ບໍລິຄຳໄຊ: ໂດຍປະຕິບັດຕາມຂໍ້ຕົກລົງ ຂອງທ່ານເຈົ້າແຂວງ ບໍລິຄຳໄຊ ສະບັບເລກທີ 28/ຄລທ.ຂ ລົງວັນທີ 23 ຕຸລາ 2020 ວ່າດ້ວຍການອະນຸຍາດໃຫ້ ບໍລິສັດ ວີເອັນແອລ ສຳປະທານພັດທະນາໂຄງການກໍ່ ສ້າງຕະຫລາດປາກຊັນ ຊຶ່ງໄດ້ຈັດໃຫ້ມີພິທີລົງນາມໃນສັນຍາ ເມື່ອວັນທີ 27 ຕຸລາ 2020 ນີ້ ຢູ່ໂຮງແຮມດອກຈໍາປາ ໂດຍປະຕິບັດຕາມບົດວິພາກເສດຖະກິດ, ເຕັກນິກທີ່ໄດ້ຜ່ານການຮັບຮອງຈາກຂະແໜງການກ່ຽວ ຂ້ອງ ແລະປະຕິບັດຢ່າງເຂັ້ມງວດ ໃຫ້ກຽດເຂົ້າຮ່ວມໂດຍທ່ານ ທອງສິງ ທໍາມະວົງ ອະດີດນາຍົກລັດຖະມົນຕີ, ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄໍາໄຊ. ມີບັນດາຫົວໜ້າພະແນກການ, ຂະແໜງການທີ່ກຽ່ວຂ້ອງ ແລະ ບໍລິສັດເຂົ້າຮ່ວມ.

ໂຄງການກໍ່ສ້າງຕະຫລາດແຫ່ງນີ້ ໄດ້ມີຫລາຍບໍລິສັດຍື່ນຊອງເຂົ້າມາປະມູນ ເພື່ອຈຸດປະສົງໃນການພັດທະນາສຳປະທານການກໍ່ສ້າງ ແລະ ຜ່ານການຄັດເລືອກ ຕີລາຄາປະເມີນແບບວິທະຍາສາດຂອງຄະນະກຳມະການເຫັນວ່າບໍລິສັດ ວິເອັນແອລ (VNL) ມີມາດຖານເງື່ອນໄຂຄົບຖ້ວນ, ສະນັ້ນທາງແຂວງຈຶ່ງໄດ້ເຫັນດີອະນຸມັດໃຫ້ບໍລິສັດດັ້ງກ່າວ ເຂົ້າມາສຶກສາສຳຫລວດ ແລະ ອອກແບບໂຄງການກໍ່ສ້າງ ໃຫ້ແທດເໝາະກັບສະພາບການຂະຫຍາຍຕົວທາງດ້ານເສດຖະກິດ ແລະ ສັງຄົມຂອງແຂວງບໍລິຄຳໄຊ ກໍຄືເມືອງປາກຊັນ ຊຶ່ງເປັນທີ່ຕັ້ງຂອງໂຄງການ ໂດຍໄດ້ມີການເຊັນບົດບັນທຶກຄວາມເຂົ້າໃຈ ໃນການສຳຫລວດອອກແບບໃນວັນທີ 26 ມິຖຸນາ 2020 ຜ່ານມາ, ຕະຫລອດ 3 ເດືອນກວ່າຜ່ານມາ ເຫັນໄດ້ວ່າບໍລິສັດດັ່ງກ່າວ ໄດ້ເອົາໃຈໃສ່ປະ ຕິບັດພັນທະ ແລະ ເຮັດຕາມໜ້າວຽກທີ່ລະບຸໄວ້ໃນບົດບັນທຶກດັ່ງກ່າວໄດ້ຢ່າງຖືກຕ້ອງ, ຄົບຖ້ວນຕາມມາດຖານເງື່ອນໄຂ. ດັ່ງນັ້ນ ທ່ານເຈົ້າແຂວງຈຶ່ງໄດ້ອອກຂໍ້ຕົກລົງ ໃຫ້ບໍລິສັດດັ່ງກ່າວເປັນຜູ້ລົງທຶນໂຄງການພັດທະ ນາຕະຫລາດປາກຊັນ.

ສຳລັບສັນຍາໃນເບື້ອງຕົ້ນ ໂຄງການນີ້ມີອາຍຸສຳປະທານ 50 ປີ ນັບແຕ່ມືລົງລາຍເຊັນເປັນຕົ້ນໄປ ແລະ ສາມາດຕໍ່ສັນຍາໄດ້ຕາມການຮັບຮອງຂອງສະພາປະຊາຊົນແຂວງ ໂດຍຈະໃຊ້ເວລາໃນກໍ່ສ້າງ ປະມານ 7 ປີກ່ວາ ໃນມູນຄ່າທັງໝົດ 130 ຕື້ກີບ; ໃນນັ້ນ, ລວມມີອາຄານຕະຫລາດສົດ, ສະຖານີລົດຂົນສົ່ງໂດຍສານ, ຕຶກອາຄານຫ້ອງແຖວ ແລະ ຫ້ອງການຕະຫລາດ ເຊິ່ງໂຄງການດັ່ງກ່າວນີ້ຈະເນັ້ນດ້ານຄວາມສະຫງົບປອດໄພສູງ ແລະ ຮັກສາສິງແວດລ້ອມ. ສຳລັບການລົງນາມມີຂຶ້ນ ລະຫ່ວາງ ທ່ານ ເລື່ອນວິໄລ ຈັນທະລາພັນ ຫົວໜ້າພະແນກແຜນການ ແລະ ການລົງທຶນແຂວງ ແລະ ທ່ານ ຈ່ຽນ ວັນນະເລີດ ອໍານວຍການ ບໍລິສັດ ວີເອັນແອລ ມີບັນດາຫົວໜ້າພະແນກການທີ່ກ່ຽວຂ້ອງເຂົ້າຮ່ວມເປັນສັກຂີພິຍານນຳດ້ວຍ.
ຂ່າວ-ພາບ:ວຽງສະຫວັນ

LEAVE A REPLY

Please enter your comment!
Please enter your name here