Thursday, January 27, 2022

ຮັບໂທດ 12 ປີ ພ້ອມປັບໃໝ 180 ລ້ານ

ອາທິດຜ່ານມາ, ນາງ ວ່າງມົ້ວ ອາຍຸ 34 ປີຢູ່ບ້ານປາກຊາບ ເມືອງໄຊທານີ ນວ ຖືກຄະນະສານອາຍາ ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ພິຈາ ລະນາຕັດສິນ ລົງໂທດຕັດອິດສະຫຼະພາບ 12 ປີ ພ້ອມປັບໃໝ 180 ລ້ານກີບ ໃນສະຖານການຄ້າ ຂາຍຢາເສບຕິດ ປະເພດຢາບ້າ,ມີຂອງກາງ 2.000 ເມັດ.

ອົງການໄອຍະການປະຊາຊົນ ນະຄອນຫຼວງວຽງຈັນ ຖະແຫຼງເນື້ອໃນຄະດີໃຫ້ຮູ້ວ່າ: ນາງ ວ່າງມົ້ວ ໄດ້ເລີ່ມຄ້າຂາຍຢາເສບຕິດ (ຢາບ້າ) ມາ ແຕ່ໄລຍະເດືອນມັງກອນ 2020 ເປັນຕົ້ນມາ, ຢາບ້າທີ່ນໍາມາຂາຍແຕ່ລະຄັ້ງ ແມ່ນຊື້ນໍາ ທ້າວ ເພັດ ອາຍຸ 48 ປີ (ບໍ່ຮູ້ທີ່ຢູ່) ຈໍານວນຫຼາຍຄັ້ງໆລະ 1 ມັດ ເທົ່າ ກັບ 2.000 ເມັດ, ເມື່ອໄດ້ຢາບ້າແລ້ວ ກໍໄດ້ນໍາໄປຂາຍຕໍ່ໃຫ້ພວກມົ້ວສຸມເສບຢາ; ມາວັນທີ 6 ມີນາ 2020, ເວລາປະມານ 13:00 ໂມງ ຈຳເລີຍໄດ້ຂີ່ລົດຈັກໄປຊື້ຢາບ້ານໍາ ທ້າວ ເພັດ ຢູ່ແຖວສະໜາມກິລາ ຫຼັກ16 ຈໍານວນ 2.000 ເມັດ. ພາຍຫຼັງໄດ້ຢາບ້າແລ້ວ ກໍເອົາໄປຂາຍ, ໂດຍນັດສົ່ງຢາບ້າ ຢູ່ເຂດບ້ານດົງໝາກຄາຍ ແຕ່ຖືກເຈົ້າໜ້າທີ່ ປກສ ເມືອງໄຊທານີ ຕິດຕາມຈັບໄດ້ ພ້ອມຂອງກາງ 2.000 ເມັດ ແລະ ລົດຈັກ 1 ຄັນ ໄປດຳເນີນຄະດີ.

ຜ່ານການຄົ້ນຄວ້າບັນດາຂໍ້ມູນຫຼັກຖານ ແລະ ເອກະສານຕ່າງໆ ທີ່ມີຢູ່ໃນສໍານວນຄະດີຢ່າງລະ ອຽດຖີ່ຖ້ວນ, ຮອບດ້ານ ແລະ ພາວະ ວິໄສແລ້ວເຫັນວ່າ ມີຫຼັກຖານຮັດກຸມທີ່ໜັກແໜ້ນ ແລະ ພຽງພໍຢັ້ງຢືນ ວ່າ: ການກະທໍາຂອງ ນາງ ວ່າງມົ້ວ (ຈໍາເລີຍ) ເປັນການກະທໍາຜິດທາງ ອາຍາໃນຂໍ້ຫາ ການຄ້າຂາຍຢາເສບຕິດ (ຢາບ້າ) ເຊິ່ງແຕະຕ້ອງຕໍ່ສະຖຽນລະພາບທາງດ້ານເສດຖະກິດ ແລະ ເຮັດໃຫ້ສັງຄົມບໍ່ມີຄວາມສະຫງົບຕາມປະມວນກົດ ໝາຍອາຍາມາດຕາ 315; ການກະທໍາທັງໝົດທີ່ກ່າວມານີ້ ຈໍາເລີຍ ກໍໄດ້ໃຫ້ການຮັບສາລະພາບ ວ່າ: ໄດ້ເຄື່ອນໄຫວຄ້າຂາຍຢາເສບຕິດ (ຢາບ້າ) ແທ້ ຕາມຄໍາໃຫ້ການຮັບສາລະພາບຂອງຈໍາເລີຍ ສະບັບລົງວັນທີ 10 ມີນາ 2020, ວັນທີ 1 ເມສາ 2020 ແລະ ວັນທີ 6 ກໍລະກົດ 2020.

ສ່ວນເປົ້າໝາຍທີ່ຈໍາເລີຍ ໃຫ້ການຊັດທອດຄື: ທ້າວ ເພັດ ເຈົ້າໜ້າທີ່ກຳລັງເລັ່ງສືບຫາຕົວມາດຳ ເນີນຄະດີ. ສໍາລັບລົດຈັກຮອນດ້າເວບໄອ ໝາຍເລກທະບຽນ ດມ 8711 ກໍາແພງນະຄອນ ທີ່ເຈົ້າ ໜ້າທີ່ຢຶດໄດ້ນັ້ນ ແມ່ນບໍ່ມີສ່ວນພົວພັນກັບການຄ້າຂາຍຢາເສບຕິດຄັ້ງນີ້ ຈຶ່ງໄດ້ມອບຄືນໃຫ້ເຈົ້າຂອງລົດເດີມ ຕາມບົດບັນທຶກລົງວັນທີ 23 ມີນາ 2020.

- Advertisment -

Most Popular