ນາງ ວຽງສະໄໝ ຫຼື ເມີ້ຍ ອາຍຸ 31 ປີ ຢູ່ບ້ານຮ່ອງສຸພາບ ເມືອງໄຊເສດຖາ ທີ່ຜູ້ກ່ຽວໄດ້ອາໃສຮ້ານຂາຍເຝິແອບແຝງຄ້າຂາຍຢາ ເສບຕິດ ຖືກເຈົ້າໜ້າທີ່ຈັບໄດ້ ໃນວັນທີ 25 ພຶດສະພາ ທີ່ຜ່ານມາ ຂໍ້ຫາຄ້າຂາຍຢາເສບຕິດ ຢຶດຂອງກາງປະເພດຢາບ້າໄດ້ 1.809 ເມັດ.ຄະດີດັ່ງກ່າວ, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງໄຊເສດຖາ ນະຄອນຫຼວງວຽງຈັນ ເປີດເຜີຍວ່າ: ໄດ້ຮັບການລາຍງານຈາກປະຊາຊົນ ມີຍິງອາຍຸປະມານ 30 ປີ ອາໄສຢູ່ຮ້ານເຝີແຫ່ງໜຶ່ງແອບແຝງ ເຄື່ອນໄຫວຄ້າຂາຍຢາເສບຕິດໃຫ້ກັບໄວລຸ້ນ ຢູ່ພາຍໃນບ້ານຮ່ອງສຸພາບ, ຈາກການກວດກາຕິດຕາມຂອງເຈົ້າໜ້າທີ່ວິຊາສະເພາະພົບວ່າ ມີມູນຄວາມຈິງແທ້.

ມາວັນ ທີ 26 ພຶດສະພາ 2020, ຈຶ່ງໄດ້ສົມທົບກັບອຳນາດການປົກຄອງບ້ານດັ່ງກ່າວ ເຂົ້າກວດຄົ້ນເຮືອນເປົ້າໝາຍຊື່ ນາງ ວຽງສະໄໝ ຫຼື ເມີ້ຍ ພົບຂອງກາງຢາບ້າທີ່ຊຸກເຊື່ອງໄວ້ໃນກະຕ່າເຄື່ອງຫ້ອງນອນ ຈຳນວນ 9 ຖົງ 5 ເມັດ ເທົ່າ 1.809 ເມັດ ໄປສອບສວນ.ນາງ ວຽງສະໄໝ ຫຼື ເມີ້ຍ ສາລະພາບວ່າ: ເດືອນກັນຍາ 2019, ໄດ້ເລີ່ມເຄື່ອນໄຫວຄ້າຂາຍຢາເສບຕິດ ໂດຍຊື້ນຳ ທ້າວ ຕິ ອາຍຸປະມານ 32 ປີ ອາໄສຢູ່ເຂດດົງໂດກ (ບໍ່ຮູ້ທີ່ຢູ່ແນ່ນອນ) ການຊື້ຢາບ້ານຳ ທ້າວ ຕິ ຜູ້ກ່ຽວຈະຂີ່ລົດເວບ 100 ສີຟ້າດຳ ບໍ່ຈື່ປ້າຍທະບຽນເອົາຢາບ້າມາສົ່ງໃຫ້ຢູ່ຮ້ານເຝີຂອງແມ່ ຢູ່ບ້ານຮ່ອງສຸພາບ ຄັ້ງລະ 1 ມັດ ເທົ່າກັບ 2.000 ເມັດ ໂດຍບໍ່ມີການຕິດຕໍ່ຊື້ຂາຍກ່ອນ, ເພາະວ່າ 1 ອາທິດ ຈະເອົາຢາບ້າມາສົ່ງໃຫ້ ດ້ວຍຮູບການຕິດໜີ້ຈ່າຍເງິນຕາມຫຼັງ, ຢາບ້າແມ່ນຂາຍຕໍ່ໃຫ້ກັບ ນາງ ລິນຄົນບ້ານດຽວກັນ ແລະ ຂາຍໃຫ້ກັບໄວລຸ້ນທີ່ມົ້ວສຸມ ໂດຍ ນາງ ວຽງສະໄໝ ຈະເປັນຄົນເອົາຢາບ້າໄປສົ່ງໃຫ້ກັບຜູ້ສັ່ງຊື້ເອງ.

