ໃນວັນທີ 6 ພະຈິກ 2020, ຄະນະສານ ອາຍາຂັ້ນຕົ້ນ ສານປະຊາຊົນແຂວງອຸດົມໄຊ ໄດ້ເປີດກອງປະຊຸມ ເພື່ອຄົ້ນຄວ້າພິຈາລະນາສໍານວນຄະດີ ໂດຍມີຈໍາເລີຍ 3 ຄົນ ຊື່ ທ້າວ ລາວຫາລີ, ທ້າວ ເລົາທໍ່ ແລະ ທ້າວ ວືແຊ່ເລົາ ໃນສະຖານການສົມຮູ້ຮ່ວມຜະລິດຢາເສບຕິດ, ມີຢາ ເສບຕິດໄວ້ໃນຄອບຄອງ ແລະ ການຜະລິດຢາເສບຕິດປະເພດຢາບ້າ ໂດຍຕັດສິນລົງໂທດຈໍາຄຸກ ແລະ ປະຫານຊີວິດ ພ້ອມທັງຮິບຊັບທີ່ມີ ສ່ວນພົວພັນກັບຢາເສບຕິດຈໍານວນຫຼາຍລາຍການເຂົ້າເປັນຂອງລັດ.

ອົງການໄອຍະການປະຊາຊົນແຂວງອຸດົມໄຊ ຖະແຫຼງໃຫ້ຮູ້ວ່າ: ເຈົ້າໜ້າທີ່ກອງບັນຊາການ ປກສ ແຂວງອຸດົມໄຊ ໄດ້ຮັບແຫຼ່ງຂ່າວວ່າ: ມີກຸ່ມຄົນຈໍານວນໜຶ່ງພົວພັນກັບການຜະລິດຢາເສບຕິດຢູ່ເຂດບ້ານຫຼັກ 44 ເມືອງໄຊ ແຂວງອຸດົມໄຊ ໂດຍອາໄສສວນເປັນບ່ອນຜະລິດຢາເສບ ຕິດ. ຈາກນັ້ນ, ຈຶ່ງໄດ້ແຕ່ງຕັ້ງພະນັກງານວິຊາສະເພາະລົງພິສູດເຫັນວ່າ ມີມູນຄວາມຈິງແທ້; ໃນເວລາ 11:00 ໂມງ ຂອງວັນທີ 28 ກໍລະ ກົດ 2017 ກອງບັນຊາການ ປກສ ແຂວງ ອຸດົມໄຊ ໄດ້ສົມທົບກັບໜ່ວຍສະເພາະກິດກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ກະ ຊວງປ້ອງກັນຄວາມສະຫງົບ ເຂົ້າມ້າງກຸ່ມເປົ້າໝາຍຢູ່ຈຸດດັ່ງກ່າວ ສາມາດຢຶດໄດ້ຂອງກາງ ຄື:

