ໃນລະຫວ່າງວັນທີ 2-4 ພະຈິກ 2019, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມສຸດຍອດອາຊຽນ ຄັ້ງທີ 35 ແລະ ກອງປະຊຸມສຸດຍອດກັບບັນດາຄູ່ເຈລະຈາອາຊຽນ ທີ່ ບາງກອກ, ປະເທດໄທ.
ກອງປະຊຸມສຸດຍອດອາຊຽນ ຄັ້ງທີ 35 ແບບຄົບຄະນະ ຈັດຂຶ້ນໃນຕອນແລງຂອງວັນທີ 02 ພະຈິກ 2019,

ເຊິ່ງບັນດາຜູ້ນຳອາຊຽນໄດ້ພ້ອມກັນປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບຄວາມພະຍາຍາມໃນການສືບຕໍ່ສ້າງປະຊາຄົມອາຊຽນໃຫ້ເຂັ້ມແຂງ ມີເສດຖະກິດຂະຫຍາຍຕົວໄປຄຽງຄູ່ກັບການພັດທະນາແບບຍືນຍົງ ແລະ ບໍ່ປະປ່ອຍຜູ້ໃດໄວ້ທາງຫລັງ ພາຍໃຕ້ຄຳຂວັນ: “ຮ່ວມແຮງ ຮ່ວມໃຈ ກ້າວໄກ ຍືນຍົງ”. ໃນນີ້, ຜູ້ນຳອາຊຽນ ໄດ້ຕີລາຄາສູງຕໍ່ຄວາມຄືບໜ້າໃນການຈັດຕັ້ງປະຕິບັດວິໄສທັດອາຊຽນ 2025 ທີ່ ກຳລັງຢູ່ໃນໄລຍະກາງຂອງການຈັດຕັ້ງປະຕິບັດ ເຊິ່ງກວມເອົາສາມເສົາຄ້ຳ ຄື: ການເມືອງ-ຄວາມໝັ້ນຄົງ, ເສດຖະກິດ ແລະ ສັງຄົມ-ວັດທະນະທຳ ແລະ ປຶກສາຫາລືກັນກ່ຽວກັບທິດທາງໃນຕໍ່ໜ້າຂອງອາຊຽນ.

ພະນະທ່ານ ນາຍົກລັດຖະມົນຕີ ທອງລຸນ ສີສຸລິດ ໄດ້ຕີລາຄາສູງກ່ຽວກັບຜົນສຳເລັດຂອງອາຊຽນຜ່ານມາ ແລະ ສະເໜີໃຫ້ສືບຕໍ່ຮ່ວມມື ແລະ ເພີ່ມທະວີຄວາມເປັນເຈົ້າການໃນການຮັດແຄບຄວາມແຕກໂຕນດ້ານການພັດທະນາ, ຮັດ ແໜ້ນການເຊື່ອມໂຍງເສດຖະກິດອາຊຽນ ແລະ ການເຊື່ອມຈອດພາກພື້ນ, ເສີມຂະຫຍາຍການຄ້າການລົງທຶນ ແລະ ການທ່ອງທ່ຽວພາຍໃນອາຊຽນ, ສ້າງເງື່ອນໄຂເອື້ອອຳນວຍໃຫ້ແກ່ ຈຸລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ໃຫ້ສາມາດເຂົ້າເຖິງຕະຫລາດພາກພື້ນ ແລະ ສາກົນໄດ້ຢ່າງຮອບດ້ານ ແລະ ກ້າວໄປສູ່ການຫັນເປັນດີຈີຕອນກໍ່ຄືການຄ້າ ອີເລັກໂຕນິກ ແລະ ເພີ່ມທະວີການຮ່ວມມືໃນຂະແໜງການທີ່ ສປປ ລາວ ມີທ່າແຮງ ເຊັ່ນ ການຜະລິດກະສິກຳ, ອຸດສາຫະ ກຳປຸງແຕ່ງ ແລະ ພະລັງງານທີ່ບໍ່ບົກແຫ້ງ.

ໃນວັນດຽວກັນ, ພະນະທ່ານ ນາຍົກລັດຖະມົນຕີ ໄດ້ເຂົ້າຮ່ວມເປັນສັກຂີພະຍານໃນພິທີລົງນາມບົດບັນທຶກຄວາມເຂົ້າໃຈລະຫວ່າງ ເລຂາທິການໃຫຍ່ອາຊຽນ, ໃນນາມອາຊຽນ ແລະ ປະທານສະຫະພັນບານເຕະໂລກ (FIFA) ເພື່ອສົ່ງເສີມການຮ່ວມມື ແລະ ພັດທະນາຂົງເຂດບານເຕະອາຊຽນໃຫ້ນັບມື້ນັບເຂັ້ມແຂງ ລວມທັງເພື່ອກະກຽມໃຫ້ແກ່ການເປັນເຈົ້າພາບການແຂ່ງຂັນບານເຕະໂລກ ຫຼື ຟີຟາ ຂອງອາຊຽນ ປີ 2034

ທີ່ມາ: Lao National Radio

LEAVE A REPLY

Please enter your comment!
Please enter your name here