ໃນຕອນເຊົ້າວັນທີ 5 ກໍລະກົດ 2020, ເມືອງໄຊຍະບູລີ ແຂວງໄຊຍະບູລີ ໄດ້ຈັດກອງປະຊຸມຮັບຮອງອັດຕາການຄິດໄລ່ຄ່າຊົດເຊີຍໃຫ້ປະຊາຊົນບ້ານຫ້ວຍແກ້ງ ແລະ ບ້ານປາກຮຸ່ງ ຢູ່ທີ່ຫ້ອງປະຊຸມຂອງບ້ານດັ່ງກ່າວ, ໂດຍການເປັນປະທານຂອງທ່ານ ສອນສະຫັວນ ຈັນທະວົງ ຮອງເຈົ້າເມືອງໄຊຍະບູລີ, ມີຫົວໜ້າ, ຮອງຫົວໜ້າຫ້ອງການ, ພະນັກງານວິຊາການ ພ້ອມດ້ວຍຄອບຄົວທີ່ຖືກຜົນກະທົບເຂົ້າຮ່ວມ.
ໃນກອງປະຊຸມ, ທ່ານ ສອນສະຫັວນ ຈັນທະວົງ ຮອງເຈົ້າເມືອງ ໄຊຍະບູລີ ໄດ້ຂຶ້ນຜ່ານລາຍຊື່ຄອບຄົວທີ່ໄດ້ຮັບຜົນກະທົບ ໃຫ້ເຫັນວ່າ: ບ້ານປາກຮຸ່ງ ມີຄອບຄົວທີ່ໄດ້ຮັບຜົນກະທົບທັງໝົດ 36 ຄອບຄົວ, ມີ 50 ຕອນດິນ. ໃນນັ້ນ, ດິນກະສິກຳ 15 ຕອນ, ດິນສວນໄມ້ອຸດສາຫະກຳ 31 ຕອນ, ດິນລວມບ້ານ 2 ຕອນ, ດິນປ່າທຳມະຊາດ 2 ຕອນ ລວມເນື້ອທີ່ 966.292 ແມັດມົນທົນ; ຕົ້ນໄມ້ອຸດສາຫະກໍາ 28.750 ຕົ້ນ, ໄມ້ໃຫ້ໝາກ 288 ຕົ້ນ, ລວມມູນຄ່າການເສຍຫາຍທັງໝົດ 2,1 ຕື້ກວ່າກີບ. ສ່ວນບ້ານຫ້ວຍແກ້ງ ມີຕອນດິນຖືກຜົນກະທົບທັງໝົດ 92 ຕອນ, ມີ 51 ຄອບຄົວ. ໃນນີ້, ເປັນດິນກະສິກຳ 47 ຕອນ, ດິນນາ 2 ຕອນ, ດິນປູກໄມ້ອຸດສາຫະກຳ 31 ຕອນ, ດິນປຸກສ້າງ 3 ຕອນ, ດິນປ່າໄມ້ທຳມະຊາດ 4 ຕອນ, ລວມເນື້ອທີ່ 357.229 ແມັດມົນທົນ; ຕົ້ນໄມ້ອຸດສາຫະກຳ 11.995 ຕົ້ນ, ໄມ້ໃຫ້ໝາກ 539 ຕົ້ນ, ລວມມູນຄ່າການເສຍຫາຍ 1,2 ຕື້ກວ່າກີບ.
ຈາກນັ້ນ, ໃນກອງປະຊຸມຜູ້ເຂົ້າຮ່ວມກໍ່ໄດ້ປະກອບຄຳເຫັນຢ່າງກົງໄປກົງມາເພື່ອໃຫ້ມີຄວາມເພິ່ງພໍໃຈທັງ 2 ຝ່າຍ.
ຂ່າວ-ພາບ: ສົມພົງ ສີສະຫວັດ