ໃນກອງປະຊຸມຜ່ານແຜນປ້ອງກັນງານບຸນນະມັດສະການພຣະທາດຫຼວງວຽງຈັນ ປະຈໍາປີ 2020 ທີ່ຈັດຂຶ້ນໃນຕອນເຊົ້າຂອງວັນທີ 22 ຕຸລາ 2020, ຢູ່ຫ້ອງປະຊຸມຊັ້ນໜຶ່ງ ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ, ໂດຍການເປັນປະທານຂອງ ພົຈວ ສີພອນ ຈັນສົມວົງ ປະທານກໍາມາທິການ ປກຊ-ປກສ ນະຄອນຫຼວງວຽງຈັນ ຫົວໜ້າການເມືອງ ກອງບັນຊາການທະຫານ ນະຄອນຫຼວງວຽງຈັນ, ມີ ພຈົວ ປອ ທອງສະຫວັນ ວົງສະຫວັດ ຮອງຫົວໜ້າກົມໃຫຍ່ຕໍາຫຼວດ ກະຊວງປ້ອງກັນຄວາມສະຫງົບ, ມີ ພັອ ສຸກພະຈັນ ບຸດດາຄໍາ ຫົວໜ້າ ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ, ພ້ອມດ້ວຍຄະນະພັກ-ຄະນະບັນຊາ ກອງບັນຊາການ ປກສ-ປກຊ ນວ, ມີຕາງໜ້າໃຫ້ອົງການຈັດຕັ້ງຊາວໜຸ່ມ ນວ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

.

ໃນພິທີ ພັທ ສົມພຽງ ສຸກປະເສີດ ຫົວໜ້າຫ້ອງການ ກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽງຈັນ, ໄດ້ຜ່ານແຜນປ້ອງກັນງານບຸນນະມັດສະການພຣະທາດຫຼວງປະຈໍາປີ 2020 ທີ່ຈະຈັດຂຶ້ນໃນວັນທີ 29-31 ຕຸລາ 2020 ນີ້ໃຫ້ຮູ້ວ່າ: ຈະເລີ່ມຈັດກໍາລັງລົງປະຈໍາຈຸດ ໃນຕອນເຊົ້າຂອງວັນທີ 29 ຕຸລາ 2020, ໃນນີ້ໄດ້ຈັດວາງກໍາລັງລົງທັງໝົດ 1 ພັນກວ່າສະຫາຍ, ໂດຍບັນຈຸໃສ່ 24 ຈຸດຄື: ຈຸດປະຕູເຂົ້າ-ອອກ ພາຍໃນງານບຸນ 9 ຈຸດ, ວົງນອກມີ 6 ຈຸດ ແລະ ວົງໃນ 9 ຈຸດ.

.

ພົຈວ ສີພອນ ຈັນສົມວົງ ໄດ້ເນັ້ນໜັກໃຫ້ທຸກເລົ່າຮົບວິຊາສະເພາະ ຕ້ອງເອົາໃຈໃສ່ກໍາແໜ້ນສະພາບການເຄື່ອນໄຫວຂອງກຸ່ມຄົນບໍ່ດີ ເພື່ອສະກັດກັ້ນບໍ່ໃຫ້ກຸ່ມຄົນດັ່ງກ່າວເຂົ້າເຄື່ອນໄຫວກໍ່ຄວາມບໍ່ສະຫງົບ ຢູ່ພາຍໃນງານບຸນນະມັດສະການພຣະທາດຫຼວງວຽງຈັນ, ກໍາລັງ ປກຊ-ປກສ ຕ້ອງປະສານງານກັນຢ່າງກົມກຽວ ເປັນຕົ້ນແມ່ນການບັນຊາ, ການສື່ສານ ເພື່ອແກ້ໄຂສະພາບການໃຫ້ທັນເວລາ ນອກຈາກນີ້, ກອງບັນຊາການ ປກຊ-ປກສ ແຕ່ລະເມືອງຕ້ອງສ້າງແຜນການສະເພາະໃນການປ້ອງກັນງານບຸນ, ສໍາລັບບັນດາເມືອງທີ່ມີຊາຍແດນຕິດກັບປະເທດເພື່ອນບ້ານ ຕ້ອງເອົາໃຈໃສ່ກວດກາຄົນລັກລອບເຂົ້າເມືອງ ແລະ ຕ້ອງເອົາໃຈໃສ່ກວດກາ ຜູ້ທີ່ຈະເຂົ້າມາທ່ຽວໃນງານບຸນຢ່າງເຂັ້ມງວດ ເພື່ອຄວາມຮັບປະກັນ ເຮັດໃຫ້ງານບຸນມີຄວາມສະຫງົບປອດໄພ 100%.

LEAVE A REPLY

Please enter your comment!
Please enter your name here