Saturday, January 29, 2022

ປະກາດເມືອງແກ່ນທ້າວ ເປັນເມືອງຢຸດຕິການຖ່າຍຊະຊາຍ

ພິທີ ປະກາດເມືອງແກ່ນທ້າວ ແຂວງໄຊຍະບູລີ ເປັນເມືອງຢຸດຕິການຖ່າຍຊະຊາຍ ໄດ້ຈັດຂຶ້ນໃນວັນທີ 11 ທັນວາ 2020 ຜ່ານມາ ໂດຍການເປັນກຽດເຂົ້າຮ່ວມຂອງ ທ່ານ ດຣ ນາງ ໄກຍະສອນ ສີດາ ຫົວໜ້າພະແນກສາທາລະນະສຸກແຂວງໄຊຍະບູລີ, ທ່ານ ອໍາຄາ ລັດສະໝີ ເຈົ້າເມືອງແກ່ນທ້າວ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ຄໍາປຸ່ນ ນວນສະບັບ ຮອງເຈົ້າເມືອງແກ່ນທ້າວ, ຜູ້ຊີ້ນໍາຂົງເຂດວັດທະນະທໍາ-ສັງຄົມໄດ້ລາຍງານວ່າ: ເມືອງແກ່ນທ້າວ ຕັ້ງຢູ່ຫ່າງຈາກເທສະບານແຂວງ ປະມານ 208 ກິໂລແມັດ, ມີ 47 ບ້ານ, 8.600 ກວ່າຄອບຄົວ, ມີພົນລະເມືອງທັງໝົດ 42.800 ກວ່າຄົນ, ຍິງ 20.700 ກວ່າຄົນ, ຄວາມໜ້າແໜ້ນຂອງປະຊາກອນ 31 ຄົນ/ກິໂລຕາແມັດ, ມີນໍ້າລິນ 6 ແຫ່ງ, ນໍ້າບາດານ 1.500 ກວ່າບໍ່, ນໍ້າສ້າງ 3.800 ກວ່າແຫ່ງ, ວິດຖ່າຍຄອບຄົວ 8.600 ກວ່າໜ່ວຍ.

ຜ່ານການປະເມີນບ້ານຢຸດຕິການຖ່າຍຊະຊາຍ ສາມາດປະກາດຮັບຮອງເປັນ ບ້ານຢຸດຕິການຖ່າຍຊະຊາຍ 47 ບ້ານ ເທົ່າກັບ 100%, ຄອບຄົວຢຸດຕິການຖ່າຍຊະຊາຍ 8.600 ກວ່າຄອບຄົວ ເທົ່າກັບ 99,60% ແລະ ຜ່ານການປະເມີນເມືອງຢຸດຕິຖ່າຍຊະຊາຍ ຕາມ 3 ມາດຖານ ປະຕິບັດໄດ້ 96.67%.

ໃນໂອກາດ ມອບໃບຢັ້ງຢືນເມືອງແກ່ນທ້າວ ຢຸດຕິການຖ່າຍຊະຊາຍ ນີ້, ທ່ານ ດຣ ນາງ ໄກຍະສອນ ສີດາ ກໍໄດ້ຮຽກຮ້ອງມາຍັງທຸກພາກສ່ວນ, ຂະແໜງການທີ່ກ່ຽວຂ້ອງ ແລະ ພໍ່ແມ່ປະຊາຊົນພາຍໃນເມືອງແກ່ນທ້າວ ຕ້ອງອອກແຮງຮັກສາມູນເຊື້ອ ແລະ ນາມມະຍົດ ເລີ່ມຈາກ ຄອບຄົວຢຸດຕິການຖ່າຍຊະຊາຍ, ບ້ານຢຸດຕິການຖ່າຍຊະຊາຍ ແລະ ເມືອງຢຸດຕິຖ່າຍການຊະຊາຍ.

- Advertisment -

Most Popular