ເນື່ອງໃນໂອກາດວັນຊາດທີ 2 ທັນວາ ຄົບຮອບ 45 ປີ ( 2 ທັນວາ 1975 – 2 ທັນວາ 2020) ທ່ານ ຄຳມະນີ ອິນທິລາດ ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງພະ ລັງງານ ແລະ ບໍ່ແຮ່ ໄດ້ໃຫ້ສໍາພາດຕໍ່ສື່ມວນຊົນເມື່ອບໍ່ດົນມານີ້ ທີ່ນະຄອນຫລວງວຽງ ຈັນ ໂດຍທ່ານໄດ້ຍົກໃຫ້ເຫັນການເຕີບໃຫຍ່ຂະຫຍາຍຕົວຂອງຂະແໜງພະລັງງານ ແລະ ບໍ່ແຮ່ ຕະຫລອດໄລຍະ 45 ປີ ຜ່ານມາ ຂະແໜງພະລັງງານ ແລະ ບໍ່ແຮ່ຂອງລາວໄດ້ຮັບການພັດທະນາຢ່າງຕໍ່ເນື່ອງ, ໃນນີ້ ຂະແໜງພະລັງງານ: ກ່ອນປີ 1975 ທົ່ວປະເທດ ມີແຫຼ່ງຜະລິດພະລັງງານໄຟຟ້ານ້ຳຕົກຂະໜາດໃຫຍ່ພຽງແຕ່ 1 ແຫ່ງຄື: ເຂື່ອນໄຟຟ້ານ້ຳງື່ມ 1, ຊຶ່ງມີກຳລັງຕິດຕັ້ງພຽງແຕ່ 30 ເມກາວັດແລະ ເຂື່ອນໄຟ ຟ້າຂະໜາດນ້ອຍ 2 ແຫ່ງຄື: ເຂື່ອນນ້ຳດົງຢູ່ແຂວງຫຼວງພະບາງມີກຳລັງຕິດຕັ້ງ 1 ເມກາວັດ ແລະເຂື່ອນແຊລະບຳຢູ່ແຂວງຈຳປາສັກ ມີກຳລັງຕິດຕັ້ງ 1 ເມກາວັດ.

ພາຍຫຼັງ ລັດຖະບານ ປະກາດໃຊ້ກົດໝາຍໄຟຟ້າໃນປີ 1997ແລະ ມີນະໂຍບາຍດືງດູດການລົງທືນຕ່າງປະເທດເຮັດໃຫ້ມີນັກລົງທືນຈາກຫຼາຍປະເທດເລີ່ມຫັນເຂົ້າມາລົງທືນນັບທັງໃນຮູບແບບໂຄງການພະລັງງານເອກະຊົນ (IPP) ເຮັດໃຫ້ ອຸດສາຫະກໍາພະລັງງານຢູ່ລາວ ຂະຫຍາຍຕົວດ້ວຍຈັງຫວະທີ່ໄວ ແລະ ບາງໄລຍະກໍມີລັກສະນະກ້າວກະໂດດ. ມາຮອດປັດຈຸບັນນີ້, ຢູ່ ສປປ ລາວ ມີແຫຼ່ງຜະລິດໄຟຟ້າແລ້ວ 78 ແຫ່ງ, ມີກຳລັງຕິດຕັ້ງທັງໝົດ 9.972 ເມັກກາວັດ, ສາມາດຜະລິດພະລັງງານໄຟຟ້າໄດ້ເຖິງ 52.211 ລ້ານກິໂລວັດໂມງຕໍ່ປີ. ນອກຈາກນີ້ຍັງມີ: ໂຄງການໄຟຟ້າຖ່ານຫີນ 1, ໂຄງການພະລັງງານໄຟຟ້າຊີວະມວນ 4 ແຫ່ງ ແລະ ໂຄງການໄຟຟ້າແສງຕາເວັນລວມ 6 ແຫ່ງ. ຕາມການຄາດຄະເນ ໃນທ້າຍປີ 2020 ນີ້, ສປປ ລາວ ຈະມີແຫລ່ງຜະລິດພະລັງງານໄຟຟ້າເພີ່ມຂຶ້ນເປັນທັງ ໝົດ 90 ແຫ່ງ, ມີກໍາລັງຕິດຕັ້ງປະມານ 10.704 MW.

