ສະຫວັນນະເຂດ: ຈາກເຫດການລົດຂົນຫີນກາວ ທີ່ ລັກລອບຂົນກະໂພກ ລະເບີດໃນເຊົ້າວັນທີ່ 3 ທັນວາ 2020 ສົ່ງຜົນໃຫ້ມີຜູ່ເສຍຊີວິດ 3 (ຍິງ 1) ເຈັບໜັກ 8 ຄົນ (ຍິງ 1). ເຊິ່ງຜູ່ເຈັບສາຫັດເພດຍິງ ແມ່ນ ແມ່ເຫວີຍ ທີ່ເປັນ ພະນັກງານ ຂອງ ຮສສ ແຂວງສະຫວັນນະເຂດ ທີ່ໄດ້ຮັບມອບໝາຍໄປຮັບ ເຂົ້າສານບໍລິຈາກ ຈາກ ສສ ຫວຽດນາມ ເພື່ອໄປຊ່ວຍຜູ້ປະສົບໄພນໍ້າຖ້ວມ.

ລູກສາວຜູ້ໃຊ້ເຟສບຸກ Vivie Kky ໄດ້ແຈ້ງສະພາບ ແລະ ເລົ່າເລື່ອງລາວ ທີ່ແມ່ເຫວີຍ ຕອນເອົາຊີວິດບອດຈາກແປວໄຟວ່າ.

“ມີຫລາຍຄົນຍັງບໍ່ຮູ້ວ່າເກີດຫຍັງຂື້ນກັບແມ່ເຫວີຍ?
ຂ້າພະເຈົ້າໃນນາມລູກສາວ ແລະ ໄດ້ຮັບຟັງເຫດການທີ່ແມ່ລົມໃຫ້ຟັງ, ວ່າເກີດຫຍັງຂື້ນກັບລາວ?”

ໃນວັນທີ 03/12/2020 ແມ່ເຫວີຍ (ປະຈຸບັນ ລາວເຮັດວຽກຢູ່ພະແນກແຮງງານແລະສະຫວັດດີການສັງຄົມ ແຂວງສະຫວັນນະເຂດ) ໄດ້ຮັບການມອບໝາຍຈາກຂັ້ນເທິງ ໃຫ້ລົງຕິດຕາມກວດກາ ຈຳນວນເຂົ້າ ທີ່ລັດຖະບານຫວຽດນາມ ໄດ້ສົ່ງມາຊ່ວຍເຫລືອ ລາວ ທີ່ດ່ານພາສີ ເຂດຊາຍແດນລາວ-ຫວຽດ, ຊຶ່ງມື້ນັ້ນລາວໄດ້ລົງກວດນັບຈຳນວນເຂົ້າຕົວຈິງ ເພື່ອຈະກະກຽມ ຈະເອົາເຂົ້າດັ່ງກ່າວ ໄປແຈກຈ່າຍຊ່ວຍເຫລືອ ປະຊາຊົນໃນແຕ່ລະເມືອງ,

ໃນຕອນເຊົ້າມື້ນັ້ນ ເມື່ອໄປຮອດສ່າງບ່ອນເກັບສິນຄ້າພາສີ, ລາວໄດ້ໄປ ຖາມເຈົ້າຫນ້າທີ່ ພາສີ ທີ່ຢູ່ບໍລິເວນນັ້ນວ່າ ລົດຂົນເຂົ້າຊ່ວຍເຫຼືອຈາກຫວຽດ ມາແລ້ວບໍ່? ຊຶ່ງພ້ອມທັງແນມໄປ ເບິ່ງເຈົ້າຫນ້າທີ່ພາສີ 2 ຄົນ ທີ່ກຳລັງກວດລົດ ຂົນຫີນກາວ ໂດຍການໃຊ້ເຫຼັກແຫຼມ ຊຸມແທງລົງໄປໃນ ລົດຄັນດັ່ງກ່າວ. (ໂດຍທີ່ບໍ່ຮູ້ວ່າ ເຂົາໄດ້ລັກຫຼອກເອົາດອກໄມ້ໄຟ, ວັດຖຸອະນຸພາບຄ້າຍຄືລະເບີດ ລີ້ຊ້ອນໄວ້ໃນລົດຄັນນັ້ນ ດ້ວຍການເອົາຫີນກາວເຕັ່ງໄວ້ທາງເທິງ ເພື່ອລົບຕາເຈົ້າຫນ້າທີ່ )

ພາຍຫລັງທີ່ ເຈົ້າຫນ້າທີ່ໃຊ້ເຫຼັກແທງລົງໄປ ແມ່ກໍ່ປະກົດເຫັນຄວັດສີດຳປິວອອກມາຫນ່ອຍຫນຶ່ງ, ຫລັງຈາກນັ້ນ ບໍ່ຮອດສາມວິນາທີ ກໍ່ເກີດລະເບີດຂື້ນ ຢ່າງຮຸນແຮງ (ດັ່ງທີ່ປະກົດໃນຄຣິບ).

