ລາຍງານຈາກຄະນະສະເພາະກິດໃຫ້ຮູ້ວ່າ ມີຄົນຕິດເຊື້ອໂຄວິດ-19 ໃນ ສປປລາວ ເພີ່ມອີກ 2 ຄົນ.

ກໍລະນີຢັ້ງຢືນທີ 40 ເພດຊາຍ, ອາຍຸ 65 ປີ, ສັນຊາດ: ຣັດເຊຍ, ອາຊິບ: ນັກບິນ, ຈຳກັດບໍລິເວນຢູ່ໂຮງແຮມແຫ່ງໜຶ່ງ ທີ່ຄະນະສະເພາະກິດກຳນົດໄວ້ ໃນນະຄອນຫຼວງວຽງຈັນ;

ກໍລະນີຢັ້ງຢືນທີ 41 ເພດຍິງ, ອາຍຸ 19 ປີ, ສັນຊາດ: ລາວ, ອາຊີບ: ນັກສຶກສາ ຮຽນຢູ່ ສ ຣັດເຊຍ; ຈຳກັດບໍລິເວນຢູ່ສູນແຫ່ງໜື່ງທີ່ຄະນະສະເພາະກິດກຳນົດໄວ້ ໃນນະຄອນຫຼວງວຽງຈັນ, ບໍ່ມີອາການສະແດງອອກ

ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ຄະນະສະເພາະກິດຄວບຄຸມໂຄວິດ19 ຖະແຫລງຕອນເຊົ້າວັນທີ 7 ທັນວາ 2020 ເຖິງວຽກງານກວດວິເຄາະຫາເຊື້ອວ່າ: ວັນທີ 6 ທັນວາ ໄດ້ເກັບຕົວຢ່າງມາກວດວິເຄາະຫາເຊື້ອທັງໝົດ 314ຄົນ,ໃນນັ້ນມີ 1 ຕົວຢ່າງຈາກບຸກຄົນທົ່ວໄປມີອາການ; 128 ຕົວຢ່າງຈາກບຸກຄົນທົ່ວໄປບໍ່ມີອາການ; 6 ຕົວຢ່າງຈາກແຮງງານລາວມາແຕ່ໄທ; ແຮງງານຈີນ148 ຕົວຢ່າງ; ແຮງງານໄທ 26 ຕົວຢ່າງ; ແຮງງານລາວມາແຕ່ມຽນມ້າ 2 ຕົວຢ່າງ; ຜູ້ຕິດເຊື້ອກໍລະນີທີ 28, 30 ແລະ 31 ມາກວດຄືນ

ຜົນກວດວິເຄາະທັງໝົດແມ່ນພົບຜູ້ຕິດເຊື້ອໃໝ່ ຈຳນວນ 2 ກໍລະນີ ຄື ກໍລະນີທໍາອິດ ຫລືກໍລະນີທີ 40 ເປັນຄົນສັນຊາດຣັດເຊຍ, ອາຍຸ 65 ປີ, ອາຊີບນັກບິນ, ຊື້ອສັນຊາດຣັດເຊຍ, ກ່ອນເດີນທາງເຂົ້າມາ ສປປ ລາວ ໄດ້ກວດຫາເຊື້ອໂຄວິດ-19 ຢູ່ປະເທດອິນໂດເນເຊຍໃນວັນທີ 2 ທັນວາ ແຕ່ບໍ່ພົບເຊື້ອ, ວັນທີ 5 ທັນວາ ເດີນທາງ ຈາກປະເທດມາເລເຊຍ ຜ່ານປະເທດໄທ ແລະມາຮອດປະເທດລາວ ຖືກເກັບຕົວຢ່າງທີ່ສະໜາມບິນສາກົນວັດໄຕ ພ້ອມຈຳກັດບໍລິເວນທີ່ໂຮງແຮມແຫ່ງໜຶຶ່ງໃນນະຄອນຫຼວງວຽງຈັນ ທີ່ຄະນະສະເພາະກິດກຳນົດໄວ້. ວັນທີ 6 ທັນວາ ຜູ້ກ່ຽວມີອາການເຈັບຄໍ ແລະໜາວສັ່ນ ແຕ່ບໍ່ມີອາການໄຂ້ ສຸດທ້າຍຜົນກວດຢັ້ງຢືນວ່າຕິດເຊື້ອໂຄວິດ-19 ມີຜູ້ໃກ້ຊິດທັງໝົດ 20 ຄົນ ສ່ວນໃຫຍ່ແມ່ນນັກບິນ ແລະນາຍຊ່າງ.

