ລາວ ແລະ ໄທ ລ້ວນແຕ່ເປັນສະມາຊິກອາຊຽນ, ທັງເປັນປະເທດເພື່ອນບ້ານໃກ້ຄຽງ ທີ່ມີຊາຍແດນຕິດຈອດກັນຫລາຍພັນກິໂລແມັດ. ປະຊາຊົນສອງຊາດ ມີມູນເຊື້ອການ ພົວພັນອັນດີ, ໄປມາຫາສູ່ ແລກປ່ຽນຊື້ຂາຍນໍາກັນ ມາແຕ່ບູຮານນະການ, ມີພາສາທີ່ໃກ້ຄຽງກັນ ເຖິງແມ່ນບໍ່ໃຊ້ລ່າມແປ ກໍ່ເຂົ້າໃຈກັນໄດ້ໂດຍພື້ນຖານ.

ການພົວພັນຮ່ວມມືທີ່ເປັນມູນເຊື້ອອັນດີງາມ ລະຫວ່າງ ສອງປະເທດ ລາວ-ໄທ ຕະຫລອດໄລຍະ 7 ທົດສະວັດ ຜ່ານມາ ນັບມື້ໄດ້ຮັບການເສີມຂະຫຍາຍ ຢ່າງກວ້າງ ຂວາງ ແລະ ມີຜົນສໍາເລັດຕົວຈິງ ຊຶ່ງເຫັນໄດ້ຈາກສອງປະເທດໄດ້ມີການແລກປ່ຽນການຢ້ຽມຢາມ ລະຫວ່າງ ການນໍາຂັ້ນສູງຂອງສອງປະເທດ ຢ່າງເປັນປົກກະຕິ ແລະ ມີການຮ່ວມມືທີ່ດີນໍາກັນໃນດ້ານຕ່າງໆ ເປັນຕົ້ນແມ່ນດ້ານການຄ້າ, ການລົງທຶນ, ການສຶກສາ, ສາທາລະນະສຸກ ແລະ ອື່ນໆ.

ເວົ້າສະເພາະການພົວພັນຂົງເຂດວຽກງານສື່ມວນຊົນ ລາວ-ໄທ ກໍ່ໄດ້ມີກົນໄກການຮ່ວມມືຜ່ານຫລາຍຊ່ອງທາງ ຊຶ່ງຕົ້ນຕໍແມ່ນການຮ່ວມມືຜ່ານສະມາຄົມນັກຂ່າວແຫ່ງ ສປປ ລາວ ແລະ ສະມາຄົມນັກຂ່າວ ນັກໜັງສືພິມແຫ່ງປະເທດໄທ ໂດຍໄດ້ມີການແລກປ່ຽນຂໍ້ມູນຂ່າວສານ, ການຢ້ຽມຢາມຂອງຄະນະຜູ້ແທນໃນລະດັບຕ່າງໆ ຢ່າງເປັນປົກກະຕິ, ພ້ອມກັນສົ່ງເສີມສາຍພົວພັນອັນດີງາມລະຫວ່າງສອງປະເທດ ໄດ້ເປັນຢ່າງດີ.

ປີ 2020 ເປັນວາລະຄົບຮອບ 70 ປີ ວັນສ້າງຕັ້ງສາຍພົວພັນການທູດ ລາວ-ໄທ (19 ທັນວາ 1950-19 ທັນວາ 2020) ຊຶ່ງສອງປະເທດ ໄດ້ມີການກະກຽມຈັດຕັ້ງສະ ເຫລີມສະຫລອງໃຫ້ຄຶກຄື້ນ, ແຕ່ຍ້ອນສະພາບການລະບາດຂອງພະຍາດໂຄວິດ-19 ມາແຕ່ຕົ້ນປີ, ຫລາຍກິດຈະກໍາທີ່ມີແຜນຮ່ວມກັນຈັດ ກໍ່ໄດ້ຖືກໂຈະໄວ້, ກິດຈະກໍາບາງອັນ ໄດ້ໝູນໃຊ້ຜ່ານລະບົບອອນລາຍ ເພື່ອການປ້ອງກັນພະຍາດ ຕາມມາດຕະການຂອງແຕ່ລະປະເທດ.

ແຕ່ເຖິງຢ່າງໃດກໍ່ຕາມ ກໍ່ຍັງມີຄວາມພະຍາຍາມທີ່ບໍ່ສ້າງສັນ ໃນການສະເໜີຂ່າວ ຄື ໃນວັນທີ 20 ຕຸລາ 2020,ໂທລະພາບຊ່ອງ 3 ຂອງໄທ ໄດ້ຍົກເອົາປະເດັນໃນສື່ອອນລາຍ ທີ່ອ້າງວ່າເປັນຂອງຄົນລາວ ມີເນື້ອໃນເປັນພາສາໄທ ໃນລັກສະນະວ່າ ຖ້າການເມືອງລາວດີ…ເປັນຫຍັງຄົນທຸກຢູ່ລາວບໍ່ໄດ້ຮຽນຕໍ່, ເປັນຫຍັງນັກສຶກສາລາວຈົບມາແລ້ວ ຈຶ່ງບໍ່ມີວຽກເຮັດ…ລວມທັງຍົກບັນຫາໄພນໍ້າຖ້ວມ, ຖະໜົນ…ໂດຍອ້າງວ່າ ປະ ເດັນນີ້ ຕິດເທຣນທະ ວິດເຕີ ອັນດັບສອງໃນປະເທດໄທ… ໃນວັນດັ່ງກ່າວ.