  • ເຄື່ອງອັດຢາບ້າຈໍານວນ 3 ເຄື່ອງ (ເຄື່ອງໃຫຍ່ 1 ເຄື່ອງ, ເຄື່ອງນ້ອຍ 2 ເຄື່ອງ),
  • ລູກອັດຢາບ້າມີ ເຄື່ອງໝາຍ WY ຈໍານວນ 99 ລູກ,
  • ຕູ້ອົບຢາບ້າ 2 ເຄື່ອງ,
  • ຢາບ້າ 1.182 ມັດ ເທົ່າກັບ 2.364. 000 ເມັດ ລວມນ້ໍາໜັກ 282,9 ກິໂລກຼາມ,
  • ຢາຝິ່ນ 6,3 ກິໂລກຼາມ,
  • ກັນຊາອັດແຫ້ງ 1 ແທ່ງ ນ້ໍາໜັກ 1 ກິໂລກຼາມ,
  • ຖົງຢາງເພື່ອບັນຈຸຢາບ້າ 5 ເປົາ ນ້ໍາໜັກ 86,8 ກິ ໂລກຼາມ,
  • ແປ້ງຝຸ່ນສີຂາວ 5 ເປົາ ນ້ໍາໜັກ 89,3 ກິໂລກຼາມ,
  • ແປ້ງຝຸ່ນສີແດງ 1 ຖົງ ນ້ຳໜັກ 11,4 ກິໂລກຼາມ,
  • ແປ້ງຝຸ່ນສີກາເຟ 1 ຖົງ ນໍ້າໜັກ 200 ກຼາມ,
  • ແປ້ງຝຸ່ນສີຂີ້ດິນ 1 ຖົງນ້ຳໜັກ 4 ກິໂລ ກຼາມ,
  • ແປ້ງຝຸ່ນບັນຈຸໃນຖົງ ສີນ້ຳເງິນ 11 ຖົງ ນ້ຳໜັກ 10 ກິໂລກຼາມ,
  • ແປ້ງ ຝຸ່ນບັນຈຸໃນຖົງສີຄຳ 8 ຖົງ ນ້ຳໜັກ 7,6 ກິໂລກຼາມ,
  • ແປ້ງຝຸ່ນບັນຈຸໃນຖົງສີແດງ 2 ຖົງ ນ້ໍາໜັກ 1,6 ກິໂລກຼາມ,
  • ແປ້ງຫອມບັນຈຸໃນປ໋ອງ 3 ປ໋ອງ ນ້ຳໜັກ 2,5 ກິໂລກຼາມ,
  • ແປ້ງຝຸ່ນສີຄຳ 1 ຖົງ ນ້ຳໜັກ 200 ກຼາມ,
  • ນ້ຳສີປະສົມບັນຈຸໃນ ກ໋ອງ 1 ເປົາ ນ້ຳໜັກ 69 ກິໂລກຼາມ,
  • ເຈ້ຍປໍສາ ນ້ຳໜັກ 13 ກິໂລກຼາມ,
  • ຂີ້ເຜິ້ງນ້ຳໜັກ 20 ກິໂລກຼາມ,
  • ປືນ AK 2 ກະບອກ ພ້ອມລູກປືນ 67 ລູກ,
  • ປືນ CKC 1 ກະ ບອກ ພ້ອມລູກປືນ 200 ລູກ,
  • ປືນແວ້ງ 1 ກະບອກ ພ້ອມລູກປືນ 432 ລູກ,
  • ປືນວີແຢັດ 1 ກະບອກ, ປືນ CP 1 ກະບອກ ພ້ອມລູກປືນ ຈໍານວນ 7 ລູກ,
  • ລົດໃຫຍ່ 4 ຄັນຄື: ລົດ LANDCRUISE ສີຂາວ ໝາຍ ເລກທະບຽນ ມທ 8669 ກໍາແພງນະຄອນ,
  • ລົດຈິບຍີ່ຫໍ້ BENZ ສີດໍາ ໝາຍເລກທະບຽນ ກມ 5969 ກໍາແພງນະຄອນ,
  • ລົດກະບະ HUYNDAI ສີຂາວ ( ບໍ່ມີປ້າຍ ) ແລະ ລົດ LEXUS ສີຂາວ ໝາຍເລກທະບຽນ ກຈ 2222 ອຸດົມໄຊ;
  • ເງິນກີບທະນາຄານ 6.000.000 ກີບ,
  • ເງິນໂດລາສະຫະລັດ 710 ໂດລາ, ເງິນ ບາດໄທ 1.116.300 ບາດ,
  • ສາຍຄໍຄໍາ 2 ເສັ້ນ ນ້ໍາໜັກ 15 ກຼາມ, ສາຍ ແຂນເກ້ 1 ເສັ້ນ ນ້ໍາໜັກ 21,6 ກຼາມ; ພ້ອມທັງກວດພົບຢາບ້າອີກ ຈໍານວນ 518 ເມັດ ນ້ໍາໜັກ 48,5 ກຼາມ ຢູ່ຖົງ ເສື້ອຂອງ ທ້າວ ລາວຫາລີ.

ໃນມື້ດຽວກັນ, ເຈົ້າໜ້າທີ່ ກໍໄດ້ເຂົ້າກວດຄົ້ນ ເຮືອນຂອງ ນາງ ຄໍາຮັກ ຢູ່ບ້ານພູຂຽວ ເມືອງໄຊ ( ເຈົ້າຂອງສວນບ່ອນຜະລິດຢາເສບຕິດດັ່ງກ່າວ ) ເຊິ່ງຜ່ານການກວດກາເຮືອນ ພົບເຫັນເຄື່ອງຂອງກາງທັງໝົດ ຄື:

