ພິທີລົງນາມສັນຍາການ ມອບ-ໂອນ ສິດນໍາໃຊ້ທີ່ດິນລະຫວ່າງນະຄອນຫຼວງວຽງຈັນ-ທະນາຄານແຫ່ງ ສປປ ລາວ (ທຫລ) ແລະ ບໍລິສັດ ກຸ່ມດວງຈະເລີນ ພັດທະນາກໍ່ສ້າງ ຈໍາກັດຜູ້ດຽວ ໄດ້ຈັດຂຶ້ນໃນວັນທີ 23 ຕຸລາ 2020 ທີ່ໂຮງແຮມແລນມາກ ແມ່ຂອງ ລີເວີໄຊ ໂດຍການໃຫ້ກຽດເຂົ້າຮ່ວມຂອງ ທ່ານ ຄໍາວົງ ທິບພະວົງ ຮອງຜູ້ວ່າການ ທຫລ; ທ່ານ ອາດສະພັງທອງ ສີພັນດອນ ຮອງເຈົ້າຄອງ ນະຄອນຫຼວງວຽງຈັນ ແລະ ທ່ານ ຄໍາຜາຍ ສີລາຊາ ປະທານບໍລິສັດກຸ່ມດວງຈະເລີນ ໂດຍຊ້ອງຫນ້າການເຂົ້າຮ່ວມເປັນສັກຂີພິຍານຂອງ ຄະນະນໍາ ແລະ ອົງການກ່ຽວຂ້ອງຂອງທັງ 3 ຝ່າຍ.

ທ່ານ ເພັດສະຖາພອນ ແກ້ວວົງວິຈິດ, ຫົວຫນ້າຫ້ອງການ ທຫລ ໄດ້ກ່າວວ່າ: ເພື່ອຈັດຕັ້ງຜັນຂະຫຍາຍແຜນການພັດທະນາລະບົບ ພື້ນຖານໂຄງລ່າງຂອງນະຄອນຫຼວງວຽງຈັນ ເພື່ອຂໍ່ານັບຮັບຕ້ອນການສະເຫຼີມສະຫຼອງການສ້າງຕັ້ງນະຄອນຫຼວງວຽງຈັນຄົບຮອບ 450 ປີ ແລະ ປະຕິບັດນະໂຍບາຍການຫັນຊັບສິນເປັນທຶນ, ດັ່ງນັ້ນ, ອົງການປົກຄອງນະຄອນຫຼວງວຽງຈັນຈຶ່ງໄດ້ມີໂຄງການສ້າງເສັ້ນທາງເບຕົງ 450 ປີ (ແຕ່ 4 ແຍກດົງໂດກໄປຫາຫນ້າສາງທ່ານາແລ້ງ) ເພື່ອສ້າງຄວາມສະດວກໃນການສັນຈອນໄປມາ ແລະ ຫຼຸດຜອ່ນຄວາມແອອັດພາ ຫະນະໃນຕົວເມືອງໂດຍແມ່ນບໍລິສັດ ກຸ່ມດວງຈະເລີນ ເປັນຜູ້ຮັບເຫມົາກໍ່ສ້າງ. ໃນການຈັດຕັ້ງປະຕິບັດໂຄງການດັ່ງກ່າວ ອົງການປົກຄອງ ນະຄອນຫຼວງວຽງຈັນໄດ້ກູ້ຢືມທຶນຈາກ ທຫລ ເພື່ອນໍາໃຊ້ເຂົ້າໃນໂຄງການດັ່ງກ່າວ.