ຜູ້ອ່ານຂ່າວຊ່ອງນີ້ພະຍາຍາມເວົ້າດຶງຄວາມສົນໃຈ ວ່າ ບໍ່ສະ ເພາະແຕ່ປະເທດໄທ ທີ່ກໍາລັງມີກຸ່ມຄົນຕ້ອງການໃຫ້ມີການປ່ຽນແປງ, ຢູ່ສປປ ລາວ ກໍ່ມີຄົນຕ້ອງການໃຫ້ມີການປ່ຽນຄືກັນ…ກ່ອນໜ້ານີ້ ກໍ່ມີກໍລະນີ ທ້າວ ຈັດ ທີມະ ຜູ້ອ່ານຂ່າວຢູ່ໂທລະພາບຊ່ອງ 1 ຂອງໄທ ໄດ້ນໍາສະເໜີຂໍ້ມູນບໍ່ຖືກຕ້ອງກ່ຽວກັບການຮັບມືພະຍາດໂຄວິດ-19 ຢູ່ລາວ ເມື່ອເດືອນມີນາ 2020 ວິພາກວິຈານວ່າຍັງຫລ້າຫລັງຫລາຍ ໂດຍບໍ່ມີຂໍ້ມູນຄວາມເປັນຈິງກ່ຽວ ກັບວຽກງານສາທາລະນະສຸກຂອງລາວທີ່ມີການພັດທະນານັບມື້ທັນສະ ໄໝ, ຈົນຜູ້ກ່ຽວ ແລະ ຜູ້ບໍລິຫານໄດ້ເຂົ້າໄປຂໍໂທດຄົນລາວ ຜ່ານທູດລາວ ທີ່ບາງກອກ.

ບັນຫາທີ່ຖືກຍົກຂຶ້ນ ສະທ້ອນໃຫ້ເຫັນອີກແງ່ມູມ ຄວາມບໍ່ຫວັງດີຂອງບາງສື່ຫລັກຂອງໄທ ຕໍ່ ສປປ ລາວ, ຫລື ເປັນຄວາມຕັ້ງໃຈປຸກລະດົມໃຫ້ເກີດກະແສຄວາມບໍ່ສະຫງົບໃນປະເທດເພື່ອນບ້ານ? ອ້າງເສລີພາບຂອງສື່ ໂດຍບໍ່ໄດ້ຄໍານຶງເຖິງຄວາມໝາຍແທ້ຈິງຂອງຄໍາວ່າ ເສລີພາບ ດ້ວຍການເບິ່ງບັນຫາແຕ່ດ້ານດຽວ? ຕະຫລອດໄລຍະຜ່ານມາ, ສື່ຫລັກຂອງລາວ ບໍ່ເຄີຍຍົກປະເດັນທີ່ອາດຈະເປັນຜົນກະທົບຕໍ່ເພື່ອນບ້ານ, ມີແຕ່ບາງຄັ້ງຄາວ ໄດ້ຊີ້ແຈງຕອບຄືນ ຫລັງຈາກເກີດກໍລະນີບາງສື່ຂອງໄທ ກາຍເສັ້ນລະຫວ່າງປະເທດ. ເສລີພາບ ກໍ່ມີຂອບເຂດຂອງມັນ, ຂອບເຂດເສລີ ພາບຂອງຕົນເອງມັນພົວພັນກັບເສລີພາບຂອງຜູ້ອື່ນ ກໍ່ຄືການບໍ່ລ່ວງລະເມີດຜູ້ອື່ນ.

ຄົນລາວ ແລະ ຄົນໄທ ເວົ້າລວມ, ເວົ້າສະເພາະສື່ ລາວ-ໄທ ທີ່ຮັກສັນຕິພາບ, ເສລີ ພາບ ຕ້ອງຊ່ວຍກັນຮັກສາຄວາມສາມັກຄີຮັກແພງອັນເປັນມູນເຊື້ອ, ສົ່ງເສີມບັນ ຍາກາດອັນດີຂອງແຕ່ລະປະເທດ, ບໍ່ຄວນຈັບປະເດັນທີ່ພົບເຫັນໃນສື່ອອນລາຍ ໂດຍບໍ່ມີການກວດສອບ ມາເຜີຍແຜ່ໃຫ້ເສຍຈັນຍາບັນສື່…ພວກເຮົາຕ້ອງມີສະຕິ, ເຄົາ ລົບ, ໃຫ້ກຽດ, ຊ່ວຍເຫລືອອູ້ມຊູ ເຊິ່ງກັນ ແລະ ກັນ ພ້ອມກັນຮ່ວມມືພັດທະນາ, ປະ ກອບສ່ວນສ້າງປະຊາຄົມວັດທະນະທໍາສັງຄົມ ໃຫ້ເປັນປະຊາຄົມທີ່ໂອບເອື້ອອາລີ ມີນໍ້າໃຈຊ່ວຍເຫລືອກັນ ຕາມບົດບາດ ແລະ ສັກສີຂອງສື່ມວນຊົນອາຊຽນ.

ໂດຍ: ລູກຊຽງ

LEAVE A REPLY

Please enter your comment!
Please enter your name here