  • ຢາບ້າ 46 ເມັດ,
  • ຝິ່ນ 2 ກ້ອນ ນ້ອຍ,
  • ນ້ຳຢາເຄມີ 6 ແກັດ,
  • ໝໍ້ປະສົມແປ້ງ 2 ໜ່ວຍ,
  • ທຽນໄຂ 2 ເປົາ, ຂີ້ເຜິ້ງ 1 ແຜ່ນ,
  • ຖັງນ້ຳ ມັນລົດດັດແປງ 1 ຖັງ,
  • ຕູ້ເຊັບ 3 ໜ່ວຍ,
  • ຫົວເກັບຂໍ້ມູນກ້ອງວົງຈອນປິດ 2 ຫົວ ພ້ອມກ້ອງວົງຈອນປິດ 4 ຫົວ,
  • ເງິນບາດໄທ 202.000 ບາດ,
  • ເງິນກີບທະນາຄານ 37.200.000 ກີບ,
  • ເງິນໂດລາສະຫະລັດ 100 ໂດລາ,
  • ໂທລະສັບມືຖື 1 ໜ່ວຍ,
  • ເຂົາກະທິງ 4 ຫົວ,
  • ເຂົາກວາງ 1 ຫົວ,
  • ເຂົາຟານ 2 ຫົວ,
  • ເຂົາເຍືອງ 3 ຫົວ,
  • ງ້າວ 4 ດວງ, ມີດ 1 ດວງ,
  • ລົດກະບະ 2 ປະຕູ ຍີ່ຫໍ້ TOYOTA ລຸ້ນ REVO ສີປອນເງິນ ໝາຍເລກທະບຽນ ກພ 6997 ກໍາແພງນະຄອນ ແລະ ລົດເກັງ HYUNDAI ລຸ້ນ SONATA ສີປອນເງິນ ໝາຍເລກທະບຽນ ກຂ 1111 ອຸດົມໄຊ ແລະ ຕູ້ເຊັບ 1 ໜ່ວຍ ຈຶ່ງໄດ້ກວດກາພາຍໃນພົບ ເຫັນວັດຖຸມີຄ່າດັ່ງລຸ່ມນີ້:
  • ເງິນໂດລາສະຫະລັດ 48.600 ໂດລາ,
  • ເງິນບາດໄທ 3.767.000 ບາດ,
  • ເງິນກີບທະນາຄານ 198.000.000 ກີບ,
  • ເງິນ ຢວນ 1.150 ຢວນ,
  • ເງິນເຫຼັ້ມ ຈໍານວນ 15 ເຫຼັ້ມ,
  • ສາຍຄໍຄໍາ 6 ເສັ້ນ ນ້ຳໜັກ 305,8 ກຼາມ,
  • ສາຍ ແຂນຄໍາ 3 ເສັ້ນ ນ້ຳໜັກ 135 ກຼາມ,
  • ສາຍແຂນ ມຸກຍົກ 1 ເສັ້ນ ນ້ຳໜັກ 1 ບາດ,
  • ແຫວນລາຍໄຂ່ປູ ນ້ໍາໜັກ 15 ກຼາມ,
  • ກີ້ສາຍຄໍ ນ້ຳໜັກ 2 ສະຫຼຶງ,
  • ງາຊ້າງ 1 ຄູ່,
  • ນໍແຮດ 1 ອັນ,
  • ຫີນນ້ອຍຄ້າຍຄືແຂ້ວ ສັດ 1 ອັນ,
  • ບັນຊີເງິນຝາກທະນາຄານ 11 ບັນຊີ ມີເງິນໃນບັນຊີ ( ຍອດເຫຼືອທ້າຍ ) ຄື: ເງິນໂດລາສະຫະລັດ 103,80 ໂດລາ, ເງິນບາດໄທ 4.933.543,39 ບາດ, ເງິນກີບທະນາຄານ 596.490.856,96 ກີບ.

ນອກນັ້ນ, ຍັງມີເຮືອນວິນລາຊັ້ນດຽວ ພ້ອມດິນ ເນື້ອທີ່ 763 ຕາແມັດ, ດິນປຸກສ້າງ (ດິນເປົ່າຫວ່າງ) ເນື້ອທີ່ 3.494 ຕາແມັດ ຢູ່ ບ້ານນາແສນຄໍາ ແລະ ດິນທໍາການຜະລິດ (ສວນ -ໜອງປາ ) ເນື້ອທີ່ 12,3 ເຮັກຕາ ຢູ່ບ້ານຫຼັກ 44; ໃນນັ້ນ, ສາມາດກັກຕົວຜູ້ຖືກຫາໄປດໍາ ເນີນຄະດີໄດ້ທັງໝົດ 8 ຄົນ ຍິງ 3 ຄົນ ຄື: ນາງ ຄໍາຮັກ, ທ້າວ ລາວຫາລີ, ທ້າວ ເລົາທໍ່, ທ້າວ ວື ແຊ່ເລົາ, ທ້າວ ເທຈະ, ນາງ ໄມ່ຮົວ ຫຼື ຈົງເຮີ, ທ້າວ ລົງເຮີ ແລະ ນາງ ເຮີ ແລະ ໃນມື້ເຈົ້າໜ້າທີ່ເຂົ້າມ້າງຈຸດດັ່ງກ່າວນັ້ນມີຜູ້ຖືກຫາເອົາຕົວຫຼົບໜີ 3 ຄົນ ຄື: ທ້າວ ສີໃຈວື ຫຼື ຢົງເຊັງວື, ທ້າວ ປາເຢັງ ແລະ ທ້າວ ເຊັ່ງເລົາ.

