ເກີດເຫດໄຟຟ້າລັດວົງຈອນ ທີ່ວັດສາມັກຄີໄຊ ເຜົ່າສຳພັນໄຊຍະຣາມ ເມືອງຕຸ້ມລານ ແຂວງສາລະວັນ.

ໃນເວລາປະມານ 23:30 ນາທີ ຂອງວັນທີ 24 ທັນວາ 2020, ທີ່ວັດສາມັກໄຊ ເຜົ່າສໍາພັນໄຊຍະຮາມ ເມືອງຕຸ້ມລານ ໄດ້ເກີດເຫດໄຟຟ້າລັດວົງຈອນ, ເຊິ່ງໄດ້ສ້າງຄວາມເສຍຫາຍທາງດ້ານຊັບສິນ ແລະ ເຄື່ອງສັກກາລະບູຊາເປັນຈຳນວນຫຼວງຫຼາຍ, ຜ່ານການເກັບກຳຂໍ້ມູນໃນເບື້ອງຕົ້ນຄວາມເສຍຫາຍໃຫ້ຮູ້ວ່າ:

ມີກຸດຕິ ຈຳນວນ 1 ຫຼັງ, ພຣະພຸດທະຮູບທັງໝົດ 21 ອົງ, ໃນນັ້ນ ພຣະພຸດທະຮູບທອງ ຈຳນວນ 6 ອົງ, ພຣະພຸດທະຮູບປູນ ຈໍານວນ 6 ອົງ, ພຣະພຸດທະຮູບໄມ້ຂະຍຸງ ຈໍານວນ 5 ອົງ, ພຣະພຸດທະ ຮູບເຜີ້ງ ຈໍານວນ 2 ອົງ ແລະ ພຣະພຸດທະຮູບຫີນ ຈຳ ນວນ 2 ອົງ, ນອກຈາກນັ້ນຍັງມີໜັງສືໃບລານ, ຄອມພິວເຕີ, ກ້ອງຖ່າຍຮູບ, ປິ່ນເຕີ, ເຄື່ອງອັດເເຂງ, ປະກາສະນີຍະ ບັດ ແລະ ເຄື່ອງກອງບຸນຕ່າງໆ, ສ່ວນລາຍລະອຽດຊັບສິ້ນ ແລະ ມູນຄ່າຄວາມເສຍຫາຍແມ່ນຈະລາຍງານໃຫ້ຊາບພາຍຫຼັງ.

ມາຮອດຕອນບ່າຍຂອງວັນທີ 25 ທັນວາ 2020 ທ່ານ ຄຳຕາ ໂຮ່ຊົງເລືອງ ຄະນະປະຈຳພັກແຂວງ ປະທານແນວລາວສ້າງຊາດ ແຂວງສາລະວັນ ພ້ອມດ້ວຍທີມງານໄດ້ນຳເອົາເຄື່ອງບັນເທົາທຸກໃນຂັ້ນເບື້ອງຕົ້ນຈຳນວນໜຶ່ງມາມອບໃຫ້ທາງວັດສາມັກຄີໄຊເຜົ່າສຳພັນໄຊຍະຣາມ ເຊິ່ງປະກອບມີ: ຜ້າຫົ່ມ ຈຳນວນ 10 ຜືນ, ໝອນ ຈຳນວນ 13 ໜ່ວຍ, ຖັງດຳ 3 ໜ່ວຍ ແລະ ຜ້າຈີວອນ ຈຳນວນ 1 ສອບ, ລວມມູນຄ່າທັງໝົດ 3.200.000 ກີບ.

ສຳລັບບຸນຄົນ, ນິຕິບຸກຄົນ, ຫ່າງຮ້ານ ແລະ ບໍລິສັດຕ່າງໆ ທີມີຈິດໃຈໃສສັດທາຢາກປະກອບສ່ວນຊ່ວຍເຫຼື່ອທາງວັດສາມັກຄີໄຊ ເຜົ່າສຳພັນໄຊຍະຣາມ, ສາມາດຕິດຕໍ່ຫາ ພຣະອາຈານ ບົວພາ ເຕສະສັງໂຄ ເຈົ້າອະທິການວັດສາມັກຄີໄຊ ເຜົ່າສຳພັນໄຊຍະຣາມ, ໂດຍກົງໄດ້ທີເບີ: 02098999602.

ພາບ-ຂ່າວ ໂດຍ: ວຽງສະຫວັນ ແສນຄຳ

LEAVE A REPLY

Please enter your comment!
Please enter your name here