ທ່ານ ປະທານບໍລິສັດ ກຸ່ມດວງຈະເລີນ ໄດ້ແຈ້ງໃຫ້ຮູ້ວ່າ: ໃນປີ 2008 ລັດຖະບານໄດ້ອອກຂໍ້ຕົກລົງ ແລະ ແຈ້ງການຂອງ ລັດຖະບານຫຼາຍສະບັບໂດຍມອບໃຫ້ນະຄອນຫຼວງວຽງຈັນເປັນເຈົ້າຂອງໂຄງການກໍ່ສ້າງທາງ 450 ປີທີ່ມີຄວາມຍາວ 20,3 ກິໂລແມັດ. ແຫຼ່ງທຶນຊໍາລະມູນຄ່າກໍ່ສ້າງເສັ້ນທາງ, ລັດຖະບານກໍ່ຄືນະຄອນຫຼວງວຽງຈັນໄດ້ກໍານົດເອົາດິນໃນເຂດສະຫງວນ 2 ເບື້ອງໆລະ 50 ແມັດ ເພື່ອເປັນທຶນຊໍາລະເງິນກູ້ແກ່ ທຫລ ແລະ ຜົນການຈັດຕັ້ງການຫັນທີ່ດິນເປັນທຶນໃນໄລຍະຜ່ານມາ, ທຫລ ຮ່ວມກັບນະຄອນຫຼວງວຽງ ຈັນໄດ້ຂາຍທີ່ດິນດັ່ງກ່າວໃນໄລຍະ 10 ປີ ຂາຍໄດ້ພຽງແຕ່ 20% ທີ່ຕິດກັບຕົວເມືອງ ແລະ ຕອນດິນທີ່ງາມ, ສ່ວນທີ່ຍັງເຫຼືອແມ່ນບໍ່ໄດ້ ຂາຍຍ້ອນຫ່າງໄກຕົວເມືອງ, ສະພາບດິນບໍ່ງາມເປັນດິນຫຼຸບ, ບໍ່ມີນໍ້າປະປາ, ບໍ່ມີໄຟຟ້າ, ເປັນທົ່ງນາ, ເປັນຫນອງນໍ້າ ແລະ ລາຄາທີ່ໄດ້ກໍາ ນົດໄວ້ຕາມຂໍ້ຕົກລົງ 617/ຈນວ ແມ່ນສູງກວ່າລາຄາທ້ອງຕະຫຼາດໃນປະຈຸບັນເຮັດໃຫ້ບໍ່ມີຄົນສົນໃຈມາ.

ດ້ວຍເຫດນັ້ນ, ອົງການນະຄອນຫຼວງວຽງຈັນ, ທຫລ ໄດ້ປະຊຸມຮ່ວມປຶກສາຫາລືກັນແກ້ໄຂຫນີ້ສິນຫຼາຍຄັ້ງ ແລະ ມີຄວາມເປັນ ເອກະພາບໄລ່ລຽງຫນີ້ສິນທີ່ນະຄອນຫຼວງວຽງຈັນ ຍັງຄ້າງຊໍາລະກັບ ທຫລ ຜ່ານມາສະນັ້ນຈຶ່ງໄດ້ມີການເຊັນສັນຍາວ່າດ້ວຍການແກ້ໄຂຫນີ້ ສິນບ້ວງດັ່ງກ່າວໃຫ້ສໍາເລັດລະຫວ່າງນະຄອນຫຼວງວຽງຈັນກັບ ທຫລ ໂດຍບໍລິສັດ ດວງຈະເລີນ ຈະເປັນຜູ້ຊໍາລະທັງຕົ້ນທຶນ ແລະ ດອກ ເບ້ຍໃຫ້ ທຫລ ຕາມສັນຍາທີ່ໄດ້ກໍານົດໄວ້. ໃນຕໍ່ຫນ້ານີ້; ພາຍຫຼັງທີ່ບໍລິສັດດັ່ງກ່າວໄດ້ຮັບໃບຕາດິນແລ້ວ, ບໍລິສັດເປັນຜູ້ຮັບພາລະໃນ ການລົງທຶນສືບຕໍ່ເປັນຕົ້ນຖົມດິນ, ເອົານໍ້າປະປາ, ໄຟຟ້າ, ສ້າງເສັ້ນທາງເຂົ້າໃສ່ດິນແຕ່ລະເຂດຄິດວ່າເປັນມູນຄ່າລົງທຶນເພີ່ມຫຼາຍກວ່າ 30 ລ້ານໂດລາຂຶ້ນໄປສ້າງຄວາມເພິ່ງພໍໃຈໃຫ້ຜູ້ທີ່ຈະມາຊື້ດິນ ແລະ ໃຫ້ສາມາດຂາຍດິນໄດ້ໃນຊ່ວງໄລຍະເວລາ 5 ປີ ຕໍ່ຫນ້າເພື່ອມາເປັນ ທຶນຊໍາລະ ໃຫ້ ທຫລ ໃຫ້ສໍາເລັດໂດຍບໍ່ໄດ້ໃຊ້ງົບປະມານຂອງລັດ.