ຕອນນັ້ນ ແມ່ເຫວີຍ ຢູ່ບໍລິວານນັ້ນພໍດີ ຈຶ່ງໄດ້ຮັບ ຜົນກະທົບຈາກແຮງລະເບີດ ແລະ ສະເກັດໄຟຕ່າງໆ ຈຶ່ງເຮັດໃຫ້ບາດເຈັບຫນັກ ຢູ່ບໍລິວານຂາຂວາ, ຕາມຂາ, ແຂນ, ໃບຫນ້າ ແມ່ນໄດ້ຮັບຜົນກະທົບຈາກສະເກັດດັ່ງກ່າວ. ແມ່ເລົ່າວ່າ ສຽງດັ່ງແຮງ, ແນມໄປມີແຮ່ຄວັວດຳເຕັມໄປຫມົດ ແນມໄປເກືອບບໍ່ເຫັນຫຍັງ ຮູ້ສຶກຮ້ອນຕາມໂຕ ເສື້ອຜ້າຂາດເປັນປ່ອງ ໄຟກະໄຫມຜົນ ຈົນໄດ້ເອົາເສື່ອແຂນຍາວ ມາຄຸ້ມຫົວໄວ້ເພື່ອປ້ອງກັນບໍ່ໃຫ້ໄຫມຕື່ມ ຍ້ອນຖືກສະເກັດໄຟ ຂາກະເຈັບ ແຕ່ໃນເວລານັ້ນ ເພິ່ນມີສະຕິດີພໍສົມຄວນ ຄິດຢ່າງດຽວ ວ່າຕ້ອງລອດອອກໄປໃຫ້ໄດ້ (ລູກເຕົ້າ ຄອບຄົວ ເອື້ອຍນ້ອງຖ້າຢູ່) ຈຶ່ງໄດ້ຕັ້ງໃຈ ເອົາໂຕເອງອອກມາ ທັງທີ່ໂຕເອງກະເຈັບຫລາຍ ແລ້ວຂໍຄວາມຊ່ວຍ.

(ມາຟັງແມ່ເລົ່າລາຍລະອຽດຫລາຍຢ່າງ ໃນໃຈຂ້ອຍຄິດຫລາຍຢ່າງພັນແນວ ໄດ້ແຕ່ຈົ່ມກັບໂຕເອງວ່າ ເປັນຫຍັງ ເປັນຫຍັງມັນ ຕ້ອງມາເກີດກັບແມ່ຂ້ອຍ ທັງໆ ທີ່ລາວເຮັດດີ ມາຕະຫລອດ ຊ່ວຍເຫຼືອຄົນມາຕະຫລອດ ອອກໄປເອົາເຄື່ອງມາຊ່ວຍຄົນແທ້ໆ ເປັນຫຍັງຄືເກີດເລື່ອງແບບນີ້ ຂື້ນກັບແມ່ເຮົາ

ຫລາຍຄຳຖາມໃນຫົວ ທັງຄວາມກັງວົນວ່າແມ່ຈະເປັນແນວໃດ? ໃນຊີວິດນີ້ ບໍ່ເຄີຍຮູ້ສຶກທໍ່ລະມານແລະ ເຈັບປວດຈິດໃຈ ອີ່ຫຍັງຫລາຍເທົ່ານີ້ ແຮງເຫັນແຮງອີ່ຕົນແມ່ ທີ່ເຫັນແມ່ຕ້ອງເຈັບເປັນຂະຫນາດນີ້ ແຮງເຫັນ ນ້ຳຕາກະຈັກມາແຕ່ໃສ່ ແຕ່ກໍ່ຕ້ອງອົດເອົາ ຍ້ອນຄຳວ່າ ເຂັ້ມແຂງເດີ ໂຕເປັນເອື້ອຍ ເຂັ້ມແຂງເດີ ເບິ່ງແມ່ເດີ)

ປະຈຸບັນແມ່ເຫວີຍ ແມ່ນຮັກສາຕົວທີ່ໂຮງໝໍ 150 ຕຽງ ນະຄອນຫຼວງວຽງຈັນ.

ຂໍເປັນກໍາລັງໃຈ ແລະ ອວຍພອນໃຫ້ແມ່ເຫວີຍຈົ່ງປອດໄພ ແລະ ແຂງແຮງໄວໆ.

LEAVE A REPLY

Please enter your comment!
Please enter your name here