment!
Please enter your name here