ຜົນສໍາເລັດກອງປະຊຸມໃຫຍ່ຜູ້ແທນອົງຄະນະພັກ ແຂວງສະຫວັນນະເຂດ ຄັ້ງທີ IX

ກອງປະຊຸມໃຫຍ່ຜູ້ແທນອົງຄະນະພັກ ແຂວງສະຫວັນນະເຂດ ຄັ້ງທີ IX ໄດ້ອັດລົງດ້ວຍຜົນສໍາເລັດໃນໃນວັນທີ 21 ພະ ຈິກ 2020 ທີ່ທີ່ຫ້ອງປະຊຸມ ຫໍວັດທະນະທຳໄກສອນພົມວິຫານ ພາຍຫລັງດໍາເນີນມາເປັນເວລາ 2 ວັນ ພາຍໃຕ້ການເປັນປະທານຂອງ ສະຫາຍ ສັນຕິພາບ ພົມວິຫານ, ກຳມະການສູນກາງພັກ, ເລຂາພັກແຂວງ, ເຈົ້າແຂວງແຂວງສະຫວັນນະເຂດ ໂດຍການໃຫ້ກຽດເຂົ້າຮ່ວມຂອງ ສະຫາຍ ທອງລຸນສີສຸລິດ ກໍາມະການກົມການເມືອງສູນກາງພັກ, ນາຍົກລັດຖະມົນຕີ, ພ້ອມດ້ວຍບັນດາສະຫາຍພະນັກງານປະຕິວັດອາວຸໂສ, ຜູ້ແທນສົມບູນ 455 ສະຫາຍ, ຍິງ 79 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດ 29,075 ສະຫາຍ ໃນທົ່ວແຂວງ ແລະ ແຂກຖຶກເຊີນເຂົ້າຮວ່ມ.

ຕະຫລອດໄລຍະເວລາ 2 ວັນ, ກອງປະຊຸມໃຫຍ່ ໄດ້ພ້ອມກັນຄົ້ນຄ້ວາ, ປະກອບຄໍາເຫັນ ແລະ ຮັບຮອງເອົາຮ່າງບົດລາຍງານການເມືອງໂດຍໄດ້ເປັນເອກະພາບຢ່າງສູງຕໍ່ຜົນສຳເລັດຂອງການຈັດຕັ້ງປະຕິບັດມະຕິກອງປະຊຸມໃຫຍ່ອົງຄະນະພັກແຂວງສະຫວັນນະເຂດ ຄັ້ງທີ VIII ໃນ 5 ປີຜ່ານມາ (2016-2020), ພ້ອມກັນນີ້ ໄດ້ຕິລາຄາການຊີ້ນຳ-ນຳພາລວມຂອງຄະນະບໍລິຫານງານພັກແຂວງໃນໄລຍະຜ່ານມາຢ່າງພາວະວິໄສໄຈ້ແຍກໃຫ້ເຫັນເຖິງຜົນສຳເລັດ, ດ້ານດີແລະຈຸດອ່ອນ ຂໍ້ຄົງຄ້າງທີ່ເປັນພື້ນຖານ ແລະ ສາມາດຖອດຖອນໄດ້ບົດຮຽນພຶດຕິກໍາແຫ່ງການຊີ້ນຳ-ນໍາພາຂອງອົງຄະນະພັກແຂວງໃນ 5 ປີຜ່ານມາ ເພື່ອສືບຕໍ່ຊີ້ນໍາ-ນໍາພາໃນຊຸມປີຕໍ່ໜ້າ.

ກອງປະຊຸມໃຫຍ່ ໄດ້ຢືນຢັນຄວາມຕັດສິນໃຈຂອງອົງຄະນະພັກແຂວງ ໃນການສຶບຕໍ່ຊີ້ນຳ-ນຳພາ ຮອບດ້ານເພື່ອພັດທະນາແຂວງສະຫວັນນະເຂດໃຫ້ຈະເລີນຮຸ່ງເຮືອງ, ເຂັ້ມແຂງ, ສັງຄົມມີຄວາມສາມັກຄີປອງດອງ, ຫັນວຽກງານກະສິກຳປ່າໄມ້ ເປັນທັນສະໄໝເພື່ອຮັບໃຊ້ຊີວິດການເປັນຢູ່ຂອງປະຊາຊົນບັນດາເຜົ່າ ຕາມທິດຍືນຍົງ ນຳໃຊ້ທ່າແຮງທີ່ຕັ້ງຂອງແຂວງ ໃນການພັດທະນາລະບົບຄົມມະນາຄົມຂົນສົ່ງ (ໂລຈິດສ໌ຕິກ) ຕາມແລວເສດຖະກິດເຊື່ອມໂຍງກັບພາກພື້ນພາຍໃຕ້ຄຳຂວັນ “ຍົກສູງຄວາມສາມາດນຳພາຂອງພັກ,ເສີມຂະຫຍາຍມູນເຊື້ອຄວາມສາມັກຄີປອງດອງ, ສຸມທຸກກຳລັງແຮງຫັນກະສິກຳປ່າໄມ້ເປັນທັນສະໄໝຕາມທິດຢືນຍົງ, ພັດທະນາແລວເສດຖະກິດໃຫ້ເປັນສູນກາງການບໍລິການຂອງພາກພື້ນ ສ້າງແຂວງສະຫວັນນະເຂດໃຫ້ເຂັ້ມແຂວງໜັກແໜ້ນປະຊາຊົນມີຄວາມຜາສຸກ”.