ຈາກການກວດກາປະຫວັດຂອງທ້າວ ເທຈະ ຕາມປື້ມສໍາມະໂນຄົວ ສະບັບເລກທີ 265, ລົງວັນທີ 20 ທັນວາ 2014, ຜູ້ກ່ຽວເກີດເມື່ອວັນທີ 18 ເມສາ 2000 ຮອດມື້ກະທໍາຜິດ ຜູ້ກ່ຽວຍັງເປັນເດັກ ເຊິ່ງມີອາຍຸພຽງແຕ່ 17 ປີ. ສະນັ້ນ, ເຈົ້າໜ້າທີ່ ຈຶ່ງແຍກໄປດໍາເນີນຄະດີເດັກເປັນເລື່ອງໜຶ່ງຕ່າງຫາກ; ສ່ວນ ທ້າວ ລົງເຮີ ແລະ ນາງ ເຮີ ແມ່ນໃຫ້ການປະຕິເສດບໍ່ຮັບຮູ້ ແລະ ບໍ່ມີສ່ວນກ່ຽວຂ້ອງ ແລະ ພວກຜູ້ຖືກຫາກໍບໍ່ໄດ້ຊັດທອດເຖິງພວກກ່ຽວຈຶ່ງໄດ້ປ່ອຍຕົວທ້າວ ລົງເຮີ ຕາມຄໍາ ສັ່ງປ່ອຍຕົວ ເລກທີ 1071/ປອຊ, ຄໍາສັ່ງປ່ອຍຕົວຜູ້ຖືກຫາ ນາງ ເຮີ ຕາມຄໍາສັ່ງສະບັບເລກທີ 14/ອຍກຂ.ອຊ ແລະ ໃນວັນທີ 6 ເມສາ 2018 ໄດ້ປ່ອຍຕົວພາງ ນາງ ຄໍາຮັກ ແລະ ນາງ ໄມ່ຮົວ ຕາມຄໍາສັ່ງປ່ອຍຕົວພາງ ສະບັບເລກທີ 04,05/ອຍກຂ.ອຊ ໃຫ້ໄປລ້ຽງລູກນ້ອຍ ຕາມບົດລາຍງານຂອງເຈົ້າໜ້າທີ່ສະບັບເລກທີ 480/ປອຊ ແລະ ແຈ້ງການຂອງຫ້ອງ ວ່າການແຂວງອຸດົມໄຊ ສະບັບເລກທີ 137/ຫວກ.ອຊ ໃຫ້ ຈັດຕັ້ງປະຕິບັດຕາມຄໍາເຫັນທີ່ຂຽນໄວ້ໃນບົດລາຍງານຂອງ ກອງບັນຊາການ ປກສ ແຂວງອຸດົມໄຊ ສະບັບເລກທີ 480/ປອຊ, ແຕ່ມາຮອດປັດຈຸບັນພວກກ່ຽວໄດ້ເອົາຕົວຫຼົບຫຼີກ ຈາກການດໍາເນີນຄະດີ ແລະ ບໍ່ສາມາດຮູ້ທີ່ຢູ່ຂອງພວກກ່ຽວ.

ສະນັ້ນ, ຈຶ່ງໄດ້ອອກຄໍາສັ່ງໂຈະການສືບສວນ-ສອບສວນ ຕໍ່ພວກກ່ຽວຕາມຄໍາສັ່ງໂຈະການສືບສວນ-ສອບສວນ ສະ ບັບເລກທີ 01, 02/ອຍກຂ.ອຊ; ສ່ວນຜູ້ຖືກຫາທີ່ໄດ້ເອົາ ຕົວຫຼົບໜີຄື: ທ້າວ ສີໃຈວື, ທ້າວ ປາເຢັງເລົາ ແລະ ທ້າວ ເຊັ່ງເລົາ ເຈົ້າໜ້າທີ່ກໍໄດ້ຕິດຕາມຊອກຫາຕົວພວກກ່ຽວ ເພື່ອ ກັກຕົວມາດໍາເນີນຄະດີ ແຕ່ກໍຍັງບໍ່ສາມາດກັກຕົວພວກກ່ຽວ ໄດ້ເນື່ອງຈາກວ່າ ພວກກ່ຽວໄດ້ເອົາຕົວຫຼົບໜີ, ລີ້ຊ້ອນ ແລະ ບໍ່ຮູ້ບ່ອນຢູ່ຂອງພວກກ່ຽວ ເຈົ້າໜ້າທີ່ຈຶ່ງໄດ້ອອກຄໍາສັ່ງໂຈະ ການສືບສວນ-ສອບສວນພວກກ່ຽວ ຕາມຄໍາສັ່ງໂຈະການ ສືບສວນ-ສອບສວນ ສະບັບເລກ ທີ 1135, 1136,1137/ປອຊ ຖ້າຈັບຕົວພວກກ່ຽວໄດ້ເມື່ອໃດຈຶ່ງຈະນໍາຕົວມາດໍາ ເນີນຄະດີພາຍຫຼັງ.

