ພິທີມອບ-ຮັບໜ້າທີ່ ລະຫວ່າງ ທ່ານ ໂອໄດ ສຸດາພອນ ເຈົ້າແຂວງຄຳມ່ວນ (ຜູ້ເກົ່າ) ແລະ ທ່ານ ວັນໄຊ ພອງສະຫວັນ ຮັກສາການເຈົ້າແຂວງຄຳມ່ວນ (ຜູ້ໃໝ່) ໄດ້ຈັດຂຶ້ນໃນວັນທີ 26 ຕຸ ລາ 2020 ທີ່ສະໂມສອນຫ້ອງວ່າການແຂວງຄໍາມ່ວນ, ໂດຍເປັນກຽດເຂົ້າຮ່ວມຂອງທ່ານ ພັນຄໍາ ວິ ພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ, ພ້ອມດ້ວຍຄະນະປະຈໍາ-ກຳມະການພັກແຂວງ, ຫົວໜ້າ-ຮອງພະແນກ ແລະ ພະນັກງານນໍາພາຫລັກແຫລ່ງຂອງແຂວງ ເຂົ້າຮ່ວມ.

ໂອກາດນີ້, ທ່ານ ໂອໄດ ສຸດາພອນ ກໍໄດ້ລາຍງານໂດຍຫຍໍ້ ກ່ຽວກັບການນໍາພາ-ຊີ້ນໍາຂອງຄະນະບໍລິຫານງານພັກແຂວງ ໃນໄລຍະ 1 ສະໄໝຜ່ານມາ, ຄະນະພັກ-ອົງການປົກຄອງທຸກຂັ້ນໃນທົ່ວແຂວງ ໄດ້ສຸມທຸກກໍາລັງແຮງ ແລະ ສະຕິປັນຍາ ເພື່ອນໍາພາ-ຊີ້ນໍາ ແລະ ຈັດຕັ້ງປະຕິບັດໜ້າທີ່ວຽກງານຢ່າງເປັນເຈົ້າການ, ບຸກທະລຸ ແລະ ຂຸດຄົ້ນ ນໍາໃຊ້ທ່າແຮງບົ່ມຊ້ອນຂອງທ້ອງຖິ່ນ, ສ້າງເງື່ອນໄຂ, ດຶງດູດຍາດແຍ່ງການຊ່ວຍເຫລືອ ແລະ ການລົງທຶນຈາກພາຍໃນ ແລະ ຕ່າງປະເທດ ເຂົ້າໃນການພັດທະນາແຂວງຄຳມ່ວນ ອັນເຮັດໃຫ້ແຂວງຄຳມ່ວນມີການພັດທະນາຢ່າງຕໍ່ເນື່ອງເປັນຕົ້ນ: ແມ່ນດ້ານເສດຖະກິດ, ວັດທະນະທໍາ-ສັງຄົມ, ການແກ້ໄຂຄວາມທຸກຍາກ, ການຄ້າ, ການລົງທຶນ ແລະ ການທ່ອງທ່ຽວ.

ໂອກາດນີ້, ທ່ານ ພັນຄໍາ ວິພາວັນ ກໍໄດ້ຊົມເຊີຍຄະນະບໍລິຫານງານພັກແຂວງ ແລະ ຊົມ ເຊີຍຕໍ່ສະຫາຍເລຂາພັກແຂວງ, ເຈົ້າແຂວງຄຳມ່ວນຜູ້ເກົ່າ ທີ່ສາມາດນໍາພາພະນັກງານ, ສະມາຊິກພັກ ແລະ ປະຊາຊົນບັນດາເຜົ່າໃນທົ່ວແຂວງ ເຮັດສໍາເລັດໜ້າທີ່ການເມືອງ, ເຮັດໃຫ້ແຂວງຄຳມ່ວນໄດ້ຮັບການພັດທະນາເປັນກ້າວໆ. ພ້ອມນີ້, ທ່ານຍັງຮຽກຮ້ອງໃຫ້ແຂວງຄໍາມ່ວນ ເປັນເອກະພາບນໍາຂັ້ນເທິງ, ນໍາພາແນວຄິດພະນັກງານແຕ່ລະຂະແໜງການ ແລະ ປະຊາຊົນໃນທົ່ວແຂວງ ເຂົ້າໃຈເຫດຜົນຂອງການປ່ຽນການນໍາ, ອັນໃດດີແລ້ວກໍໃຫ້ສືບຕໍ່ເສີມຂະຫຍາຍ ແລະ ອັນໃດຍັງເປັນຈຸດອ່ອນ ໃຫ້ພ້ອມກັນປ່ຽນແປງແກ້ໄຂ ເພື່ອເຮັດໃຫ້ການຈັດຕັ້ງດຳເນີນກອງປະຊຸມໃຫຍ່ຄັ້ງທີ X ຜູ້ແທນອົງຄະນະພັກແຂວງຄຳມ່ວນ ກໍຄື ແຜນພັດທະນາເສດຖະກິດ-ສັງຄົມ ໃຫ້ບັນລຸຕາມຄາດໝາຍແຜນການທີ່ວາງໄວ້.

ຂ່າວ-ພາບ: ສັງກິ

LEAVE A REPLY

Please enter your comment!
Please enter your name here