ຄຽງຄູ່ກັນນີ້, ມາຮອດປັດຈຸບັນ ທົ່ວປະເທດມີລະບົບສາຍສົ່ງແຮງສູງ, ແຮງກາງ ແລະ ແຮງຕໍ່າຍາວທັງໝົດ 65.563 ກວ່າກິໂລແມັດ, ມີສະຖານີຈ່າຍໄຟຟ້າ 74 ແຫ່ງ, ສາມາດສະໜອງໄຟຟ້າຮັບໄດ້ 100% ຢູໃນທຸກເທດສະ ບານແຂວງ, ນະຄອນຫຼວງ, ເທດສະບານເມືອງ ແລະ ນະ ຄອນ. 93% ຂອງຈຳນວນບ້ານ ແລະ 95% ຂອງຈໍານວນຄອບຄົວໃນທົ່ວປະເທດໄດ້ໃຊ້ໄຟຟ້າແບບຖາວອນແລ້ວ.

ສໍາລັບການສົ່ງອອກໄປຈໍາໜ່າຍຕ່າງປະເທດ, ສາມາດບັນ ລຸໄດ້ແລ້ວ 6.935 MWF ໃນນີ້: ສົ່ງອອກໄປຍັງປະເທດໄທແລ້ວ 5.935 MW, ຫວຽດນາມ 570 MW, ກໍາປູເຈຍ 320 MW, ມຽນມ້າ 10 MW, ການເຊື່ອມໂຍງ ແລະ ຈໍາໜ່າຍໄປຍັງຕະຫຼາດອາຊຽນ: ຊຶ່ງໃນກຸ່ມປະເທດອາຊຽນ ສປປ ລາວ ແມ່ນປະເທດທຳອິດ ທີ່ໄດ້ລິເລີ່ມສົ່ງຂາຍໄຟຟ້າແບບເຊື່ອມໂຍງໃນກຸ່ມປະເທດອາຊຽນ. ປັດຈຸບັນໄດ້ສົ່ງ ອອກແລ້ວ 100 ເມັກກາວັດ ໂດຍຜ່ານປະເທດລາວ-ໄທ-ມາເລເຊຍ ແລະ ໃນປີ 2021 ຈະສົ່ງໃຫ້ໄດ້ 300 MW.

ພ້ອມດຽວກັນນີ້ ສືບຕໍ່ເຈລະຈາຊື້-ຂາຍ ແລະເຊື່ອມໂຍງໄປຮອດປະເທດສິງກະໂປ. ແຕ່ການ ສົ່ງອອກໃນອະນາຄົດ ຍັງຈະເພີີ່ມຂື້ນເລື້ອຍໆ ຕາມ ບັນທຶກຄວາມເຂົ້າໃຈຮ່ວມມືດ້ານພະລັງງານ (MOU)ທີ່ ສປປ ລາວ ເຮົາ ມີກັບບັນດາປະເທດໃກ້ຄຽງ ເຊັ່ນ: ມີບັນທຶກຄວາມເຂົ້າໃຈຮ່ວມມືດ້ານພະລັງງານ ກັບ ຣາຊະອານາຈັກໄທ 9.000 MW, ມີກັບ ຣາຊະອານາຈັກ ກໍາປູເຈຍ 6.000 MW ແລະ ມີກັບ ສສ ຫວຽດນາມ 5.000 MW. ທັງໝົດນີ້ ຈະສົ່ງອອກໃຫ້ຄົບຕາມຈໍານວນ ທັງ 3 ປະເທດພາຍໃນປີ 2030.

ສ່ວນຂະແໜງບໍ່ແຮ່: ກ່ອນປີ 1975, ວຽກງານທໍລະນີ ສາດ ແລະ ແຮ່ທາດ ເກືອບເວົ້າໄດ້ວ່າບໍ່ໄດ້ຮັບການພັດທະ ນາເລີຍ, ເຖິງວ່າມີເລັກໆນ້ອຍໆ ກໍເປັນກິດຈະກຳທີ່ອ່ອນນ້ອຍ, ບໍລິມາດບໍ່ພໍເທົ່າໃດ ແລະ ກໍບໍ່ໄດ້ຮັບການສົ່ງເສີມຈາກພາກລັດເລີຍ ເຊັ່ນ : ບໍ່ກົ່ວໂພນຕີິ້ວເປັຕົ້ນ. ນອກຈາກນັ້ນ,ໃນຊຸມປີ 1980 ກໍມີການຊອກຄົ້ນ ແລະ ຂຸດຄົ້ນ ແຮ່ທາດບາງອັນ.

