ກອງປະຊຸມໃຫຍ່ ຜູ້ແທນອົງຄະນະພັກກະຊວງສຶກສາທິການ ແລະ ກິລາ ຄັ້ງທີ IX ໄດ້ປິດລົງໃນວັນທີ 25 ພະຈິກ 2020 ພາຍຫລັງທີ່ດໍາເນີນມາເປັນເວລາ 2 ວັນ ຢູ່ມະຫາວິທະຍາແຫ່ງຊາດ (ມຊ) ໂດຍເປັນປະທານ ຂອງ ສະຫາຍ ນາງ ແສງເດືອນ ຫລ້າຈັນທະບູນ ກຳມະການສູນກາງພັກ, ເລ ຂາຄະນະພັກກະຊວງ ລັດຖະມົນຕີ ກະຊວງສຶກສາທິການ ແລະ ກິລາ ມີ ສະຫາຍ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ, ຮອງເລຂາຄະນະພັກກະຊວງ, ສະມາຊິກພັກອາວຸໂສບໍານານ, ສະຫາຍຜູ້ແທນສົມບູນຈຳນວນ 363 ສະຫາຍ, ຍິງ 103 ສະຫາຍ ແລະ ແຂກທີ່ຖືກເຊີນ ເຂົ້າຮ່ວມ.

ໃນການດຳເນີນກອງປະຊຸມ ຜູ້ແທນສົມບູນໄດ້ປ່ອນບັດເລືອກຕັ້ງເອົາ ຄະນະບໍລິຫານງານພັກກະ ຊວງ ສສກ ຊຸດໃໝ່, ໂດຍໄດ້ດຳເນີນໄປຢ່າງມີປະຊາທິປະໄຕ ແລະ ຄວາມຮັບຜິດຊອບສູງ, ສະແດງເຖິງສະຕິປັນຍາ ແລະ ຄວາມສາມັກຄີ ເປັນເອກະພາບອັນໜັກແໜ້ນ ທີ່ເປັນມູນເຊື້ອອັນດີງາມຂອງອົງຄະນະພັກ ຮັບປະກັນໄດ້ລັກສະນະສືບທອດຕໍ່ເນື່ອງ ແລະ ການຫັນເປັນໜຸ່ມ ຕາມການນຳພາ-ຊີ້ນຳຂອງພັກ ເທື່ອລະກ້າວ, ເຊິ່ງຄະນະບໍລິຫານງານພັກກະຊວງ ສສກ ສະໄໝທີ IX ປະກອບມີ 21 ສະຫາຍ, ຍິງ 6 ສະຫາຍ.

ກອງປະຊຸມຄັ້ງປະຖົມມະລຶກ ຂອງຄະນະບໍລິຫານງານພັກກະຊວງ ສສກ ສະໄໝທີ IX ໄດ້ເປັນເອກະສັນຢ່າງສົມບູນ ເລືອກເອົາຄະນະປະຈຳພັກກະຊວງ ສສກ ຈຳນວນ 7 ສະຫາຍ, ຍິງ 3 ສະ ຫາຍ.

ພ້ອມດຽວກັນນີ້, ກອງປະຊຸມໄດ້ເປັນເອກະສັນເລືອກເອົາ ສະຫາຍ ພຸດ ສິມມາລາວົງ ເປັນເລຂາຄະນະພັກ ກະຊວງ ສະຫາຍ ນາງ ຂັນທະລີ ສີຣິພົງພັນ ເປັນຮອງເລຂາຄະນະພັກກະຊວງ ເລືອກເອົາສະຫາຍ ສຳລານ ພັນຄະວົງ ເປັນປະທານກວດກາພັກ ເລືອກສະຫາຍ ບຸນມີ ຈັນທະອຸດົມ ສະຫາຍ ຮຸ່ງເພັດ ຈັນທະວົງ ແລະ ສະຫາຍ ອິນທະວົງ ມະນີທອງ ເປັນຮອງປະທານຄະນະກວດກາພັກ.