ມາເດືອນພະຈິກ 2019, ນາງ ວຽງສະໄໝ ໄດ້ໄປເຝົ້າຮ້ານເຝີຂອງເອື້ອຍຮັກຢູ່ພາຍໃນບ້ານ ແລະ ໄດ້ອາໄສຮ້ານເຝີ ແອບແຝງເປັນບ່ອນຈຳໜ່າຍຢາເສບຕິດ. ມາວັນ 22 ພຶດສະພາ 2020, ເວລາ ປະມານ 10:30ໂມງ ທ້າວ ຕິ ໄດ້ເອົາຢາບ້າມາໃຫ້ 1 ມັດ ແລ້ວນຳມາແບ່ງຂາຍ. ຕໍ່ມາໃນວັນທີ 24 ພຶດສະພາ 2020, ນາງ ວຽງສະໄໝ ໄດ້ຂາຍຢາບ້າໃຫ້ ທ້າວ ອຶ່ງ ອາຍຸປະມານ 16 ປີ ຄົນບ້ານດຽວກັນ 1 ຖົງ ເທົ່າກັບ 200 ເມັດ ຍັງເຫຼືອຢາບ້າ 9 ຖົງ ກັບ 5 ເມັດ ຈຶ່ງໄດ້ຊຸກເຊື່ອງໄວ້ກະຕ່າເຄື່ອງໃນຫ້ອງນອນ.

ມາວັນທີ 25 ພຶດສະພາ 2020, ເວລາປະມານ 14:00 ໂມງ ເຈົ້າໜ້າທີ່ຕໍາຫຼວດໄດ້ເຂົ້າກວດຄົ້ນເຮືອນພົບຂອງກາງຢາບ້າໃນຫ້ອງນອນ 9 ຖົງ ກັບ 5 ເມັດ ເທົ່າກັບ 1.809 ເມັດ ໄປດຳເນີນຄະດີ.ຜູ້ຖືກຫາ ຍັງສາລະພາບອີກວ່າ: ກ່ອນເຄື່ອນໄຫວຄ້າຂາຍຢາບ້ານັ້ນ ແມ່ນເຄີຍໄດ້ແຕ່ງງານກັບມີລູກແລ້ວ 2 ຄົນ. ແຕ່ມາຮອດເດືອນກຸມພາ 2015, ໄດ້ຢ່າຮ່າງກັບຜົວ ແລະ ມາໃນເດືອນພຶດສະພາ 2015, ຜູ້ເປັນຜົວຖືກເຈົ້າໜ້າທີ່ກັກຕົວຂໍ້ຫາຄ້າຂາຍຢາເສບຕິດ ແລະ ສານໄດ້ຕັດສິນຈຳຄຸກ 10 ປີ. ປັດຈຸບັນ, ຍັງປະຕິບັດໂທດຢູ່, ສ່ວນ ນາງ ວຽງສະໄໝ ແມ່ນອາໄສຢູ່ນໍາແມ່. ສຳລັບ ທ້າວ ຕິ ທີ່ນາງ ວຽງສະໄໝ ໃຫ້ການວ່າເປັນຜູ້ຂາຍຢາບ້າໃຫ້ກັບຜູ້ ກ່ຽວນັ້ນແມ່ນໝູ່ຂອງຜົວທີ່ເຄີຍຮູ້ຈັກກັນກ່ອນໜ້ານັ້ນ…

LEAVE A REPLY

Please enter your comment!
Please enter your name here