ໃນວັນທີ 30 ພະຈິກ 2020 ທີ່ຜ່ານມາ, ທີ່ ກະຊວງສາທາລະນະສຸກ ທ່ານ ດຣ.ນາງ ລັດສະໝີ ວົງຄຳຊາວ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະ ເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ COVID-19 ໄດ້ລາຍງານໃຫ້ຮູ້ວ່າ: ການເຝົ້າລະວັງຮອດ 5 ໂມງແລງຂອງວັນທີ 29 ພະຈິກ 2020, ໄດ້ເກັບຕົວຢ່າງມາກວດວິເຄາະທັງໝົດ 445 ຄົນ, ໃນນັ້ນ ມີ 76 ຕົວຢ່າງ ຈາກບຸກຄົນທົ່ວໄປບໍ່ມີອາການ, 14 ຕົວຢ່າງແຮງງານລາວ ມາແຕ່ໄທ, 290 ຕົວຢ່າງແຮງງານຈີນ, 49 ຕົວຢ່າງ ແຮງງານຫວຽດນາມ, 14 ຕົວ ຢ່າງແຮງງານໄທ, 02 ຕົວຢ່າງ ຈາກຜູ້ຕິດເຊື້ອນໍ້າເບີ 25 ແລະ 28 ທີ່ມາກວດຄືນ, ຜົນກວດວິເຄາະທັງໝົດແມ່ນບໍ່ພົບເຊື້ອ.

ປະຈຸບັນ ທົ່ວປະເທດສູນຈໍາກັດບໍລິເວນທີ່ຍັງເປີດຢູ່ ມີທັງໝົດ 38 ສູນ, ມີຜູ້ຖືກຈຳກັດບໍລິເວນຢູ່ສູນ 2.465 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ພົບຜູ້ຕິດເຊື້ອ. ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 29 ພະຈິກ 2020 ໄດ້ເກັບຕົວຢ່າງມາກວດທັງໝົດ 79.000 ຕົວຢ່າງກວດພົບເຊື້ອສະສົມ 39 ຄົນ. ປະຈຸບັນ, ຜູ້ຕິດເຊື້ອນ້ຳເບີ 25 ແລະ 26 ຜົນກວດແມ່ນບໍ່ພົບເຊື້ອຕິດຕໍ່ກັນ 02 ຄັ້ງ. ສະນັ້ນ, ມື້ນີ້ພວກກ່ຽວຈະໄດ້ອອກໂຮງໝໍ ແລະ ໄປສືບຕໍ່ຕິດຕາມອາການຢູ່ເຮືອນຂອງຕົນຈົນຄົບ 14 ວັນ, ພ້ອມທັງປະຕິບັດ ວິຖີການດຳລົງຊີວິດປົກກະຕິແບບໃໝ່. ສຳລັບຄົນເຈັບຕິດເຊື້ອພະຍາດ COVID-19 ນ້ຳເບີ 27 ຫາ ນ້ຳເບີ 39 ແມ່ນສືບຕໍ່ນອນປິ່ນປົວ ຢູ່ໂຮງໝໍມິດຕະພາບ, ທຸກຄົນແມ່ນມີອາການເບົາບາງ.

ທ່ານ ດຣ.ນາງ ລັດສະໝີ ວົງຄຳຊາວ ກ່າວຕື່ມວ່າ: ຕໍ່ກັບສະພາບການດັ່ງກ່າວ ຈຶ່ງຮຽກຮ້ອງມານຳພໍ່ແມ່ປະຊາຊົນບັນດາເຜົ່າ, ທຸກພາກສ່ວນໃນສັງຄົມ ຮ່ວມແຮງຮ່ວມໃຈກັນ ສືບຕໍ່ເປັນເຈົ້າການ ເອົາໃຈໃສ່ປະຕິບັດ ຕາມແຈ້ງການຂອງຫ້ອງວ່າການ ສຳນັກງານນາຍົກລັດຖະມົນຕີ ວາງອອກ, ພ້ອມທັງຄຳແນະນຳຂອງຂະແໜງການກ່ຽວຂ້ອງຢ່າງເຄັ່ງຄັດ, ສືບຕໍ່ປະຕິບັດມາດຕະການປ້ອງກັນການຕິດ ເຊື້ອຢ່າງຖືກຕ້ອງ ແລະ ເຂັ້ມງວດ, ບໍ່ຄວນປະໝາດ ຫລື ປະລະຕໍ່ມາດຕະການຕ່າງໆ ທີ່ຄະນະສະ ເພາະກິດວາງອອກ, ຫລີກລ້ຽງການເດີນທາງໄປຍັງສະຖານທີ່ ທີ່ມີຄວາມສ່ຽງໃນການຕິດເຊື້ອ, ສືບຕໍ່ປະຕິບັດການດຳລົງຊີວິດປົກກະຕິແບບໃໝ່ ແລະ ຈຳກັດບໍລິເວນຕົນເອງຈົນຄົບ 14 ວັນ ເມື່ອທ່ານເດີນທາງເຂົ້າມາ ສປປ ລາວ. ການປະຕິບັດທັງໝົດນີ້, ກໍ່ແມ່ນເພື່ອຈຳກັດການລະບາດຂອງພະຍາດດັ່ງກ່າວ ໃນປະເທດເຮົາ ບໍ່ໃຫ້ແຜ່ຂະຫຍາຍເປັນວົງກວ້າງ, ຂໍໃຫ້ບັນດາທ່ານຕິດຕາມຂ່າວ ຈາກພາກປົກກະຕິຂອງໂທລະພາບ, ວິທະຍຸກະຈາຍສຽງ, ໜັງສືພິມ ແລະ ສື່ຕ່າງໆ. ລາຍລະອຽດຂອງຄຳແນະ ນຳ, ຂໍ້ມູນທີ່ເປັນທາງການ, ທ່ານຍັງສາມາດຕິດຕາມໄດ້ຈາກເວັບໄຊ www.covid19.gov.la ແລະ ເຟດບຸກຂອງສູນສື່ສານເພື່ອສຸຂະພາບ ແລະ ສຸຂະສຶກສາ.

ຂໍ້ມູນ: ຂ່າວສານປະເທດລາວ

LEAVE A REPLY

Please enter your comment!
Please enter your name here