ຜ່ານການສືບສວນ-ສອບສວນຂອງເຈົ້າໜ້າທີ່ກອງບັນ ຊາການ ປກສ ແຂວງອຸດົມໄຊ ທ້າວ ລາວຫາລີ (ຈໍາເລີຍ 1) ອາຍຸ 50 ປີ ຢູ່ບ້ານຫຼັກ 44 ເມືອງໄຊ ຮັບສາລະພາບ ວ່າ: ໄດ້ເລີ່ມເຂົ້າມາເຮັດວຽກຢູ່ສວນຂອງທ້າວ ສີໃຈວື ບ້ານຫຼັກ 44 ໃນເດືອນມິຖຸນາ 2017 ໂດຍມີໜ້າທີ່ເຝົ້າສວນ ແລະ ເປັນ ຜູ້ຍາມປະຕູທາງເຂົ້າສວນ ໄດ້ຄ່າແຮງງານມື້ລະ 50.000 ເຖິງ 100.000 ກີບ, ພໍຢູ່ໄດ້ 2-3 ວັນ ຈຶ່ງຮູ້ວ່າຢູ່ໃນສວນນັ້ນມີ ການຜະລິດຢາເສບຕິດ ປະເພດຢາບ້າ, ເນື່ອງຈາກວ່າເວລາຕົນເຂົ້າໄປໃນເຮືອນຈະເຫັນກຸ່ມຄົນຈຳນວນໜຶ່ງບັນຈຸຢາບ້າໃສ່ຖົງ ຕົນເຫັນຜູ້ທີ່ມາເຮັດວຽກຢູ່ເຮືອນໃນສວນ ມີ: ທ້າວ ສີໃຈ ວື (ເຈົ້າຂອງສວນ), ທ້າວ ເຊັງເລົາ ( ລູກເຂີຍທ້າວ ສີໃຈວື ), ທ້າວ ວືແຊ່ເລົ່າ, ທ້າວ ເລົາທໍ່, ທ້າວ ເທຈະ ແລະ ອີກ 2-3 ຄົນ ບໍ່ຮູ້ຊື່ ແລະ ແຕ່ລະຄົນມີໜ້າທີ່ ເຮັດຫຍັງແມ່ນບໍ່ຮູ້. ໃນແຕ່ລະ ມື້ຈະມີລົດເຂົ້າ-ອອກຈໍານວນຫຼາຍຄັນ ແຕ່ຕົນບໍ່ຮູ້ວ່າແມ່ນ ລົດປະເພດໃດ, ໝາຍເລກທະບຽນຫຍັງ ແລະ ຜູ້ຂັບລົດມາ ແມ່ນໃຜ, ເພາະຕົນມີໜ້າທີ່ເປີດ-ປິດປະຕູທາງເຂົ້າສວນ ເທົ່ານັ້ນ; ສ່ວນທ້າວ ເລົາທໍ່ ຕົນມາເຮັດວຽກກໍເຫັນຜູ້ກ່ຽວ ເຮັດວຽກຢູ່ສວນນໍາທ້າວ ສີໃຈວື ແລ້ວ, ແຕ່ລະມື້ທ້າວ ເລົ່າທໍ່ ແມ່ນມານອນນໍາຕົນຢູ່ເຮືອນຍາມປະຕູທາງເຂົ້າ ຕື່ນເຊົ້າມາຜູ້ ກ່ຽວກໍຂຶ້ນໄປເຮັດວຽກນໍາທ້າວ ສີໃຈວື ແຕ່ບໍ່ຮູ້ວ່າຜູ້ກ່ຽວມີ ໜ້າທີ່ເຮັດຫຍັງ ຫຼັງຈາກຕົນມາເຮັດວຽກໄດ້ປະມານ 8-9 ວັນ ຈຶ່ງເຫັນ ທ້າວ ວືແຊເລົາ ມາຢູ່ ແລະ ຢູ່ໄດ້ 10 ມື້ ກໍກັບໄປບ້ານ ແລ້ວກໍກັບມາອີກໄດ້ 3 ວັນ ຈຶ່ງຖືກເຈົ້າໜ້າທີ່ກັກຕົວໃນວັນທີ 28 ກໍລະກົດ 2017.

ສ່ວນນາງ ໄມ່ຮົວ ແລະ ນາງ ເຮີ ແມ່ນ ລູກສາວຂອງທ້າວ ສີໃຈວື, ນາງໄມ່ຮົວ ກັບ ທ້າວ ເຊັ່ງເລົາ (ຜົວ-ເມຍ) ແມ່ນນອນປະຈໍາຢູ່ສວນ, ນາງ ເຮີ ແມ່ນ 2-3 ມື້ ມາສວນເທື່ອໜຶ່ງ ບາງຄັ້ງມາແລ້ວກໍກັບ ແລະ ບາງຄັ້ງກໍນອນ ຄ້າງຄືນ, ສຳລັບ ນາງ ຄໍາຮັກ (ເມຍຂອງທ້າວ ສີໃຈວື) ຕົນມາຢູ່ສວນດັ່ງກ່າວແມ່ນບໍ່ເຫັນນາງ ຄໍາຮັກ ມາສວນຈັກຄັ້ງ. ຢາບ້າ ຈໍານວນ 2 ຖົງມີ 518 ເມັດ ທີ່ເຈົ້າໜ້າທີ່ກວດກາພົບເຫັນຢູ່ ໃນຖົງເສື້ອຂອງຕົນນັ້ນແມ່ນໄປເອົານໍາທ້າວ ສີໃຈວື ໃນ ຕອນເຊົ້າຂອງວັນທີ 28 ກໍລະກົດ 2017 ເພື່ອມາເສບເອງ; ຜ່ານມາເຄີຍເສບຢາຝິ່ນມາໄດ້ 10 ກວ່າປີ ແລະ ມາເສບຢາ ບ້າໄດ້ປະມານ 2-3 ປີ ເຊິ່ງເສບມື້ລະ 2-20 ເມັດ ແລະ ເຄີຍໄປເອົາຢາບ້ານໍາ ທ້າວ ສີໃຈວື ມາເສບ 2 ຄັ້ງ ແລະ ເງິນບາດ ໄທຈຳນວນ 210.800 ບາດ ທີ່ເຈົ້າໜ້າທີ່ກວດພົບເຫັນຢູ່ ເຮືອນຍາມບ່ອນທີ່ຕົນ ນອນນັ້ນແມ່ນເງິນຂອງທ້າວ ເລົາທໍ່. ນອກນັ້ນ, ຍັງມີປືນແກັບ 1 ກະບອກ ແລະ ໂທລະສັບມືຖື 1 ໜ່ວຍ ທີ່ເຈົ້າໜ້າທີ່ກວດພົບເຫັນ ແລະ ຢຶດໃວ້ເປັນຂອງກາງ.