ໂອກາດນີ້, ສະຫາຍ ພັນຄໍາ ວິພາວັນ ກໍາມະການກົມການເມືອງສູນກາງພັກ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ໄດ້ສະແດງຄວາມຍ້ອງຍໍຊົມເຊີຍຕໍ່ການນຳພາ-ຊີ້ນຳຂອງຄະນະພັກຊຸດເກົ່າ ທີ່ໄດ້ນຳພາ-ຊີ້ນຳສະມາຊິກພັກ ພະນັກງານ-ລັດຖະກອນ ຂະ ແໜງການສຶກສາ ແລະ ກິລາ ປະຕິບັດໜ້າທີ່ການເມືອງຂອງຕົນ ແລະ ຍາດມາໄດ້ຜົນສຳເລັດຫລາຍດ້ານ. ພິເສດ, ສະຫາຍ ໄດ້ຊົມເຊີຍຜົນສໍາເລັດ ໃນການເລືອກຕັ້ງເອົາຄະນະບໍລິຫານງານພັກຊຸດໃໝ່ ທີ່ມີໂຄງປະກອບສອດຄ່ອງ ແລະ ເໝາະສົມກັບຄວາມຮຽກຮ້ອງຕ້ອງການ ຂອງໜ້າທີ່ການເມືອງໄລຍະໃໝ່ ພ້ອມນັ້ນ ສະຫາຍ ຍັງໄດ້ເນັ້ນໜັກຕໍ່ດ້ານອ່ອນ ຂໍ້ຄົງຄ້າງບາງດ້ານ ທີ່ຈະຕ້ອງໄດ້ສືບຕໍ່ນຳໄປປັບປຸງແກ້ໄຂໃນຕໍ່ໜ້າ ໂດຍສະຫາຍ ໄດ້ເໜັ້ນໜັກຕື່ມໃນບາງຈຸດ ຄື: ເຖິງແມ່ນວ່າຂະແໜງການສຶກສາ-ກິລາ ໄດ້ມີຄວາມກ້າວໜ້າໃນຫລາຍດ້ານ ດັ່ງທີ່ໄດ້ຕີລາຄານຳກັນຜ່ານມານັ້ນ ແຕ່ເມື່ອທຽບໃສ່ຄວາມຮຽກຮອ້ງຕ້ອງ ການຂອງສະພາບການໃໝ່ ແມ່ນພວກເຮົາຕ້ອງໄດ້ບຸກໜ້າບືນຕົນຫລາຍກວ່າເກົ່າ.

ໃນນີ້, ຕ້ອງປົກປັກຮັກ ສາ ແລະ ເສີມຂະຫຍາຍຜົນສຳເລັດອັນທີ່ດີ ແກ້ໄຂຂອດອ່ອນທີ່ຍັງຄົງຄ້າງ ແລະ ອັນສຳຄັນຕ້ອງໄດ້ພັດ ທະນາສູ່ອັນໃໝ່ ໃຫ້ທັນກັບການປ່ຽນແປງທີ່ກ້າວໜ້າທັນສະໄໝ ຂອງວິທະຍາສາດ-ເຕັກໂນໂລຢີຂອງຍຸກສະໄໝ ການສຶກສາທິີ່ມີຄຸນນະພາບ (ຄຸນນະພາບຂອງການສຶກສາ) ໂດຍສະເພາະການພັດທະນາຫລັກ ສູດ ແລະ ປັບປຸງແບບວິທີສິດສອນ ເພື່ອຕອບສະໜອງໄດ້ຄວາມຮຽກຮ້ອງຕ້ອງການດັ່ງກ່າວ, ລະບົບ ການສຶກສາແຫ່ງຊາດແມ່ນສຳຄັນຫລາຍ ມີບົດບາດຕັດສິນຄວາມໜັ້ນຄົງຍືນຍົງຂອງສັງຄົມ ທີ່ເປັນລາວ ພັດທະນາ ປະເທດກ້າວໜ້າຈະເລີນໄປຕາມສະພາບຈຸດພິເສດ ແລະ ຄຸນຄ່າທີ່ດີງາມຂອງຄວາມເປັນລາວ ອັນສຳຄັນ ຄົນລາວເປັນຄົນມັກສັນຕິພາບ ມັກສະຫງົບສຸກ ມີຄວາມສາມັກຄີໂອບເອື້ອອາລີ ມີຮີດຄອງປະເພນີອັນດີງາມ, ເຊິ່ງວົງຄະນາຍາດສາກົນ ກໍມີຫລາຍອັນຍອມຮັບ ພວກເຮົາຕ້ອງປົກປັກຮັກສາ ແລະ ທັງພັດທະນາໃຫ້ກ້າວໜ້າໄປເລື້ອຍໆ ຈາກນີ້ ຈຶ່ງພົວພັນກັບການພັດທະນາຫລັກສູດ ພັດທະນາວິທີການສອນ-ການຮຽນແນວໃດ ຈຶ່ງຮັບປະກັນໄດ້ຕາມຄວາມຮຽກຮ້ອງຕ້ອງການດັ່ງກ່າວ.

