ໃນວັນທີ 5 ພະຈິກ 2020 ນີ້, ຢູ່ທີ່ບໍລິສັດນ້ຳຕານມິດລາວ ບ້ານແກ້ງແຮດ ເມືອງໄຊບູລີ ແຂວງສະຫວັນນະເຂດ, ໄດ້ຈັດພິທີກວດກາວັດແທກຊິງຊັ່ງອ້ອຍ ຂອງບໍລິສັດດັ່ງກ່າວຂຶ້ນ, ໂດຍການເຂົ້າຮ່ວມຂອງທ່ານ ສີວິໄລ ອິນທະລືໄຊ ຮອງເຈົ້າ ເມືອງໄຊບູລີ, ທ່ານ ບຸນເຄືອບ ແກ້ວມະນີ ຮອງຫົວໜ້າພະແນກວິທະຍາສາດ ແລະ ເຕັກໂນໂລ ຊີແຂວງ, ທ່ານ ສະອາດ ປັນຍາດິດວົງ ຜູ້ອຳນວຍການດ້ານ ອ້ອຍບໍລິສັດນ້ຳຕານມິດລາວພ້ອມດ້ວຍວິຊາການຈາກກົມມາດຕະຖານ ແລະ ວັດແທກກະຊວງວິທະຍາສາດ ແລະ ເຕັກໂນໂລຊີ, ຕະຫຼອດເຖິງຕົວແທນຊາວສວນອ້ອຍເຂົ້າຮ່ວມ.

ຈຸດປະສົງໃນການກວດກາ ວັດແທກຊິງຊັ່ງອ້ອຍຂອງບໍລິສັດນ້ຳຕານມິດລາວຈຳກັດປະ ຈຳປີ 2020-2021 ນີ້, ກໍ່ເພື່ອເປັນການຮັບປະກັນທາງດ້ານຊິງຊັ່ງນ້ຳໜັກທີ່ໄດ້ມາດຕະຖານ, ຍຸຕິທຳລະຫວ່າງຜູ້ຊື້ ແລະ ຜູ້ຂາຍຄືບໍລິສັດນ້ຳຕານມິດລາວກັບຊາວສວນອ້ອຍ, ຊຶ່ງໃນ ແຕ່ລະປີທາງກົມມາດຕະຖານ ແລະ ວັດແທກກະຊວງວິທະຍາສາດ ແລະ ເຕັກໂນໂລຊີຈະໄດ້ລົງກວດກາວັດແທກຊິງຊັ່ງອ້ອຍຂອງບໍລິສັດນ້ຳຕານມິດລາວປີລະຄັ້ງ.

ໃນນີ້ທາງວິຊາ ການກົມມາດຕະຖານ ແລະ ວັດແທກແມ່ນໄດ້ທຳການກວດເຊັກຂາໂຫຼດເຊວທັງ 6 ຂາ, ໂດຍກວດກາໄປແຕ່ລະຂາ, ຫຼັງຈາກນັ້ນແມ່ນໄດ້ເອົາແມ່ແບບມາຢາຍໝົດແຜ່ນເມື່ອເຫັນວ່າຊິງຊັ່ງໄດ້ມາດຕະຖານແລ້ວທາງພາກສ່ວນທີ່ກ່ຽວຂ້ອງຈຶ່ງໄດ້ທຳການລັອກກິບ ແລະ ຫົວອ່ານຄອມພີວເຕີຢ່າງຄັກແນ່ເພື່ອຮັບປະກັນດ້ານມາດຕະຖານ.

ໂອກາດນີ້ ທ່ານ ສະອາດ ປັນຍາດິດວົງ ຜູ້ອຳນວຍການ ດ້ານອ້ອຍຂອງບໍລິສັດນ້ຳຕານ ມິດລາວຍັງໄດ້ໃຫ້ສຳພາດຕໍ່ຜູ້ສື່ຂ່າວພວກເຮົາວ່າ: ທາງບໍລິສັດ ຈະໄດ້ເປີດຫີບອ້ອຍໃນຄັ້ງວັນທີ 17 ທັນວາໄປຈົນຮອດ ເດືອນມີນາ 2021 ຄາດວ່າປີນີ້ຈະມີອ້ອຍປ້ອນເຂົ້າໂຮງງານປະມານ 4 ແສນໂຕນ, ຊຶ່ງຈະຫຼຸດລົງຈາກປີຜ່ານມາປະມານ 1 ແສນໂຕນ. ສາເຫດແມ່ນເນື່ອງມາຈາກປະລິມານນ້ຳຝົນໜ້ອຍກວ່າປີຜ່ານມາ ແລະປີນີ້ເປັນປີທີ່ຊາວສວນອ້ອຍພັກດິນເພື່ອມາປູກອີກໃນປີຕໍ່ໄປຈຶ່ງເຮັດໃຫ້ອ້ອຍເຫຼືອປະມານ 4 ແສນໂຕນ.

ເຊິ່ງປີນີ້ມີອ້ອຍທີ່ປູກທັງໝົດໃນເນື້ອທີ່ 7.200 ເຮັກຕາ, ລວມທັງເນື້ອ ທີ່ຂອງບໍລິສັດ ແລະຂອງປະຊາຊົນ. ສ່ວນວ່າລາຄາອ້ອຍຈະມີ 3 ປະເພດຄື: ອ້ອຍຊີວະພາບລາຄາ 337.500 ກີບ/ໂຕນ, ອ້ອຍງາມ 350.000 ກີບ/ໂຕນ ແລະອ້ອຍປ່ຽນຖ່າຍ 312.500 ກີບ/ໂຕນ. ນອກນັ້ນ ທາງບໍລິສັດ ຍັງມີໂບນັດໃຫ້ກັບຊາວສວນອ້ອຍຕື່ມອີກເປັນ ຕົ້ນ: ອ້ອຍງາມ, ຕັດອ້ອຍແລ້ວ ຈົ່ງໃບໄວ້ໃນດິນສວນອ້ອຍ ແລະ ລາງວັນອື່ນໆອີກ.

LEAVE A REPLY

Please enter your comment!
Please enter your name here