ທ້າວ ເລົາທໍ່ (ຈໍາເລີຍ2) ອາຍຸ 47 ປີ ບ້ານໄທສາມັກຄີ ເມືອງວຽງແກ່ນ ແຂວງຊຽງລາຍ ປະເທດໄທ ຮັບສາລະພາບວ່າ: ຜູ້ກ່ຽວເຂົ້າມາລາວ ໃນວັນທີ 21 ກໍລະກົດ 2017 ໂດຍຂີ່ເຮືອໄວອອກຈາກດ່ານຈອມປອງ ມາຂຶ້ນດ່ານເມືອງປາກທາ ແຂວງບໍ່ແກ້ວ (ບໍ່ມີເອກະສານຜ່ານແດນ ຫຼື ພັດສະປອດ ) ແລ້ວຂີ່ລົດໂດຍສານຢູ່ເມືອງຫ້ວຍຊາຍ ມາແຂວງອຸດົມໄຊ ຈຸດປະສົງແມ່ນຈະມາຊອກເຮັດວຽກນໍາ ທ້າວ ລາວຫາລີ ທີ່ເປັນຄົນເຝົ້າສວນ ຢູ່ບ້ານຫຼັກ 44 ແລະ ເມື່ອມາຮອດຕົນ ເຫັນມີຄົນຢູ່ສວນປະມານ 5-6 ຄົນ. ໃນນັ້ນ, ຜູ້ກ່ຽວຮູ້ຊື່ ມີ 2 ຄົນ ຄື: ທ້າວ ລາວຫາລີ ແລະ ທ້າວ ສີໃຈວື ໂດຍໄດ້ມານອນຢູ່ເຮືອນສວນໄດ້ 3 ຄືນແລ້ວ, ທ້າວ ສີໃຈວື ໄດ້ມອບໜ້າທີ່ໃຫ້ຕົນເປັນ ຜູ້ອະນາໄມທໍາຄວາມສະອາດອຸປະກອນທີ່ກ່ຽວຂ້ອງກັບການຜະລິດຢາເສບຕິດ ໂດຍໄດ້ຄ່າຈ້າງມື້ລະ 500 ບາດ ສ່ວນການກິນຢູ່ແມ່ນ ທ້າວ ສີໃຈວື ຮັບຜິດຊອບທັງໝົດ. ສ່ວນຢາເສບຕິດ, ສານເຄມີ, ວັດຖຸອຸປະກອນທີ່ກ່ຽວຂ້ອງກັບຢາເສບຕິດ, ອາວຸດເສິກ, ພາຫະນະ, ວັດຖຸເງິນຄໍາທີ່ເຈົ້າໜ້າທີ່ກວດກາພົບເຫັນ ແລະ ຢຶດໄດ້ຢູ່ສວນຢູ່ບ້ານຫຼັກ 44 ແມ່ນເປັນຂອງ ທ້າວ ສີໃຈວື ແລະ ເວລາຖືກກັກຕົວ ຜູ້ກ່ຽວມີເຄື່ອງຕິດຕົວ ຄື: ໂທລະສັບມືຖື 1 ໜ່ວຍ ສ່ວນວັດຖຸ, ເງິນ, ຄໍາແມ່ນບໍ່ມີ ແລະ ເງິນຈໍານວນ 210.800 ບາດ ທີ່ເຈົ້າໜ້າທີ່ພົບເຫັນຢູ່ເຮືອນຍາມທາງເຂົ້າກໍບໍ່ແມ່ນເງິນຂອງຜູ້ກ່ຽວ.

