ທ່ານພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດ ຄວບຄຸມໂຄວິດ19 ຖະແຫລງຕໍ່ສືມວນຊົນ ຕອນບ່າຍວັນທີ 27 ພະຈິກນີ້ວ່າ: ໄລຍຜ່ານມາຄະນະສະເພາະກິດຄວບຄຸມພະຍາດໂຄວິດ19 ແຕ່ລະຂັ້ນ ໄດ້ເອົາໃຈໃສ່ຕິດຕາມ, ຄຸ້ມຄອງ ການປະຕິບັດມາດຕະການຢູ່ສູນຈໍາກັດບໍລິເວນຂອງລັດ, ໂຮງແຮມ ໃຫ້ປະຕິບັດຢ່າງຖືກຕ້ອງ ແລະເຂັ້ມງວດຕາມມາດຕະການທີ່ໄດ້ວາງອອກ ເປັນຕົ້ນແມ່ນບໍ່ໃຫ້ອອກໄປຂ້າງນອກ , ບໍ່ໃຫ້ຄົນພາຍນອກມາພົບ ທັງຈໍາກັດບໍລິເວນໃຫ້ຄົບ 14 ວັນ, ເຊິ່ງຄົນເຈັບທີ່ຕິດເຊື້ອໃໝ່ຈໍານວນ 14ຄົນສຸດທ້າຍນີ້ ທາງຄະນະສະເພາະກິດ ໄດ້ປະຕິບັດມາດຕະການນີ້ໄດ້ ໂດຍບໍ່ໄດ້ແຜ່ເຊື້ອໃສ່ຜູ້ຄົນຢູ່ສູນຈໍາກັດບໍລິເວນນັ້ນ, ໂຮງແຮມນັ້ນ ຫລືຜູ້ໄປຮັບຕ້ອນແຕ່ຢ່າງໃດ.

ຕໍ່ກໍລະນີທີ່ມີຂ່າວລືວ່າ ມີຜູ້ຕິດເຊື້ອຢູ່ໃນໂຮງແຮມ, ມີຄົນທາງນອກໄປພົບ, ໄປໃຫ້ການບໍລິການຜູ້ຕິດເຊື້ອ ແລະເອົາເຊື້ອໄປແຜ່ຜາຍໃສ່ຊຸມຊົນ ແຕ່ຍັງຕິດຕາມຫາບໍ່ທັນໄດ້, ມີຜູ້ລັກລອບໜີອອກຈາກສູນກັກບໍລິເວນ ຫລືໂຮງແຮມກ່ອນກໍານົດ, ທ່ານພູທອນ ເມືອງປາກ ຖະແຫລງວ່າ:

“ຂ່າວລືນີ້ແມ່ນບໍ່ມີມູນຄວາມຈິງແຕ່ຢ່າງໃດ. ຄົນເຈັບທີ່ຕິດເຊື້ອສະສົມມີແຕ່ 39ຄົນ ແລະພວມປິ່ນປົວຢູ່ໂຮງໝໍມີ 15ຄົນເທົ່ານັ້ນ. ສະນັ້ນ, ຂໍໃຫ້ປະຊາຊົນຈົ່ງເຊື່ອໝັ້ນໃນມາດຕະການກວດກາຄົນເຂົ້າເມືອງ, ມາດຕະການໃນການຈໍາກັດບໍລິເວນ, ສິ່ງສໍາຄັນ ຄະນະສະເພາະກິດຂັ້ນສູນກາງ ລວມມີ 4 ຂະແໜງການ ເປັນຕົ້ນຂະແໜງການຂອງກະຊວງການຕ່າງປະເທດ, ກະຊວງໂຍທາທິການ ແລະຂົນສົ່ງ, ກະຊວງປ້ອງກັນຄວາມສະຫງົບ ແລະກະຊວງສາທາລະນະສຸກ ຕ້ອງໄດ້ຄົ້ນຄວ້າລະອຽດ, ຮັດກຸມໃນການກວດກາຢ່າງເຄັ່ງຄັດ ເພື່ອໂຈະການອອກວິຊາສໍາລັບຜູ້ເດີນທາງມາຈາກປະເທດທີ່ຍັງມີການລະບາດ ຂອງພະຍາດໂຄວິດ19 ຢູ່ໃນຊຸມຊົນ, ແລະໂຈະການອະນຸມັດຖ້ຽວບິນເຊົ່າເໝົາລໍາ ຈາກປະເທດທີ່ຍັງມີການລະບາດຂອງພະຍາດຢູ່ໃນຊຸມຊົນ, ຍົກເວັ້ນຖ້ຽວບິນມະນຸດສະທໍາ, ໃນນີ້ຕ້ອງໄດ້ກວດກາຢ່າງເຄັ່ງຄັດຕໍ່ຜູ້ໂດຍສານ, ເພື່ອບໍ່ໃຫ້ຜູ້ໂດຍສານຈາກປະເທດທີ່ຍັງມີການລະບາດຂອງພະຍາດໂຄວິດ19 ມານໍາຖ້ຽວບິນມະນຸດສະທໍານັ້ນ.”

ປະຈຸບັນສັງເຫດເຫັນວ່າຫລາຍພາກສ່ວນໃນສັງຄົມ ຍັງລະເຫລີງຕໍ່ມາດຕະການ ປ້ອງກັນການລະບາດຂອງພະຍາດນີ້, ສະນັ້ນຄະນະສະເພາະກິດຈຶ່ງສະເໜີໃຫ້ກະຊວງປ້ອງກັນປະເທດເອົາໃສ່ ຕິດຕາມ, ກວດກາການລັກລອບເຂົ້າເມືອງແບບຊະຊາຍ ໂດຍບໍ່ຜ່ານດ່ານຊາຍແດນ, ເພື່ອບໍ່ໃຫ້ມີຄວາມສ່ຽງໃນການນໍາເອົາພະຍາດເຂົ້າມາແຜ່ຜາຍຢູ່ປະເທດເຮົາ,

ພ້ອມກັນນັ້ນອໍານາດການປົກຄອງທຸກຂັ້ນ, ຊຸມຊົນ, ຄອບຄົວ ຕ້ອງເອົາໃຈໃສ່ຮ່ວມກັນໃນການຈັດງານບຸນປະເພນີ, ການສະເຫລີມສະຫລອງວັນສໍາຄັນຕ່າງໆ, ກິດຈະກໍາແຂ່ງຂັນກິລາ ຕ້ອງໄດ້ກໍານົດເປົ້າໝາຍເຂົ້າຮ່ວມໃນລະດັບທີ່ມີຄວາມເໝາະສົມ, ບໍ່ໃຫ້ແອອັດເກີນໄປ ພ້ອມທັງປະຕິບັດມາດຕະການກວດ, ເຊັກຮ່າງກາຍກ່ອນຈະເຂົ້າໄປໃນງານນັ້ນ, ເພື່ອພ້ອມກັນຜ່ານວິກິດນີ້ໃຫ້ໄດ້ ປ້ອງກັນບໍ່ໃຫ້ມີການລະບາດຂອງພະຍາດໂຄວິດ19 ຢູ່ໃນຊຸມຊົນຂອງບ້ານເຮົາ.

ໂດຍ: ເຂີຍຫລ້າ

LEAVE A REPLY

Please enter your comment!
Please enter your name here