Monday, November 29, 2021

ພິທີມອບ – ຮັບ ໂຮງຮຽນມັດທະຍົມສົມບູນຫຼັງໃໝ່ ມູນຄ່າ 1 ລ້ານ ໂດລາສະຫະລັດ

ໃນວັນທີ 13 ພະຈິກ 2019 ຢູ່ທີ່ເມືອງດາກຈຶງ, ແຂວງເຊກອງ ໄດ້ຈັດພິທີມອບ – ຮັບໂຮງຮຽນມັດທະຍົມສົມບູນຫຼັງໃໝ່, ໂດຍການເຂົ້າຮ່ວມຂອງ ທ່ານກິ່ງມະໂນ ພົມມະຫາໄຊ ຮອງລັດຖະມົນຕີ, ຮອງຫົວໜ້າຫ້ອງວ່າການປະທານປະເທດ, ມີ ທ່ານຮຈ.ປອ.ກອງສີ ແສງມະນີ ຮອງລັດຖະມົນຕີກະຊວງສຶກສາ ແລະ ກິລາ, ທ່ານຫວຽນບ໋າຮຸງ ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສສ ຫວຽດນາມ ປະຈຳລາວ, ທ່ານ ຄຳເຜີຍ ແກ້ວກີນນາລີ ຮອງປະທານຄະນະກຳມະການຮ່ວມມືລາວ – ຫວຽດ, ທ່ານ ກວາກຮຸ່ງຮຽບ ຮອງປະທານ ທະນາຄານ ( BIDV ), ມີທ່ານ ຖາວອນ ພົມມະໄລລຸນ ຄະນະປະຈໍາພັກແຂວງ ຮອງເຈົ້າແຂວງເຊກອງ, ພ້ອມດ້ວຍຕ່າງໜ້າບໍລິສັດຈິດຈະເລີນກໍ່ສ້າງ, ມີບັນດາຫົວໜ້າພະແນກການທີ່ກ່ຽວຂ້ອງຈາກແຂວງ ແລະ ເມືອງເຂັ້າຮ່ວມເປັນສັກຂີພິຍານ.

ທ່ານ ຫງຸຍເທຫຽນ ປະທານບໍລິສັດຈິດຈະເລີນກໍ່ສ້າງ, ເຊິ່ງເປັນຜູ້ຮັບເໝົາກໍ່ສ້າງໂດຍກົງ ກໍ່ໄດ້ຂື້ນລາຍງານກ່ຽວກັບຜົນສຳເລັດການກໍ່ສ້າງອາຄານຮຽນດັ່ງກ່າວ, ເຊີ່ງອາຄານຫຼັງດັ່ງກ່າວແມ່ນໄດ້ເລີ້ມລົງມືກໍ່ສ້າງມາແຕ່ວັນທີ 25 ມິຖຸນາ 2018 ແລະ ສໍາເລັດໃນວັນທີ 7 ມິຖຸນາ 2019 ເຊີ່ງມີຄວາມຍາວ 56 ແມັດ, ກວ້າງ 16,8 ແມັດ, ເປັນອາຄານ 2 ຊັ້ນ, ເທດ້ວຍເບຕົງເສີມເຫຼັກ, ມຸງດ້ວຍກະເບື້ອງ, ປະກອບມີ:

ຫ້ອງຮຽນພາສາຕ່າງປະເທດ 1 ຫ້ອງ, ສ່າງເກັບເຄື່ອງທົ່ວໄປ 2 ຫ້ອງ, ຫ້ອງເກັບເຄື່ອງທົດລອງ 1 ຫ້ອງ, ຫ້ອງສະມຸດ 1 ຫ້ອງ, ຫ້ອງການຄູ 1 ຫ້ອງ, ຫ້ອງປະຊຸມ 1 ຫ້ອງ, ຫ້ອງຄອມພິວເຕີ 2 ຫ້ອງ, ຫ້ອງຮຽນ 5 ຫ້ອງ, ຫ້ອງຂາອອກ – ຂາເຂົ້າ 1 ຫ້ອງ ແລະ ຫ້ອງທົດລອງວິຊາຮຽນເຄມີ, ຊີວະ, ຟິຊິກ ຄະນິດສາດ 4 ຫ້ອງ, ມີລະບົບໄຟຟ້າ ແລະ ນໍ້າປະປາຄົບຊຸດ, ລວມມູນຄ່າການກໍ່ສ້າງທັງໝົດ 1 ລ້ານໂດລາສະຫະລັດ ຫຼື ປະມານ 9 ຕື້ກວ່າກີບ ໂດຍແມ່ນທຶນຊວ່ຍເຫຼືອລ້າຈາກລັດຖະບານ ສສ ຫວຽດນາມ.

ເຊີ່ງພາຍຫຼັງກໍ່ສ້າງສໍາເລັດຢ່າງເປັນທາງການແລ້ວທາງພາກສ່ວນທີ່ກ່ຽວຂ້ອງກໍ່ໄດ້ມອບໃຫ້ແກ່ເມືອງດາກຈຶງ ເພື່ອນຳໃຊ້ເຂົ້າໃນການຮຽນ, ການສອນ.


ທີ່ມາ: Medialao

- Advertisment -

Most Popular