ໃນສັງຄົມປະຈຸບັນ ບັນຫາລັກຊັບພົນລະເມືອງ, ຍັງເກີດຂື້ນຫຼາຍຢູ່ບັນດາບ້ານ, ເມືອງ, ແຂວງໃນຂອບເຂດທົ່ວປະເທດ ເຊິ່ງບັນຫາດັ່ງກ່າວມັນໄດ້ສ້າງຄວາມບໍ່ສະຫງົບ ທັງເປັນການກົດໜວ່ງຖວ່ງດຶງການສ້າງສາພັດທະນາປະເທດຊາດ ແລະ ຍັງສ້າງຄວາມເສຍຫາຍໃຫ້ແກ່ຊັບສິນຂອງລັດ ແລະ ຂອງລວມໝູ່ ກໍ່ຄືຂອງບຸກຄົນ, ເຖິງແມ່ນວ່າໄລຍະຜ່ານມາ ທາງເຈົ້າໜ້າທີ່ໄດ້ເອົາໃຈໃສ່ສະກັດກັ້ນ ແລະ ແກ້ໄຂຫຼາຍປານໃດກໍ່ຕາມແຕ່ບັນຫາດັ່ງກ່າວກໍ່ຍັງເກີດຂື້ນຢູ່ ດັ່ງທີ່ພວກເຮົາໄດ້ຮູ້ໄດ້ເຫັນທາງໂທລະພາບ, ເຟສບຸກ ແລະ ສື່ຕ່າງໆ ສະເພາະ ຢູ່ເມືອງໜື່ນ ແຂວງວຽງຈັນ ກໍ່ເກີດມີ ການລັກຊັບພົນລະເມືອງ ຜ່ານການລົງກວດກາຊັນນະສູດສະຖານທີ່ເກີດເຫດ ຂອງເຈົ້າໜ້າທີ່ ເຫັນວ່າມີມູນຄວາມຈິງ ຈຶ່ງໄດ້ຂື້ນບັນຊີເປົ້າໝາຍ ແລະ ຕິດຕາມເປົ້າໝາຍ ໃຊ້ເວລາຫຼາຍວັນ ຈຶ່ງສາມາດຈັບຕົວເປົ້າໝາຍໄດ້ຄື: ທ້າວ ເພັດ ອາຍຸ 27 ປີ, ກໍາມະກອນ, ຢູ່ບ້ານ ນາປ່າໄຜ່ ເມືອງໝື່ນ ແຂວງວຽງຈັນ ໃນຄັ້ງວັນທີ 27 ກັນຍາ 2020 ຜ່ານມານີ້ໃນຂໍ້ຫາລັກຊັບພົນລະເມືອງ ມາດຳເນີນການສືບສວນ-ສອບສວນ.

ຜ່ານການສືບສວນ-ສອບສວນ ຂອງເຈົ້າໜ້າທີ່ ປກສ ເມືອງໝື່ນແຂວງວຽງຈັນ ທ້າວເພັດ ໃຫ້ການຮັບສາລະພາບວ່າ: ໃນໄລຍະເດືອນ ມີຖຸນາ 2020 ຜ່ານມາຕົນເອງໄດ້ໄປລັກລົດເວບຮ້ອຍ ສີຂຽວດໍາ ຢູ່ຂອບເຂດ ເມືອງຫີນເຫີບ ແຂວງວຽງຈັນ ເມື່ອໄດ້ລົດແລ້ວກໍ່ເອົາໄປຂາຍໃຫ້ປະຊາຊົນບ້ານນາປ່າໄຜ່ ເມືອງໜື່ນ ໃນລາຄາ 2.100.000 ກີບ, ຕົກມາຮອດໄລະຍະເດືອນ ກັນຍາ 2020 ຜ່ານມາ ຕົນເອງໄດ້ໄປລັກລົດຈັກເວບຈີນ ຈໍານວນ 5 ຄັນ ຢູ່ຂອບເຂດບ້ານນໍ້າເພີນ, ໂພນວິໄລ ເມືອງໜື່ນ ແລ້ວກໍ່ໄດ້ເອົາໄປຂາຍໃຫ້ຮ້ານຊື້ເຫຼັກເສດ ຢູ່ເມືອງຊະນະຄາມ ໃນລາຄາຄັນລະ 200.000 – 320.000 ກີບ ເມື່ອໄດ້ເງີນມາແລ້ວແຕ່ລະຄັ້ງກໍ່ໄດ້ເອົາໄປຊື້ຢາບ້າມາເສບ ແລະ ໃຊ້ຈ່າຍຫຼິ້ນກິນຟຸມເຟືອຍຈົນໝົດ ຕົກມາຮອດວັນທີ່ 28 ກັນຍາ 2020 ຈຶ່ງຖືກເຈົ້າໜ້າທີ່ກັກຕົວ ພ້ອມຂອງກາງລົດຈັກ ແລະ ຢາເສບຕິດ ຈໍານວນ 55 ເມັດ ທີ່ຊຸກເຊື່ອງໄວ້ໃນກະເປົ່າຜູ້ກ່ຽວ.

ຜ່ານການສັງເກດຕີລາຄາຂອງເຈົ້າໜ້າທີ່ ທ້າວເພັດ ແມ່ນມີເຈດຕະນາລັກຊັບພົນລະເມືອງ ແລະ ມີຢາເສບຕິດປະເພດຢາບ້າໄວ້ຄອບຄອງ ຢ່າງແທ້ຈິງ ເຊິ່ງການກະທໍາດັ່ງກ່າວແມ່ນຜິດຕໍ່ກົດໝາຍອາຍາ ໃນມາດຕາ 231 ແລະ ໃນມາດຕາ 320 ຂອງກົດໝາຍອາຍາສະບັບປັບປຸງ ໃນປີ 2017ປະຈຸບັນໄດ້ເກັບກູ້ ແລະ ທ້ອນໂຮມລົດຈັກຈໍານວນດັ່ງກ່າວ ມາໄວ້ກອງບັນຊາການ ປກສ ເມືອງໝື່ນ ແລະ ໄດ້ສົ່ງຄືນໃຫ້ເຈົ້າຂອງເດີມຈໍານວນໜຶ່ງ ສ່ວນລົດຈັກທີ່ຍັງເກັບກູ້ບໍ່ທັນໄດ້ເຈົ້າໜ້າທີ່ພວກເຮົາແມ່ນຈະໄດ້ສືບຕໍ່ລົງເກັບກູ້ ແລະ ສົ່ງຄືນໃຫ້ເຈົ້າຂອງເດີມ.

ເຈົ້າໜ້າທີ່ຍັງໃຫ້ຮູ້ຕື່ມອິກວ່າ: ຜູ້ກ່ຽວແມ່ນເຄີຍຖຶກດໍາເນີນຄະດີ ມາແລ້ວ 1 ຄັ້ງ ໃນຂໍ້ກ່າວຫາລັກຊັບພົນລະເມືອງ

LEAVE A REPLY

Please enter your comment!
Please enter your name here