Thursday, January 27, 2022

ຄົນລາວຈໍານວນ 150 ຄົນຈະໄດ້ເຮັດວຽກກ່ຽວກັບການສ້ອມແປງ ແລະ ຂັບລົດໄຟຢູ່ທີ່ໂຄງການທາງລົດໄຟລາວ-ຈີນ

ກຸ່ມບໍລິສັດວິສະວະກຳທາງລົດໄຟເລກ 2 ສປ ຈີນ ຈັດຝຶກອົບຮົມເປັນເວລາ 4 ເດືອນກ່ຽວກັບການສ້ອມແປງ ແລະ ວິທີຂັບລົດໄຟ ລາວ-ຈີນ ຈໍານວນ 150 ຄົນ (ຍິງ 4 ຄົນ) ທີ່ເປັນຄົນລາວ ເລີ່ມແຕ່ອາທິດທີ່ຜ່ານມາ ຢູ່ທີ່ສະຖານທີ່ວາງລາງລົດໄຟ ເຂດເມືອງນາຊາຍທອງ ນະຄອນຫຼວງວຽງຈັນ ພາຍຫຼັງທີ່ເຂົາເຈົ້າໄດ້ຮຽນຮູ້ພາກທິດສະດີມາແລ້ວ ໃນໄລຍະທີ່ຜ່ານມາ ຢູ່ສະຖາບັນຂົງຈື ມະຫາວິທະຍາໄລແຫ່ງຊາດ (ດົງໂດກ) ເພື່ອກຽມຄວາມພ້ອມບັນຈຸເຂົ້າເຮັດວຽກໃນຂະແໜງຕ່າງໆຢູ່ໂຄງການລົດໄຟລາວ-ຈີນກ່ອນທີ່ຈະເປີດໃນທ້າຍປີ 2021 ນີ້.

ຄະນະອຳນວຍການບໍລິສັດທາງລົດໄຟລາວ-ຈີນ ທ່ານ ຈຽນ ຊູ ໝິງ ຊຶ່ງເປັນຜູ້ຮັບຜິດຊອບຄັດເລືອກພະນັກງານ ແລະ ຝຶກອົບຮົມພະນັກງານໃໝ່ໄດ້ໃຫ້ຮູ້ວ່າ: ການລົງສຶກສາຮໍ່າຮຽນຕົວຈິງ ໃນຄັ້ງນີ້, ເພື່ອໃຫ້ສຳມະນາກອນໄດ້ມາສຳພັດກັບຕົວຈິງເພື່ອຮຽນຮູ້ກ່ຽວກັບລະບົບພື້ນຖານຂອງລົດໄຟ, ລະບົບເຄື່ອງຈັກ, ລະບົບຄວາມປອດໄພ, ຂັ້ນຕອນການສ້ອມແປງ, ການຕິດຕາມກວດກາລົດເວລາລົດມາຈອດ, ວິທີການຂຶ້ນ-ລົງຫົວລົດໄຟ ແລະ ອື່ນໆ.

ຫຼັງຈາກການຝຶກອົບຮົມເປັນເວລາ 4 ເດືອນ ຢູ່ລາວ, ນັກສໍາມະນາກອນລາວຈໍານວນ 150 ຄົນກໍ່ຈະໄດ້ໄປສຳພັດຕົວຈິງ ແລະ ຮຽນຂັບລົດໄຟ ຢູ່ຄຸນໝິງ ສປ ຈີນ ກ່ອນທີ່ຈະກັບມາສອບເສັງຄັດເລືອກເອົາພະນັກງານ ເຂົ້າມາບັນຈຸເຮັດວຽກຢູ່ໃນຂະແໝງການຕ່າງໆຂອງໂຄງການທາງລົດໄຟຢູ່ລາວ.

- Advertisment -

Most Popular