ນັບແຕ່ມີການລະບາດຂອງພະຍາດໂຄວິດ-19 ສປປ ລາວ ໄດ້ມີຫຼາຍມາດຕະການເຂັ້ມງວດໃນການຄວບຄຸມພະບາດດັ່ງກ່າວ ເຊິ່ງໜຶ່ງໃນນັ້ນແມ່ນການປິດ່ານຈໍາກັດຄົນເຂົ້າອອກແຕ່ກໍ່ຍັງມີນະໂຍບາຍແກ່ແຮງງານລາວຢູ່ຕ່າງປະເທດໃຫ້ສາມາດກັບເຂົ້າມາລາວໄດ້ຢູ່, ແຕ່ຫຼ້າສຸດຢູ່ເຂດຂົວມິດຕະພາບລາວ-ໄທ 1 ມີແຮງງານລາວ 200ກວ່າຊີວິດ ມາຮວມຕົວກັນຢູ່ເຂດດັ່ງກ່າວເປັນເວລາ 2ວັນແລ້ວ ເພື່ອລໍຖ້າກັບບ້ານ.
ຕາມການລາຍງານຈາກເພຈຂ່າວອີຈັນ ຂອງປະເທດໄທໃຫ້ຮູ້ວ່າ ຕອນເຊົ້າວັນທີ 7 ພຶດສະພາ 2020 ເວລາ 9:00 ໂມງ ບໍລິເວນຂ້າງເສັ້ນທາງ ແລະລານອາຄານການຄ້າຂົວມິດຕະພາບລາວ-ໄທ1 ຈັງຫວັດໜອງຄາຍ ເຈົ້າໜ້າທີ່ສຳນັກງານສາທາລະນະສຸກຈັງຫວັດ ແລະສິ່ງແວດລ້ອມເທດສະບານເມືອງໜອງຄາຍ ໄດ້ຮ່ວມກັນກວດຄັດກອງ ແລະເຮັດບັນທຶກປະຫວັດແຮງງານລາວຈຳນວນ 250 ຄົນທີ່ລໍຖ້າຂ້າມແດນກັບປະເທດ.
ຕາມການສອບຖາມຂໍ້ມູນເບືຶ້ອງຕົ້ນຮູ້ວ່າ ແຮງງານກຸ່ມນີ້ໄດ້ມາລວມຕົວກັນແຕ່ວັນທີ 3 ພຶດສະພາແລ້ວ ເພື່ອຈະກັບບ້ານເກີດ ແຕ່ເນື່ອງຈາກໄທປິດຊາຍແດນຈິ່ງບໍສາມາດກັບໄດ້ ເພາະເປັນຊ່ວງປິດດ່ານຂ້າມແດນຂອງສອງປະເທດທັງລາວ ແລະໄທ.
ແນວໃດກໍ່ດີ ທາງເຈົ້າໜ້າທີ່ ສປປ ລາວ ເມື່ອໄດ້ຮັບຂ່າວກໍ່ໄດ້ປະສານງານໄປຍັງເຈົ້າໜ້າທີ່ໄທ ເພື່ອກວດສອບຫາຄວາມເປັນຈີງ ແລະຂໍໃຫ້ຝ່າຍໄທສົ່ງຂໍ້ມູນໃຫ້ ເພື່ອຈະໄດ້ນຳສະເໜີຕໍ່ຂັ້ນເທິງໄດ້ພິຈາລະນາແກ້ໄຂຕໍ່ໄປ.
ແຮງງານກຸ່ມນີ້ແມ່ນເດີນທາງມາຈາກຈັງຫວັດຕ່າງໆຂອງໄທ ມາລໍຖ້າກັບປະເທດ ໄດ້ທະຍອຍມາຮອດແຕ່ວັນທີ 3 ພຶດສະພາແລ້ວຈາກຫຼັກ 10 ຄົນເພີ່ມຂຶ້ນເລື້ອຍໆເປັນຫຼັກຮ້ອຍ ແລະຍັງມີຫຼາຍຂຶ້ນຕໍ່ເນື່ອງ.
ແຫຼ່ງຂ່າວລາຍງານໄດ້ສຳພາດແຮງງານຄົນໜຶ່ງໃນແຂວງຫຼວງພະບາງບອກວ່າໄດ້ເດີນທາງກັບປະເທດເນື່ອງຈາກໝົດສັນຍາແຮງງານກັບນາຍຈ້າງແລ້ວ ແລະໄດ້ຂ່າວວ່າລັດຖະບານລາວຈະເປີດດ່ານໃຫ້ຄົນລາວກັບປະເທດຈິ່ງໄດ້ນັດກັບໝູ່ຫຼາຍຄົນມາລວມຕົວກັນທີ່ນີ້.
ເພື່ອໃຫ້ແຮງງານເຫຼົ່ານັ້ນໄດ້ກັບບ້ານຈິ່ງຢາກຮຽກຮ້ອງພາກສ່ວນກ່ຽວຂ້ອງໃຫ້ການຊ່ວຍເຫຼືອ ໂດຍຕອນນີ້ກຳລັງປະສານງານໄປສະຖານທູດລາວຢູ່ບາງກອກ ເພາະຢູ່ຝັ່ງໄທລຳບາກຕ້ອງມີຄ່າໃຊ້ຈ່າຍທຸກວັນເງິນທີ່ມີຕິດຕົວມານຳກໍ່ບໍ່ຫຼາຍ ມາຢູ່ຫຼາຍວັນໃກ້ໝົດແລ້ວ ຖ້າລັດຖະບານລາວມາຮັບກໍ່ຍິນດີເຂົ້າກັກຕົວຕາມລະບຽບຂໍພຽງໄດ້ກັບປະເທດ.