ປີນີ້ເມືອງໄຊຍະບູລີ ປ່ອຍປາຄືນສູ່ທໍາມະຊາດເກືອບ 8 ລ້ານໂຕ
ແຫລ່ງຂ່າວຈາກ ແຂວງໄຊຍະບູລີ ໃຫ້ຮູ້ວ່າ: ເມືອງໄຊຍະບູລີ ມີແຜນປ່ອຍປາຄືນສູ່ທໍາມະຊາດ ເກືອບ 8 ລ້ານໂຕ ເນື່ອງໃນໂອກາດວັນປ່ອຍປາ ແລະ ອານຸລັກສັດນໍ້າ-ສັດປ່າ ແຫ່ງຊາດ ໃນວັນທີ 13 ກໍລະກົດ 2020 ໃນນັ້ນມີປາປາກ, ປານິນ ແລະ ປາໄນ.
ທັງນີ້ ກໍເພື່ອຄືນຄວາມອຸດົມສົມບູນໃຫ້ກັບທໍາມະຊາດ ແລະ ຮຽກຮ້ອງທຸກພາກສ່ວນສັງຄົມຕ້ອງພ້ອມກັນອານຸລັກປົກປັກຮັກສາສັດນໍ້າ-ສັດປ່າ ເຮັດໃຫ້ຊັບພະຍາກອນອັນລໍ້າຄ່າດັ່ງກ່າວ ຢູ່ຄຽງຄູ່ກັບພວກເຮົາຕະຫລອດໄປ.
ໃນວັນທີ 13 ກໍລະກົດ 2020 ຢູ່ຜາມໄຊ ບ້ານປົ່ງ ເມືອງໄຊຍະບູລີ ໄດ້ຈັດພິທີປ່ອຍປາຄືນສູ່ທໍາມະຊາດ ໂດຍມີ ທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ, ມີການນໍາຂອງແຂວງ, ຂອງເມືອງໄຊຍະບູລີ, ອົງການ, ກົມກອງ, ນັກທຸລະກິດຜູ້ປະກອບການ, ນັກຮຽນ ນັກສຶກສາ, ອົງການປົກຄອງບ້ານຕະຫລອດຮອດພໍ່ແມ່ປະຊາຊົນພາຍໃນເທສະບານເມືອງໄຊຍະບູລີ ເຂົ້າຮ່ວມ. ສໍາລັບປີນີ້, ເມືອງໄຊຍະບູລີ ມີແຜນປ່ອຍປາ ເກືອບ 8 ລ້ານໂຕ,
ໃນນັ້ນ ມີແຜນປ່ອຍປາ ລວມໝູ່ມີ 13 ຈຸດຄື: ອ່າງຫ້ວຍແຄ່ນ, ວັງບວດ ບ້ານໃຫຍ່, ວັງບວດບ້ານນາໂຮ, ວັງບວດ ບ້ານນາຕໍນ້ອຍ, ວັງບວດບ້ານວັງຊອຍ, ອ່າງນໍ້າຕຽນ, ບ້ານປາກທັງ, ກອງພັນ 609, ຄຸມຂັງເມືອງ, ມສ ຊົນເຜົ່າ, ກອງພັນ 202 ແລະ ປ່ອຍສ່ວນບຸກຄົນ, ຄອບຄົວ ແລະ ທຸລະກິດ.
ທ່ານ ບຸນແທນ ທິແກ້ວ ເຈົ້າເມືອງໄຊຍະບູລີ ໄດ້ໃຫ້ຮູ້ວ່າ: ໃນໄລຍະຜ່ານມາ ການນໍາຂອງແຂວງ, ເມືອງ ໄດ້ເປັນເຈົ້າການຈັດກິດຈະກໍາປ່ອຍປາລົງສູ່ອ່າງເກັບນໍ້າ, ໜອງນໍ້າ ແລະ ສາຍນໍ້າທໍາມະຊາດ ພ້ອມທັງແຕ່ງຕັ້ງຄະນະກໍາມະການຄຸ້ມຄອງການປະມົງປະຈໍາພື້ນທີ່ ກໍານົດເຂດວັງສະຫງວນ ທັງໝົດ 6 ຈຸດ ເພື່ອເປັນການປຸກຈິດສໍານຶກໃຫ້ທົ່ວປວງຊົນ ຄົນຮຸ່ນຫລັງໃຫ້ຮູ້ຈັກລະບົບນິເວດຊີວະນາງໆພັນໄປຄວບຄູ່ກັບການອອກລະບຽບຄຸ້ມຄອງ, ວາງມາດຕະການຫ້າມລ່າສັດປ່າ, ຫາປາໃນລະດູວາງໄຂ່ ຂະຫຍາຍພັນຂອງສັດນໍ້າ-ສັດປ່າ, ສະກັດກັ້ນການຄ້າຂາຍສັດນໍ້າ ແລະ ສັດປ່າ ປະເພດຫວງຫ້າມ ແລະ ອື່ນໆ ອັນໄດ້ປະກອບສ່ວນເຂົ້າໃນການອານຸລັກປົກປັກຮັກສາສັດນໍ້າສັດປ່າໃຫ້ອຸດົມສົມບູນ ແລະ ຍືນຍົງ.
ຂ່າວ: ບຸນທີ