ທ້າວ ວືແຊເລົ່າ (ຈໍາເລີຍ3) ອາຍຸ 38 ປີ ບ້ານໄທສາມັກຄີ ເມືອງວຽງແກ່ນ ແຂວງຊຽງລາຍ ປະເທດໄທ ໃຫ້ສາລະພາບວ່າ: ໄດ້ເຂົ້າມາປະ ເທດລາວ ໃນວັນທີ 23 ກໍລະກົດ 2017, ເຂົ້າມາທາງຂົວມິດຕະພາບແຂວງບໍ່ແກ້ວ ໂດຍມີ ທ້າວ ເລົາທໍ່ (ຄົນບ້ານດຽວກັນ) ໄດ້ຊັກຊວນໃຫ້ຕົນມາເຮັດວຽກກໍ່ສ້າງຢູ່ແຂວງອຸດົມໄຊ. ເມື່ອມາຮອດໄດ້ໄປພົບ ທ້າວ ເລົາທໍ່ ຢູ່ບ້ານຫຼັກ 44. ຈາກນັ້ນ, ຜູ້ກ່ຽວໄດ້ພາຕົນເຂົ້າໄປເຮັດວຽກຢູ່ສວນ (ຂອງທ້າວ ສີໃຈວື) ໂດຍໄດ້ຄ່າຈ້າງມື້ລະ 400 ບາດ, ໃນມື້ທໍາອິດທີ່ເຂົ້າເຮັດວຽກ. ຜູ້ກ່ຽວ ກໍຮູ້ວ່າຢູ່ໃນສວນດັ່ງກ່າວມີການພົວພັນກັບຢາເສບຕິດ ແລະ ໃນເວລາທີ່ເຈົ້າໜ້າທີ່ເຂົ້າມາຈັບກຸມນັ້ນ ຜູ້ກ່ຽວກໍາລັງຕັດເຫຼັກເພື່ອຕິດຕັ້ງປະຕູ ເມື່ອເຫັນເຈົ້າໜ້າ ທີ່ເຂົ້າມາ ທ້າວ ສີໃຈວື, ທ້າວ ປາເຢັ່ງເລົາ ແລະ ທ້າວ ບຼົງ ທີ່ຢູ່ໃນເຮືອນສວນໄດ້ເອົາຕົວຫຼົບໜີແລ່ນເຂົ້າໄປໃນປ່າ, ທ້າວ ເຊັງເລົາ ໄດ້ອອກໄປຕອນເຊົ້າກ່ອນທີ່ເຈົ້າໜ້າທີ່ຈະເຂົ້າມາ. ສ່ວນ ທ້າວ ເລົາທໍ່ (ຈຳເລີຍ) ມີໜ້າທີ່ເຮັດຫຍັງນັ້ນຜູ້ກ່ຽວບໍ່ຮູ້. ແຕ່ຈະເຫັນຜູ້ກ່ຽວໄປມານໍາ ທ້າວ ສີໃຈວື ເປັນປະຈໍາ; ຕໍ່ກັບພາຫະນະທີ່ຢຶດໄດ້ຢູ່ສວນ ຕາມທີ່ຜູ້ກ່ຽວຮູ້ ມີລົດ LANDCRUISE ສີຂາວ ໝາຍເລກທະບຽນ ມທ 8669 ກໍາແພງນະຄອນ, ລົດຈິບຍີ່ຫໍ້ BENZ ສີດໍາ ໝາຍເລກທະບຽນ ກມ 5969 ກໍາແພງນະຄອນ ແລະ ລົດ LEXUS ສີຂາວ ໝາຍເລກທະບຽນ ກຈ 2222 ອຸດົມໄຊ ໂດຍແມ່ນລົດຂອງ ທ້າວ ສີໃຈວື, ສ່ວນລົດກະບະ HUYNDAI ສີຂາວ (ບໍ່ມີປ້າຍ) ແມ່ນຂອງ ທ້າວ ບຼົງ (ບໍ່ຮູ້ທີ່ຢູ່) ເປັນຜູ້ຖືກຫາທີ່ເອົາຕົວຫຼົບໜີ ແລະ ເວລາຖືກກັກຕົວ ຜູ້ກ່ຽວມີເຄື່ອງຕິດຕົວຄື: ໂທລະສັບ 1 ໜ່ວຍ ແລະ ປື້ມພັດສະປອດ 1 ຫົວ.