ກອງປະຊຸມໃຫຍ່ ໄດ້ປ່ອນບັດເລືອກຕັ້ງເອົາຄະນະບໍລິ ຫານງານພັກແຂວງ ສະໄໝທີ IX ເຊິ່ງມີຜູ້ອອກຮັບສະໝັກເລືອກຕັ້ງ 46 ສະຫາຍ, ຍິງ 5 ສະຫາຍ, ເລືອກເອົາ 41 ສະຫາຍ, ຍິງ 5 ສະຫາຍ.

ກອງປະຊຸມຄັ້ງປະຖົມມະລຶກຂອງຄະນະບໍລິຫານງານພັກແຂວງສະໄໝທີ VIII ໄດ້ເປັນເອກະພາບສູງ ເລືອກຕັ້ງເອົາຄະນະປະຈຳພັກແຂວງ ຈຳນວນ 13 ສະຫາຍ, ຍິງ 1 ສະຫາຍ

  • ເລືອກຕັ້ງເອົາ ສະຫາຍ ສັນຕິພາບ ພົມວິຫານ ກຳມະການສູນກາງພັກ ເປັນເລຂາຄະນະບໍລິຫານງານພັກແຂວງ ສະໄໝທີ IX
  • ເລືອກຕັ້ງເອົາ ສະຫາຍ ພູວັງ ເກດແກ້ວພົມພອນ ແລະ ສະຫາຍ ກົງແກ້ວ ມີວໍລະຈັກ ເປັນຮອງເລຂາ ຄະນະບໍລິຫານງານພັກແຂວງ ສະໄໝທີ IX.
  • ເລືອກຕັ້ງເອົາ ສະຫາຍ ລຳທອງ ຂອບສີລາວົງ ເປັນປະທານຄະນະກວດກາພັກແຂວງ ແລະ
  • ເລືອກຕັ້ງເອົາ ສະຫາຍ ແຖວຄຳ ພົມມະວົງ, ສະຫາຍ ສີວິໄລ ຈັນທຳມະຈັກ, ສະຫາຍ ນ. ກິ່ນນາລອນ ວົງຄຳໂສພາ ແລະສະຫາຍ ທຳມະລາດ ມະນີວົງ ເປັນຮອງປະທານຄະນະກວດກາພັກແຂວງ ສະໄໝທີ IX

ກອງປະຊຸມໄດ້ເລືອກເອົາຜູ້ແທນສົມບູນ 38 ສະຫາຍ ແລະ ຜູ້ແທນສໍາຮອງ 3 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງພັກທີ່ຈະໄຂຂຶ້ນໃນຕໍ່ໜ້າ.

ກອງປະຊຸມ ຍັງໄດ້ຮັບຟັງການໂອ້ລົມຈາກ ສະຫາຍ ທອງລຸນສີສຸລິດ, ກຳມະການກົມການເມືອງສູນກາງພັກ, ນາຍົກລັດຖະມົນຕີ, ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳ-ນຳພາຂອງຄະນະບໍລິຫານງານພັກແຂວງສະຫວັນນະເຂດ ຊຸດເກົ່າ ເຫັນວ່າໄດ້ຮັບຜົນສຳເລັດໃນຫຼາຍດ້ານ ເຮັດໃຫ້ການພັດທະນາເສດຖະກິດ-ສັງຄົມຂອງແຂວງນັບມື້ເຕີບໃຫຍ່ຂະຫຍາຍຕົວຢ່າງຕໍ່ເນື່ອງ, ພ້ອມກັນນັ້ນ, ສະຫາຍ ໄດ້ໃຫ້ທິດຊີ້ນໍາຕໍ່ຄະ ນະບໍລິຫານງານພັກແຂວງຊຸດໃໝ່ສືບຕໍ່ເສີມຂະຫຍາຍດ້ານດີທີ່ຕັ້ງໜ້າ ແລະ ປັບປຸງແກ້ໄຂຂໍ້ຄົງຄ້າງ ແຕ່ລະດ້ານໃຫ້ໝົດໄປ, ທັງຮຽກຮ້ອງໃຫ້ສືບຕໍ່ຊີ້ນຳ-ນຳພາ ແລະ ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ອົງຄະນະພັກແຂວງຄັ້ງທີ IX ເຂົ້າສູ່ຊີວິດຕົວຈິງ ຂອງບັນດາຂະແໜງການ ແລະ ສັງຄົມໃຫ້ມີຜົນສຳເລັດຢ່າງເປັນຮູບປະທໍາ.

ຂ່າວ; ພາບ: ຈັນທະວອນ

LEAVE A REPLY

Please enter your comment!
Please enter your name here