ພາຍຫຼັງທີ່ປະເທດຊາດໄດ້ຮັບການປົດປ່ອຍ, ລັດເຮົາໄດ້ມີແຜນການສຶກສາຄົ້ນຄວ້າ: ສປປ ລາວເປັນປະເທດ ທີ່ມີທ່າແຮງທາງດ້ານຊັບພະຍາກອນແຮ່ທາດ ຊຶ່ງມາຮອດປັດ ຈຸບັນ ສາມາດຄົ້ນພົບຈຸດປາກົດແຮ່ທາດໄດ້ຫຼາຍກວ່າ 570 ຈຸດ, ໃນຂອບເຂດເນື້ອທີ່ປະມານ: 162.104 ກິໂລຕາແມັດ ເທົ່າ ກັບ 68.46% ຂອງເນື້ອທີ່ທົ່ວປະເທດ; ຊຶ່ງປະກອບດ້ວຍ: ຄໍາ, ທອງ, ເງິນ, ນິແກນ, ກົ່ວ, ຖ່ານຫີນ, ບົກຊິດ, ຫີນກາວ, ເຫຼັກ, ແກ້ວປະເສີດ,ເກືອກິນ,ເກືອໂປຕັດສ໌, ຊືນ,ສັງກະສີ,ມັງການ,ຫີນປູນ,ຫີນໂດໂລໄມ,ບາລິດ ແລະອື່ນໆ. ນັບແຕ່ປີ 1990 ເປັນຕົ້ນມາ, ລັດຖະບານລາວ ໄດ້ເປີດກວ້າງໂດຍອະນຸຍາດໃຫ້ຜູ້ລົງທຶນທັງພາຍໃນແລະຕ່າງປະເທດ ສາມາດລົງທຶນເຂົ້າໃສ່ການພັດທະນາອຸດສາຫະ ກຳບໍ່ແຮ່.ຊຶ່ງມາຮອດປັດຈຸບັນ ໄດ້ອະນຸຍາດໃຫ້ບໍລິສັດລົງທຶນໃນກິດຈະການທໍລະນີສາດ ແລະ ບໍ່ແຮ່ແລ້ວ ທັງ ໝົດ 214 ບໍລິສັດ 319 ກິດຈະການ. ຊຶ່ງຢູ່ໃນຂັ້ນຕອນການຊອກຄົ້ນ ຈໍານວນ 21 ບໍລິສັດ 28 ກິດຈະການ, ຢູ່ໃນຂັ້ນຕອນການສໍາຫຼວດ ຈໍານວນ 70 ບໍລິສັດ 83 ກິດຈະ ການ ແລະ ຢູ່ໃນຂັ້ນຕອນ ສຶກສາຄວາມເປັນໄປໄດ້ດ້ານເສດຖະກິດ-ເຕັກນິກ ຈໍານວນ 43 ບໍລິສັດ 67 ກິດຈະ ການ.ຢູ່ໃນຂັ້ນຕອນການຂຸດຄົ້ນ ແລະ ປຸງແຕ່ງແຮ່ທາດ ມີຈໍານວນທັງໝົດ 80 ບໍລິສັດ 141 ກິດຈະການ. ຊຶ່ງໂຄງ ການດ້ານແຮ່ທາດ ທີ່ໄດ້ຮັບອະນຸຍາດ ມີເນື້ອທີ່ທັງໝົດ: 7.281.047,42 ເຮັກຕາ ກວມ 30,75% ຂອງເນື້ອທີ່ປະ ເທດລາວ.

