ໃນວັນທີ 2 ກໍລະກົດ 2020 ທ່ານ ດຣ. ສີສະຫວາດ ສູດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ຕາງໜ້າໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ກ່າວໃນພິທີຖະແຫລງຂ່າວວ່າ: ສປປ ລາວ ບໍ່ພົບຜູ້ຕິດເຊື້ອພະຍາດໂຄວິດ-19 ເພີ່ມເປັນເວລາ 81 ວັນຕິດຕໍ່ກັນ.
ໃນວັນທີ 01 ກໍລະກົດ 2020, ໄດ້ເກັບຕົວຢ່າງມາກວດວິເຄາະທັງໝົດ 478 ຄົນ, ໃນນັ້ນ ມີ ແຮງງານລາວກັບມາແຕ່ໄທ 416 ຄົນ ແລະ ບຸກຄົນທົ່ວໄປ 62 ຄົນ, ຜົນກວດທັງໝົດແມ່ນບໍ່ພົບເຊື້ອ ໝາຍຄວາມວ່າ ໃນວັນທີ 01 ກໍລະກົດ 2020 ບໍ່ມີຜູ້ຕິດເຊື້ອໃໝ່. ສໍາລັບການເຝົ້າລະວັງ ໂຄວິດ-19 ຢູ່ ສປປ ລາວ ຮອດ 5 ໂມງແລງ ຂອງວັນທີ 01 ກໍລະກົດ 2020 ຜູ້ເດີນທາງຈາກຈຸດຜ່ານແດນຕ່າງໆ ທົ່ວປະເທດ ມີຜູ້ເດີນທາງເຂົ້າມາທັງໝົດ 2.086 ຄົນ ໃນນັ້ນຈຸດຜ່ານດ່ານລາວ-ໄທ 1.141 ຄົນ (ແຮງງານລາວ ກັບມາແຕ່ໄທ 475 ຄົນ), ຈຸດຜ່ານດ່ານລາວ-ຈີນ 18 ຄົນ (ທັງໝົດແມ່ນຄົນຂັບລົດສົ່ງສິນຄ້າ ແລະ ຜູ້ຕິດຕາມ), ຈຸດຜ່ານດ່ານລາວ-ຫວຽດນາມ 657 ຄົນ (ນັກສືກສາລາວ 26 ຄົນ ຜ່ານດ່ານນໍ້າພາວ, ແຂວງບໍລິຄໍາໄຊ ແລະ ດ່ານນໍ້າກັ່ນ, ແຂວງຊຽງຂວາງ, ເຫລືອນັ້ນແມ່ນຄົນຂັບລົດສົ່ງສິນຄ້າ). ທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວ ຢ່າງທຸກໆຄົນມາກວດ (ຍົກເວັ້ນແຕ່ຜູ້ຂັບລົດຂົນສົ່ງ ແລະ ຜູ້ຕິດຕາມ) ແລ້ວຈຶ່ງນໍາສົ່ງໄປຫາສະຖານທີ່ ຈໍາກັດບໍລິເວນ ທີ່ກໍານົດໄວ້ຈົນກວ່າຈະຄົບກໍານົດ 14 ວັນ.
ພ້ອມນີ້, ທ່ານ ດຣ. ສີສະຫວາດ ສູດທານີລະໄຊ ຍັງໄດ້ຮຽກຮ້ອງໃຫ້ທຸກຄົນ ບໍ່ຄວນປະໝາດ ເພື່ອສະກັດກັ້ນ ການລະບາດຂອງພະຍາດ COVID-19 ບໍ່ໃຫ້ກັບຄືນມາຮອບໃໝ່ ແລະ ຮຽກຮ້ອງມາຍັງບັນດາທຸກຊັ້ນຄົນໃນສັງຄົມ ຈົ່ງປະຕິບັດຢ່າງເຄັ່ງຄັດ ຕາມແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ ສະບັບເລກທີ 697/ຫສນຍ, ລົງວັນທີ 30 ມິຖຸນາ 2020. ພ້ອມກັນນັ້ນ, ກໍ່ໃຫ້ປະຕິບັດວິທີປ້ອງກັນການຕິດເຊື້ອ ຢ່າງເຂັ້ມງວດ ເປັນຕົ້ນ ແມ່ນ ການປະຕິບັດຫລັກການອະນາໄມ, ການທໍາຄວາມສະອາດຂ້າເຊື້ອພະຍາດ ຢູ່ສະຖານທີ່ບໍລິການ, ການແທກອຸນຫະພູມຮ່າງກາຍ, ການລ້າງມືດ້ວຍນໍ້າສະອາດໃສ່ສະບູ ຫລື ໃຊ້ເຈວລ້າງມື, ການປະຕິບັດໄລຍະຫ່າງທາງສັງຄົມ, ບໍ່ໃຫ້ມີການແອອັດ, ການໃສ່ຜ້າປິດປາກ-ດັງ ເວລາອອກຈາກບ້ານ ຫລື ໄປສະຖານທີ່ ທີ່ມີຄວາມສ່ຽງຕໍ່ການຕິດເຊື້ອ ທັງໝົດນີ້ໃຫ້ກາຍເປັນຄວາມຊິນເຄີຍ ໃນວີຖີຊີວິດແບບໃໝ່.