ວັນທີ 28 ຕຸລານີ້ ທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງ ສະຫວັນນະເຂດ ພ້ອມດ້ວຍ 7 ພະແນກການອ້ອມຂ້າງແຂວງ ໄດ້ລົງມອບເຄື່ອງແລະ ເງີນສົດໃຫ້ກັບປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມ ຢູ່ເມືອງທ່າປາງທອງ ໂດຍການຕ້ອນຮັບຂອງທ່ານ ຄຳປະສົງ ຂົງຄຳ ເຈົ້າເມືອງທ່າປາງທອງພ້ອມຄະນະກຳມະການຕ້ານໄພພິບັດຂັ້ນເມືອງ.

.

ເຄື່ອງບັນເທົາທຸກ ແລະ ເງີນສົດທີ່ການນຳແຂວງໄດ້ນຳມາມອບໃຫ້ໃນຄັ້ງນີ້ມີ : ເງີນສົດຈຳນວນ 40 ລ້ານກີບ ທີ່ໄດ້ຈາກລັດຖະບານມອບໃຫ້ ເພື່ອນຳໃຊ້ເຂົ້າໃນວຽກງານຕ້ານໄພພິບັດ ໃນນີ້ພະແນກກະສິກຳ ແລະ ປ່າໄມ້ແຂວງ ມອບ 2 ລ້ານກີບ , ພະແນກການເງີນແຂວງ 1 ລ້ານ 5 ແສນກີບ , ພະແນກແຮງງານ ສະຫວັດດີການສັງຄົມມອບເສື້ອຊູຊີບ 20 ໂຕ , ແຂວງມອບເຂົ້າສານ 40 ກະສອບ,ຂະໜົມ 3 ແກັດ , ແປງສີແຂ້ວ 5 ແກັດ , ໝີ່ສຳເລັດຮູບ 110 ແກັດ,ສະບູ 2 ແກັດ , ປາກະປ໋ອງ 10 ແກັດ , ນ້ຳປາ 1 ແກັດ , ນໍ້າດື່ມ 400 ແພັກ , ໄຂ່ໄກ່ 10 ແຕະ , ໂອອິຊິ 5 ແກັດ ແລະ ນົມແລັກຕາຊອຍ 5 ແກັດ ລວມມູນຄ່າ 31 ລ້ານ 9 ແສນກວ່າກີບ ເພື່ອເປັນການຊ່ວຍເຫຼືອບັນເທົາທຸກໃຫ້ແກ່ປະຊາຊົນຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມໃນຄັ້ງນີ້

.

ໂອກາດທີ່ໄດ້ລົງມອບເຄື່ອງຊ່ວຍເຫລືອທ່ານ ຮອງເຈົ້າແຂວງພ້ອມຄະນະ ກໍ່ໄດ້ເດີນທາງໄປເບິ່ງຄອງຊົນລະປະທານທີ່ລຸເຈື່ອນ ເຮັດໃຫ້ເກີດຄວາມເປ້ເພເສຍຫາຍ ແລະ ຕ້ອງການໄດ້ມີແຜນການປັບປຸງແກ້ໄຂໂດຍໄວ ເພື່ອໃຫ້ທັນກັບການຜະລິດໃນລະດູແລ້ງ ເປັນຕົ້ນແມ່ນການຜະລິດເຂົ້ານາແຊງທີ່ຈະມາເຖິງນີ້ ຫລັງຈາກນັ້ນທ່ານຮອງເຈົ້າແຂວງພ້ອມຄະນະ ກໍ່ໄດ້ເດີນທາງໄປເມືອງສອງຄອນ ເພື່ອມອບເງີນສົດຈຳນວນ 40 ລ້ານກີບທີ່ໄດ້ຈາກລັດຖະບານມອບໃຫ້

ພ້ອມທັງຮັບຟັງການລາຍງານສະພາບການຈັດຕັ້ງປະຕິບັດໃນໄລຍະພວມນ້ຳບົກລົງຂໍ້ສະດວກ ຂໍ້ຫຍຸ້ງຍາກ ແລະ ສິ່ງທີ່ຈຳເປັນທີ່ຈະນຳໃຊ້ເຂົ້າໃນການແກ້ໄຂວຽກງານນ້ຳຖ້ວມຈາກທ່ານ ພັນເອກ ລຳຄູນ ວໍລະວົງ ເຈົ້າເມືອງສອງຄອນ ຕື່ມອີກ.

LEAVE A REPLY

Please enter your comment!
Please enter your name here