ເວົ້າລວມແລ້ວ ຂະແໜງພະລັງງານ ແລະ ບໍ່ແຮ່ ມິບົດບາດສໍາຄັນຫລາຍຕໍ່ການພັດທະນາເສດຖະກິດ-ສັງຄົມຂອງຊາດ, ໃນນີ້ ເວົ້າສະເພາະ 5 ປີຜ່ານມານີ້ ໄດ້ປະກອບສ່ວນສ້າງລາຍຮັບເຂົ້າງົບປະມານແຫ່ງລັດ 2.064 ລ້ານໂດລາສະຫະ ລັດ, ໃນນີ້ ຂະແໜງພະລັງງານ 1.225 ລ້ານໂດລາສະຫະລັດ ແລະ ຂະແໜງບໍ່ແຮ່ 838 ລ້ານໂດລາສະຫະລັດ , ໃນນັ້ນ ປະກອບມີ: ຄ່າສຳປະທານ, ຄ່າຊັບພະ ຍາກອນ, ອາກອນກຳໄລ, ອາກອນເງິນເດືອນ,ອາກອນເງິນປັນຜົນ, ເງິນປັນຜົນ ລວມທັງພັນທະ 6 ກອງທຶນຕາມສັນ ຍາ.

ຢ່າງໃດກໍ່ຕາມ ຄຽງຄູ່ກັບຜົນສໍາເລັດທີ່ປະຕິບັດໄດ້ ການພັດທະນາຂະແໜງພະລັງງານ ແລະ ບໍ່ແຮ່ ຂອງລາວ ມີຫລາຍຢ່າງທີ່ເປັນຂໍ້ຫຍຸ້ງຍາກ ເນື່ອງຈາກພະລັງງານ ເປັນຂະແໜງທີ່ຕ້ອງນໍາໃຊ້ງົບປະມານເຂົ້າໃນການພັດທະນາເປັນຈໍານວນຫລາຍ ເຮັດໃຫ້ລັດຖະບານຕ້ອງໄດ້ກູ້ຢືມເງິນຈາກຕ່າງປະເທດມາຈັດຕັ້ງປະຕິບັດ ຊຶ່ງພາໃຫ້ເກີດໜີ້ສິນເປັນຈຳນວນຫລວງຫລາຍ. ນອກຈາກນີ້ ຍັງມີໄພພິບັດທາງທໍາມະຊາດເກີດຂຶ້ນເຮັດໃຫ້ແຫລ່ງຜະລິດພະລັງງານບາງແຫ່ງເປ່ເພ ແລະ ອື່ນຯ.

ລັດຖະມົນຕີກະຊວງພະລັງງານ ແລະ ບໍ່ແຮ່ ຍັງໄດ້ຍົກໃຫ້ເຫັນກ່ຽວກັບທິດທາງພັດທະນາຂະແໜງພະລັງງານ ແລະ ບໍ່ແຮ່ໃນຕໍ່ໜ້າ, ໃນນີ້ ຂະແໜງພະລັງງານ: ລັດຖະ ບານຈະສຸມໃສ່ຈັດຕັ້ງປະຕິບັດຫລາຍວຽກງານ ເປັນຕົ້ນແມ່ນ: ສຸມໃສ່ພັດທະນາແຫຼ່ງໄຟຟ້ານໍ້າຕົກເປັນຫຼັກ, ຮັກສາສະຖຽນລະພາບການສະໜອງໄຟຟ້າຢູ່ພາຍໃນປະເທດໃຫ້ພຽງພໍ, ທົ່ວເຖິງ ແລະ ຍຶນຍົົງ.

ພ້ອມນັ້ນ, ກໍເອົາໃຈໃສ່ສົ່ງ ເສີມການພັດທະນາພະລັງງານທົດແທນ ແລະ ທາງເລືອກອື່ນໃຫ້ເປັນລະບົບຄົບຊຸດ ແລະ ມີປະສິດທິຜົນ, ມີສະຖຽນລະພາບແລະຍືນຍົງເພື່ອສົ່ງເສີມການພັດທະນາເສດ ຖະກິດ-ສັງຄົມແຫ່ງຊາດ; ໃຫ້ບູລິມະສິດໃນການພັດທະນາອຸດສາຫະກໍາພະລັງງານໄຟຟ້າ ໂດຍແບ່ງອອກເປັນ 2 ໂຄງ ການໃຫຍ່ຄື : ໂຄງການພັດທະນາການຜະລິດພະລັງງານໄຟຟ້າເພື່ອການຊົມໃຊ້ພາຍໃນ ແລະ ໂຄງການພັດທະນາພະລັງງານໄຟຟ້າເພື່ອການສົ່ງອອກຊຶ່ງສ່ວນໃຫຍ່ແມ່ນໂຄງການຂະໜາດໃຫຍ່; ພັດທະນາໄຟຟ້າໃຫ້ກາຍ ເປັນລະບົບແຫ່ງຊາດທີ່ເປັນລະບົບຄົບຊຸດ; ຮັບປະກັນການສະ ໜອງໄຟຟ້າເພື່ອການຊົມໃຊ້ຢູ່ພາຍໃນໃຫ້ມີປະສິດທິພາບ, ປະສິດທິຜົນ, ມີຄວາມປອດໄຟ, ທົ່ວເຖິງ, ພຽງພໍ ແລະ ດ້ວຍລາຄາທີ່ສົມເຫດສົມຜົນ ແລະ ອື່ນຯ.