ໃນພິທີເຊັນສັນຍາ ວ່າດ້ວຍການ ມອບ-ໂອນ ສິດນໍາໃຊ້ທີ່ດິນ 2 ຝາກທາງ (ຖະຫນົນ 450 ປີ) ແລະ ຊໍາລະຫນີ້ໃຫ້ ທຫລ, ຕາງຫນ້າ ທຫລ ໂດຍທ່ານ ຄໍາວົງ ທິບພະວົງ ຮອງຜູ້ວ່າການ ທຫລ; ຕາງຫນ້ານະຄອນຫຼວງວຽງຈັນ ໂດຍທ່ານ ອາດສະພັງທອງ ສີພັນດອນ ຮອງເຈົ້າ ຄອງນະຄອນຫຼວງວຽງຈັນ ແລະ ຕາງຫນ້າໃຫ້ບໍລິສັດ ໂດຍທ່ານ ຄໍາຜາຍ ສີລາຊາ ປະທານບໍລິສັດ ກຸ່ມດວງຈະເລີນ. ການມອບ-ຮັບໂອນ ສິດນໍາໃຊ້ທີ່ດິນໃນໂຄງການຫັນດິນເປັນທຶນຢູ່ຖະຫນົນວຽງຈັນ 450 ປີ ຈະເປັນການປະກອບສ່ວນເຂົ້າໃນການພັດທະນາເສດຖະກິດສັງຄົມຂອງນະຄອນຫຼວງວຽງຈັນ ແລະ ເຂດເນື້ອທີ່ດິນດັ່ງກ່າວຈະໄດ້ຮັບການພັດທະນາມີໂສມຫນ້າໃຫມ່, ສ້າງໃຫ້ນະຄອນຫຼວງວຽງຈັນມີ ເຂດພັດທະນາໃຫມ່, ເປັນຫົວຫນ່ວຍຍຸດທະສາດຫນຶ່ງທີ່ເຂັ້ມແຂງຂອງປະເທດ, ເປັນສູນກາງທາງດ້ານການເມືອງ, ຄວາມຫມັ້ນຄົງເສດຖະກິດ, ວັດທະນາທໍາ-ສັງຄົມມີຄວາມທັນສະໄຫມທາງດ້ານວິທະຍາສາດເຕັກໂນໂລຊີ ແລະ ການເຊື່ອມໂຍງກັບພາກພື້ນ ແລະ ສາກົນ, ສ້າງ ເມືອງທີ່ຂື້ນກັບນະຄອນຫຼວງວຽງຈັນໃຫ້ເຂັ້ມແຂງຮອບດ້ານ, ສ້າງບ້ານໃນເຂດຊານເມືອງເປັນບ້ານພັດທະນາ, ມີສະພາບແວດລ້ອມທີ່ຈະ ອາດຂຽວງາມແລະຍືນຍົງ.

ໂດຍ: ຣັດສະຫມີ ດວງສັດຈະ, ທະນາຄານແຫ່ງສປປ ລາວ

LEAVE A REPLY

Please enter your comment!
Please enter your name here