ກໍລະນີທີສອງ ແມ່ນສັນຊາດລາວ, ອາຍຸ 19 ປີ, ອາຊີບນັກສຶກສາ (ຮຽນຢູ່ປະເທດຣັດເຊຍ), ກ່ອນເດີນທາງມາ ສປປ ລາວ ໃນວັນທີ 23 ພະຈິກ 2020 ໄດ້ກວດໂຄວິດ-19 ດ້ວຍ RT-PCR ຢູ່ປະເທດຣັດເຊຍ ແຕ່ບໍ່ພົບ. ວັນທີ 28 ພະຈິກ ເດີນທາງຈາກສະໜາມບິນຂອງປະເທດລັດເຊຍ Moscow (Domodeovo) ໂດຍຖ້ຽວບິນພິເສດ ABG 9985/9986 ມາຮອດສະໜາມບິນສາກົນວັດໄຕ ພ້ອມຖືກກັກບໍລິເວນ ແລະກວດຫາເຊື້ອໂຄວິດ-19 ແຕ່ບໍ່ພົບ, ຫຼັງຈາກນັ້ນໄດ້ກວດຫາເຊື້ອອີກເປັນຄັ້ງທີ 2, ຮອດວັນທີ 6 ທັນວາ ຜົນກວດອອກມາພົບວ່າຕິດເຊື້ອໂຄວິດ-19 ມີຜູ້ໃກ້ຊິດ 1 ຄົນ ຄືເພື່ອນຮ່ວມຫ້ອງນອນທີ່ກັກບໍລິເວນດ້ວຍກັນ, ເຫຼືອນັ້ນແມ່ນຄົນທີ່ເດີນທາງດ້ວຍຍົນຮ່ວມກັນມີ 79 ຄົນ ແລະເດີນທາງດ້ວຍລົດເມຂົນ-ສົ່ງຜູ້ໂດຍສານທີ່ຈໍາກັດບໍລິເວນ 27 ຄົນ.

ຜູ້ໃກ້ຊິດທັງໝົດຂອງຜູ້ຕິດເຊື້ອໃໝ່ທັງ 2 ຄົນກໍ່ໄດ້ຖືກກວດຫາເຊື້ອໂຄວິດ-19 ແຕ່ບໍ່ພົບເຊື້ອ ແລະໄດ້ຖືກຈໍາກັດບໍລິເວນຕໍ່ໄປ. ປະຈຸບັນຜູ້ຕິດເຊື້ອໃໝ່ທັງ 2 ຄົນ ໄດ້ນໍາສົ່ງໄປປິ່ນປົວຢູ່ທີ່ໂຮງໝໍມິດຕະພາບ. ປະຈຸບັນ ສປປ ລາວ ມີຜູ້ຕິດເຊື້ອໂຄວິດ-19 ສະສົມທັງໝົດ 41 ຄົນ, ພວມປິ່ນປົວຢູ່ໂຮງໝໍມິຕະພາບ 15 ຄົນ, ປົວດີແລ້ວ 26 ຄົນ ແຕ່ບໍ່ມີຜູ້ເສຍຊີວິດ.

LEAVE A REPLY

Please enter your comment!
Please enter your name here