ສ່ວນດ້ານບໍ່ແຮ່: ພັດທະນາອຸດສາຫະກໍາແຮ່ທາດ ຢ່າງເປັນລະບົບຄົບຊຸດຊຶ່ງປະກອບດ້ວຍ: ການຊອກຄົ້ນ, ສໍາຫຼວດ, ຂຸດຄົ້ນ, ຄຸ້ມຄອງການລົງທຶນ, ປຸງແຕ່ງ ແລະ ຈຳ ໜ່າຍຜະລິດຕະພັນແຮ່ທາດ. ຮັບປະກັນໃຫ້ການພັດທະ ນາຊັບພະຍາກອນແຮ່ທາດເກີດປະໂຫຍດສຸດສຸດຕໍ່ການພັດທະນາເສດຖະກິດ-ສັງຄົມຂອງຊາດ, ສອດຄ່ອງກັບທິດຍືນຍົງ ແລະ ສີຂຽວ. ການພັດທະນາອຸດສາຫະກໍາບໍ່ແຮ່ແມ່ນຈະຕ້ອງເນັ້ນປະສິດທິຜົນ, ມີການເລືອກເຟັ້ນ, ມີຈຸດສຸມ ແລະ ກາຍເປັນສິ່ງເອື້ອອໍານວຍໃຫ້ແກ່ການພັດ ທະນາຢ່າງຮອບດ້ານຂອງ ສປປ ລາວຕາມທິດຍືນຍົງ, ເປັນມິດກັບສິ່ງແວດລ້ອມ, ສ້າງມູນຄ່າເພີ່ມໃຫ້ສູງຂຶ້ນເພື່ອເປັນທຶນຮອນຂັບເຄື່ອນການພັດທະນາເສດຖະກິດ-ສັງຄົມແຫ່ງຊາດໃຫ້ເຕີບໂຕດ້ວຍຈັງຫວະທີ່ຕໍ່ເນື່ອງ, ໜັກແໜ້ນ, ມີສ່ວນສະສົມ ແລະ ແຮໄວ້ສໍາລັບຄົນລຸ້ນຫຼັງ ແລະ ອື່ນຯ.

ທັ້ງໝົດນີ້ ແມ່ນແນໃສ່ບັນລຸທິດທາງ ແລະ ໜ້າທີ່ລວມໃນການພັດທະນາຂະແໜງພະລັງງານ ແລະ ບໍ່ແຮ່ໃນຕໍ່ໜ້ານີ້ທີ່ວາງໄວ້ ຄື: ພັດທະນາພະລັງງານ ແລະ ບໍ່ແຮ່ ຕາມທິດຫັນເປັນອຸດສາຫະກຳແລະທັນສະໄໝ, ຂຸດຄົ້ນທຸກກຳລັງແຮງບົ່ມຊ້ອນຂອງປະເທດຊາດ, ສຸມໃສ່ພັດທະນາອຸດສາ ຫະກຳພະລັງງານໄຟຟ້າ ແລະ ບໍ່ແຮ່ ໃຫ້ເຂົ້າສູ່ລວງເລິກ, ສົ່ງເສີມຫົວໜ່ວຍເສດຖະກິດແຫ່ງຊາດໃຫ້ເຂັ້ມແຂງຕາມທິດ: ຜະລິດພະລັງງານ ແລະ ຂຸດຄົ້ນແຮ່ທາດ ທີ່ສະອາດ, ມີປະສິດທິຜົນ, ເປັນມິດກັບສິ່ງແວດລ້ອມ, ຂະຫຍາຍຕົວແບບໜັກແໜ້ນ, ຕໍ່ເນື່ອງ ແລະຍືນຍົງ.

ໂດຍ: ມົດແດງນ້ອຍ

LEAVE A REPLY

Please enter your comment!
Please enter your name here