ໃນຄັ້ງວັນທີ 27 ສິງຫາ 2020 ຜ່ານມານີ້ ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດກອງບັນຊາການ ປກສ ເມືອງເຟືອງ ລົງແກ້ໄຂເປົ້າໝາຍເຄື່ອນໄຫວຊື້-ຂາຍ ແລະ ມົ້ວສຸມຢາເສບຕິດປະເພດຢາບ້າ ຢູ່ຂອບເຂດບ້ານນາກາງ (ຄຸ້ມເລົ່າຄຳ) ເມືອງເຟືອງ ແຂວງວຽງຈັນ ສາມາດຈັບຕົວເປົ້າໝາຍໄດ້ 2 ຄົນຄື: ທ້າວ ຕຽດ ອາຍຸ 32 ປີ ອາຊີບ ຊາວນາ ແລະ ທ້າວ ບຸນທະໜອມ ອາຍຸ 46 ປີ ອາຊີບ ຊາວນາ, ພວກກ່ຽວທັງສອງແມ່ນຢູ່ບ້ານນາກາງ ເມືອງເຟືອງ ແຂວງວຽງຈັນ ພ້ອມຂອງກາງຢາບ້າຈຳນວນ 1,613 ເມັດ ມາສືບສວນ-ສອບສວນ.

ຜ່ານການສືບສວນ-ສອບສວນຂອງເຈົ້າໜ້າທີ່ໜວຍງານວິຊາສະເພາະ ກອງບັນຊາການ ປກສ ເມືອງເຟືອງ ທ້າວ ຕຽດ ໄດ້ຮັບສາລະພາບວ່າ: ຢາບ້າຈຳນວນ 10 ເມັດ ທີ່ເຈົ້າໜ້າທີ່ກວດພົບເຫັນຢູ່ຊອງຢາສູບ ຊຸກເຊື່ອງໄວ້ໃນເຮືອນຄົວຂອງຜູ້ກ່ຽວ ແມ່ນເປັນຂອງຜູ້ກ່ຽວແທ້ ເຊິ່ງໄດ້ໄປຊື້ນຳທ້າວ ບຸນທະໜອມ ຜູ້ຮ່ວມຂະບວນການບ້ານດຽວກັນ ຊື້ມາເພື່ອເອົາໄວ້ເສບ ແລະ ທ້າວ ບຸນທະໜອມ ຮັບສາລະພາບວ່າ: ໃນລະຍະເດືອນສິງຫາ 2020 ຜ່ານມານີ້ ໄດ້ຊື້ຢາບ້ານຳຜູ້ຮ່ວມຂະບວນການທີ່ບ້ານນາພຶງ ເມືອງເຟືອງ ຈຳນວນ 8 ຖົງ ກັບ 3 ເມັດ ລວມທັງໝົດ 1,603 ເມັດ ຊື້ໃນລາຄາ 1 ຖົງຕໍ່ 300,000-400,000 ກີບ ເມື່ອໄດ້ຢາບ້າມາແລ້ວກໍ່ມີຜູ້ຮ່ວມຂະບວນການມາຊື້ຢູ່ເຮືອນ ຜູ້ກ່ຽວຂາຍໃນລາຄາ 1 ເມັດຕໍ່ 5,000 ຫາ 10,000 ກີບ ຖ້າຊື້ເປັນຖົງໄປຂາຍຕໍ່ແມ່ນລາຄາ 1 ຖົງຕໍ່ 500,000 ກີບ ໃນຄະນະທີ່ກຳລັງຊື້-ຂາຍຢູ່ນັ້ນ ກໍ່ເລີຍຖືກເຈົ້າໜ້າທີ່ໜ່ວຍງານວິຊາສະເພາະເຂົ້າຈັບຕົວ ຄັ້ງວັນທີ27 ສິງຫາ 2020 ຜ່ານມານີ້ ພ້ອມທັງກວດພົບເຫັນຂອງກາງຢາບ້າຈຳນວນ 1,603 ເມັດ ທີ່ຊຸກເຊື່ອງໄວ້ຖົງໂສ້ງ ແລະ ຫ້ອງນອນຂອງຜູ້ກ່ຽວ ປະຈຸບັນເຈົ້າໜ້າທີ່ໜ່ວຍງານວິຊາສະເພາະ ກອງບັນຊາການ ປກສ ເມືອງເຟືອງ ໄດ້ເລັ່ງສືບສວນ-ສອບສວນ ພວກກ່ຽວທັງສອງຄົນ ເພື່ອຂະຫຍາຍຜົນຫາຜູ້ຮ່ວມຂະບວນການ ພ້ອມທັງສະຫຼຸບສັງລວມຂໍ້ມູນຫຼັກຖານທັງໝົດ ສົ່ງໃຫ້ພະແນກສະກັດກັ້ນ ແລະ ຕ້ານຢາເສບຕິດ ປກສ ແຂວງວຽງຈັນ ດຳເນີນຄະດີຕາມກົດໝາຍໃນຂັ້ນຕໍ່ໄປ.

ຂ່າວ: ກົງສະເດັດ

LEAVE A REPLY

Please enter your comment!
Please enter your name here