ຜ່ານການຄົ້ນຄວ້າ, ກວດກາບັນດາຂໍ້ມູນຫຼັກຖານ ແລະ ເອກະສານຕ່າງໆທີ່ມີຢູ່ໃນສໍານວນຄະດີຢ່າງລະອຽດຖີ່ຖ້ວນ, ຮອບດ້ານ, ພາວະວິໄສ ເຫັນວ່າ: ການກະທໍາຂອງພວກຈໍາເລີຍໃນຄັ້ງນີ້ ມີຄວາມຜິດຕາມຂໍ້ກ່າວຫາແທ້; ເຊິ່ງມັນສະແດງອອກໃນເວລາກັກຕົວ ແລະ ຄໍາປະກອບສາລະພາບຂອງພວກຈໍາເລີຍທີ່ກ່າວມາຂ້າງເທິງຢ່າງແທ້ຈິງ ແລະ ເຫັນວ່າ ເປັນການຮ່ວມກັນກະທໍາຕາມກົດໝາຍອາຍາ ມາດຕາ 17, ເຊິ່ງສະແດງອອກ ທ້າວ ສີໃຈວື (ຜູ້ເອົາຕົວຫຼົບໜີ ) ເປັນຫົວໂປ່-ຕົວການທີ່ພົວພັນກັບຢາເສບຕິດໃນຄັ້ງນີ້ ແລະ ໄດ້ແບ່ງຄວາມຮັບຜິດຊອບໃຫ້ແຕ່ລະຄົນ ຄື: ໃຫ້ຈໍາເລີຍ 1 ເປັນຜູ້ຍາມປະຕູເພື່ອຕິດຕາມເບິ່ງການເຄື່ອນໄຫວຂອງຄົນພາຍນອກ, ຈໍາເລີຍ 2 ມີໜ້າທີ່ອະນາໄມທໍາຄວາມສະອາດອຸປະກອນທີ່ກ່ຽວຂ້ອງກັບຢາເສບຕິດ ແລະ ຈໍາເລີຍ 3 ມີໜ້າທີ່ຕິດຕັ້ງໂຮງເຮືອນເກັບມ້ຽນຢາເສບຕິດ; ໝາຍຄວາມວ່າ: ຈໍາເລີຍ 1 ເປັນຜູ້ສົມຮູ້ຮ່ວມຄິດເພາະໄດ້ໃຫ້ການຊ່ວຍເຫຼືອໃນການເປັນຜູ້ຍາມປະຕູເຂົ້າ-ອອກສວນ ແລະ ປົກປິດການກະທໍາຜິດດັ່ງກ່າວ; ສ່ວນຈໍາເລີຍ 2 ແລະ ຈໍາເລີຍ 3 ເປັນຜູ້ປະຕິບັດເພາະພວກກ່ຽວ ເປັນຜູ້ລົງມືກະທໍາຜິດໂດຍກົງ ເພາະໄດ້ຕິດຕັ້ງໂຮງເຮືອນບ່ອນເກັບມ້ຽນຢາບ້າ ແລະ ອະນາໄມອຸປະກອນຕ່າງໆ ແລະ ໄດ້ເຂົ້າຮ່ວມໃນຂະບວນການກັບ ທ້າວ ສີໃຈວື.

ເຫັນວ່າ: ພວກຈໍາເລີຍ ເປັນບຸກຄົນທີ່ມີສະຕິສໍາປະຊັນຍະສົມບູນດີ ແລະ ເຖິງກະສຽນອາຍຸທາງອາຍາ; ສາມາດຮູ້ໄດ້ເຖິງຜົນສະທ້ອນຂອງການກະທໍາຂອງຕົນວ່າ ການພົວພັນຢາເສບຕິດ ເປັນສິ່ງທີ່ຜິດຕໍ່ກົດໝາຍອາຍາ ແຕ່ພວກຈໍາເລີຍ ກໍຍັງມີເຈດຕະນາກະທໍາຜິດ ເພື່ອຫວັງຜົນປະໂຫຍດໂດຍບໍ່ຖືກຕ້ອງຕາມກົດໝາຍ. ດັ່ງນັ້ນ, ພວກຈໍາເລີຍຕ້ອງຮັບຜິດຊອບຕໍ່ການກະທໍາທີ່ພວກຕົນກໍ່ຂຶ້ນ.

ດ້ວຍເຫດນີ້, ຄະນະສານອາຍາຂັ້ນຕົ້ນ ຂອງສານປະຊາຊົນແຂວງອຸດົມໄຊ ຈຶ່ງໄດ້ພິຈາລະນາຕັດສິນຕາມຄໍາຕັດສິນ ເລກທີ 108/ຂຕ.ອ, ລົງວັນທີ 6 ພະຈິກ 2020 ບອກວ່າ: ຕັດສິນ ທ້າວ ລາວຫາລີ ( ຈໍາເລີຍ 1 ) ມີຄວາມ ຜິດທາງອາຍາໃນການສົມຜູ້ຮ່ວມຄິດກັບຂະບວນການຢາເສບຕິດ ແລະ ມີຢາເສບຕິດປະເພດຢາບ້າໄວ້ໃນຄອບຄອງ ຖືກສານລົງໂທດຕັດອິດສະລະພາບ 20 ປີ ແລະ ປັບໃໝ 110.000.000 ກີບ; ສ່ວນ ທ້າວ ເລົາທໍ່ ( ຈໍາເລີຍ 2 ) ແລະ ທ້າວ ວືແຊ່ເລົາ ( ຈໍາເລີຍ 3 ) ມີຄວາມຜິດທາງອາຍາໃນການຜະລິດຢາເສບຕິດປະເພດຢາບ້າ ຖືກສານລົງໂທດປະຫານຊີວິດ.

ສໍາລັບເຄື່ອງຂອງທີ່ມີສ່ວນພົວພັນກັບຢາເສບຕິດປະເພດຢາເສບຕິດ ແມ່ນຮິບໄປທໍາລາຍຖິ້ມ, ສ່ວນວັນຖຸເງິນ-ຄໍາ, ພາຫະນະ ແລະ ດິນປຸກສ້າງ 1 ຕອນ ແມ່ນຮິບເຂົ້າເປັນຂອງລັດ, ສ່ວນດິນ 2 ຕອນ ທີ່ບໍ່ມີສ່ວນພົວພັນກັບຢາເສບຕິດແມ່ນສົ່ງຄືນໃຫ້ແກ່ພວກຈໍາເລີຍ.

LEAVE A REPLY

Please enter your comment!
Please enter your name here