ພິທີເຊັນສັນຍາໂຄງການກໍ່ສ້າງສ້ອມແປງເສັ້ນທາງປູຢາງ 2 ຊັ້ນເຂົ້າຫາແຫຼ່ງທ່ອງທ່ຽວບ້ານຖ້ຳລອດ ເມືອງໄຊຍະບູລີ ແຂວງໄຊຍະບູລີ ລະຫວ່າງຫ້ອງການໂຍທາທິການ ແລະ ຂົນສົ່ງເມືອງໄຊຍະບູລີ(ເຈົ້າຂອງໂຄງການ)ກັບບໍລິສັດໄຊຊະນະກໍ່ສ້າງຂົວທາງ ຈຳກັດ( ຜູ້ຮັບເໝົາ) ໄດ້ຈັດຂື້ນໃນຕອນບ່າຍວັນທີ 25 ພະຈີກ 2020 ນີ້ ທີ່ຫ້ອງປະຊຸມຫ້ອງວ່າການເມືອງ. ໂດຍການໃຫ້ກຽດເຂົ້າຮ່ວມຂອງທ່ານ ບຸນແທນ ທີແກ້ວ ກຳມະການພັກແຂວງ ເລຂາພັກເມືອງ ເຈົ້າເມືອງໄຊຍະບູລີ, ມີກຳມະການພັກເມືອງ, ຫົວໜ້າ, ຮອງຫົວໜ້າຫ້ອງການຂອງເມືອງ, ຄະນະກໍາມະການຄຸ້ມຄອງການລົງທືນຂັ້ນເມືອງ, ເຈົ້າຂອງໂຄງການ, ຜູ້ຮັບເໝົາກໍ່ສ້າງ ພ້ອມພະນັກງານທີ່ກ່ຽວຂ້ອງເຂົ້າຮ່ວມ.

ທ່ານ ສອນເພັດ ໂສພາ ຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງໄຊຍະບູລີໄດ້ຂື້ນຜ່ານຮ່າງສັນຍາຮັບເໝົາໂຄງການກໍ່ສ້າງສ້ອມແປງເສັ້ນທາງປູຢາງ 2 ຊັ້ນເຂົ້າຫາແຫຼ່ງທ່ອງທ່ຽວບ້ານຖ້ຳລອດເມືອງໄຊຍະບູລີບາງຕອນທ່ານໄດ້ໃຫ້ຮູ້ວ່າ: ໂຄງການກໍ່ສ້າງສ້ອມແປງເສັ້ນທາງປູຢາງ 2 ຊັ້ນເຂົ້າຫາແຫຼ່ງທ່ອງທ່ຽວບ້ານຖ້ຳລອດ ເມືອງໄຊຍະບູລີ ມີຄວາມຍາວ 6.543 ແມັດ, ໜ້າທາງລົດແລ່ນ 5 ແມັດ ລວມມູນຄ່າການກໍ່ສ້າງ 5 ຕື້ 200 ລ້ານກວ່າກີບ ໂດຍນຳໃຊ້ແຫຼ່ງທືນບ້ວງກອງທືນທີ່ທາງກະຊວງໂຍທາທິການ ແລະ ຂົນສົ່ງມອບໃຫ້ແຂວງໃນແຕ່ລະປີເລີ່ມແຕ່ສົກ 2020 ເປັນຕົ້ນໄປ, ຜູ້ຮັບເໝົາຕ້ອງປະຕິບັດໜ້າວຽກທັງໝົດຂອງໂຄງການໃຫ້ສຳເລັດ 100%

ພາຍໃນ 24 ເດືອນເລີ່ມແຕ່ວັນທີ 23 ພະຈີກ 2020 ຫາ ວັນທີ 23 ພະຈີກ 2022. ຈາກນັ້ນໃນພິທີກໍ່ໄດ້ມີການເຊັນສັນຍາລະຫວ່າງ ທ່ານ ສີສຸກ ສີພານິດ ກຳມະການພັກເມືອງ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງໄຊຍະບູລີ(ເຊີ່ງເປັນເຈົ້າຂອງໂຄງການ) ແລະ ທ່ານ ຄໍາຂ່ອງ ແກ້ວມະນີ ອຳນວຍການບໍລິສັດ ໄຊສະນະກໍ່ສ້າງຂົວທາງຈຳກັດ( ຜູ້ເໝົາກໍ່ສ້າງ) ໂດຍມີທ່ານ ບຸນແທນ ທີແກ້ວ ເຈົ້າເມືອງໄຊຍະບູລີ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພະຍານ.

.

ຂ່າວ-ພາບ: ສົມພົງ ສີສະຫັວດ.

LEAVE A REPLY

Please enter your comment!
Please enter your name here