ກ່ຽວກັບການກິລາ ມັນກໍຕິດພັນກັບການສຶກສາ ແລະ ການປົກປັກຮັກສາສຸຂະພາບຂອງຄົນລາວ ພ້ອມກັນນັ້ນ ກໍໃຫ້ເອົາໃຈໃສ່ກິລາແຂ່ງຂັນ ເພື່ອຢືນຢັນເຖິງກຽດ ຊື່ສຽງຂອງ ສປປ ລາວ ໃນເວທີພາກພື້ນ ແລະ ສາກົນ ຖ້າພວກເຮົາບໍ່ເພີ່ມທະວີຄວາມເກັ່ງຂອງນັກກິລາໄດ້ ແມ່ນລະດັບຂອງປະເທດເຮົາຈະຖອຍລົງເລື້ອຍໆ ແລະ ນຳຫລັງປະເທດອື່ນໃນອາຊຽນ ກໍຄື ສາກົນ.

ສຳລັບຄະນະພັກຊຸດໃໝ່ ພວກເຮົາກໍໄດ້ມີຄວາມພະຍາຍາມຫັນເປັນໜຸ່ມ ບັນດາສະຫາຍຄະນະພັກຊຸດໃໝ່ ຕ້ອງມີຄວາມຕັດສິນໃຈສູງ ປັບປຸງໂຕເອງ ບຸກບືນເຮັດໃຫ້ສຳເລັດໜ້າທີ່ຕາມການມອບໝາຍຂອງກອງປະຊຸມໃຫຍ່ ອັນສຳຄັນແມ່ນຕ້ອງມີຄວາມສາມັັກຄີເປັນເອກະພາບ ປະຕິບັດເຂັ້ມງວດ ຫລັກການ ລວມສູນປະຊາທິປະໄຕຂອງພັກ ພະຍາຍາມສົ່ງເສີມອັນທີ່ດີ ແລະ ແກ້ໄຂຈຸດອ່ອນຄົງຄ້າງ ທີ່ມີຕົວຈິງຜ່ານມາໃຫ້ຕົກໄປເປັນກ້າວໆ ສະເໜີ ແລະ ຮຽກຮ້ອງບັນດາສະຫາຍ ອາດີດຄະນະພັກ ທີ່ໄດ້ອອກພັກ ຜ່ອນຮັບເບ້ຍບຳນານແລ້ວ ຕ້ອງໄດ້ຊ່ວຍເຫລືອກໍ່ສ້າງ ແລະ ປະກອບຄວາມເຫັນຢ່າງຮັບຜິດຊອບ ແລະ ສ້າງສັນ ໃຫ້ແກ່ຄະນະພັກຊຸດໃໝ່ນີ້ ເພື່ອເຮັດສຳເລັດໜ້າທີ່ ທີ່ມີກຽດດັ່ງໄດ້ກ່າວມາແລ້ວນັ້ນ.

ຂ່າວ: ສຸພະສະຫວັນ |ຮູບ: ເກດສະໜາ

LEAVE A REPLY

Please enter your comment!
Please enter your name here