ເພື່ອເຮັດໃຫ້ ການເກັບຄ່າທຳນຽມທາງ ປະຈຳປີ 2019 ໄດ້ຖືກຈັດຕັ້ງປະຕິບັດທັນຕາມກໍານົດເວລາ ແລະ ມີຄວາມເປັນເອກະພາບ ໃນຂອບເຂດທົ່ວປະເທດ ວັນທີ 15 ຕຸລາ 2019ນີ້ ທາງພະແນກ ສ່ວຍສາອາກອນ ປະຈໍາແຂວງສາລະວັນ ຮ່ວມກັບກອງບັນຊາການ ປກສ ແຂວງ ກໍຄືເຈົ້າໜ້າທີ່ຕໍາຫຼວດຈາລະຈອນ ແລະ ທະນະຄານການຄ້າຕ່າງປະເທດລາວມະຫາຊົນ ສາຂາ ແຂວງສາລະວັນ ໄດ້ຈັດຂະບວນການຊຸກຍູ້ເສຍຄ່າທໍານຽມ ຜ່ານທາງລະບົບທະນະຄານ ຂຶ້ນຢູ່ 2 ຈຸດຄື: ເສັ້ນທາງເລກທີ 20 ແລະ ເສັ້ນທາງ 15 ນໍາພາໂດຍ ທ່ານ ຂັນທະລີ ລໍວັນຄໍາ ຮັກສາການ ຫົວໜ້າພະແນກ ສ່ວຍສາອາກອນສາລະວັນ ທັງເປັນຮອງຄະນະລົງເຄື່ອນໄຫວຊຸກຍູ້ ແນະນໍາການຈັດຕັ້ງປະຕິບັດເສຍຄ່າທໍານຽມທາງ, ກໍາລັງຕໍາຫຼວດຈາລະຈອນອ້ອມຂ້າງແຂວງ ພ້ອມດ້ວຍຜູ້ຕາງໜ້າສາມພາກສ່ວນທີ່ກ່ຽວຂ້ອງເຂົ້າຮ່ວມ.


ທ່ານ ຂັນທະລີ ລໍວັນຄໍາ ໃຫ້ຮູ້ວ່າ: ໂດຍປະຕິບັດຕາມບັນຍັດ ຂອງປະທານປະເທດ ສະບັບເລກທີ 01/ປປທ, ລົງວັນທີ 20 ກັນຍາ 2017 ວ່າດ້ວຍຄ່າທໍານຽມທາງ ແລະ ບັນດານິຕິກໍາຕ່າງໆ, ໂດຍສະເພາະແຜນການຈັດເກັບລາຍຮັບເຂົ້າງົບປະມານໃຫ້ບັນລຸຕາມແຜນທີ່ວາງໄວ້ ແລະ ການປະຕິບັດພັນທະງົບປະມານແຫ່ງລັດ ກໍແມ່ນສິດ ແລະ ພັນທະຂອງພົນລະເມືອງລາວທຸກຊັ້ນຄົນ ຕ້ອງມີສ່ວນຮ່ວມ ໃນການເສຍຄ່າທໍານຽມຜ່ານທາງລະບົບທະນະຄານຢູ່ແຂວງສາລະວັນ ເຊິ່ງຄັ້ງນີ້ແມ່ນໄດ້ຈັດຂຶ້ນເປັນຄັ້ງທີ 2 ຜ່ານການຈັດຕັ້ງໃນໄລຍະເວລາ 1 ຄາບ ເຫັນວ່າສາມາດປະຕິບັດໄດ້ 16 ຄັນ, ເປັນເງິນທີ່ມອບເຂົ້າງົບປະມານ 2,300,000 ກີບ ທັງນີ້ກໍເພື່ອປຸກລະດົມກະຕຸກຊຸກຍູ້ ແລະ ອໍານວຍຄວາມສະດວກໃຫ້ແກ່ອົງການຈັດຕັ້ງ, ພັກ-ລັດ, ຫົວໜ່ວຍທຸລະກິດ ແລະ ພໍ່ແມ່ປະຊາຊົນບັນດາເຜົ່າໄດ້ມາເສຍຄ່າທໍານຽມທາງຜ່ານລະບົບທະນະຄານຢ່າງເປັນຂະບວນຟົດຟື້ນ, ມີຄວາມສະມັກໃຈປະກອບສ່ວນເຂົ້າໃນການສ້າງສາພັດທະນາປະເທດຊາດ ເຊິງການເສຍຄ່າທຳນຽມຜ່ານທາງລະບົບທະນະຄານ ແມ່ນສາມາດຊໍາລະໄດ້ດ້ວຍ 5 ທາງເລືອກຄື:

ຊໍາລະຜ່ານທາງລະບົບເຄົາເຕີ (Counter), ຊໍາລະຜ່ານທາງອອນລາຍ (Mobile Application BCEL one BCEL I-Bank), ຊໍາລະຜ່ານຕູ້ເອທີເອັມ (ATM), ຊໍາລະຜ່ານສະຖານທີ່ຈຸດໃຫ້ບໍລິການທີ່ໄດ້ຮັບອະນຸຍາດ (BCOME) ແລະ ຊໍາລະຜ່ານທະນະຄານຕົວແທນ, ໃນນັ້ນຕາມແຜນການເຄື່ອນໄຫວສ້າງຂະບວນການຊຸກຍູ້ເສຍຄ່າທໍານຽມ ແມ່ນຈະໄດ້ລົງຫາພະແນກການອ້ອມຂ້າງແຂວງ ແລະ ກຸ່ມບ້ານບັນດາເມືອງໃນທົ່ວແຂວງ ຕອນທ້າຍທ່ານກໍໄດ້ຮຽກຮ້ອງມາຍັງບຸກຄົນ, ນິຕິບຸກຄົນ ແລະ ການຈັດຕັ້ງຕະຫລອດຮອດພໍ່ແມ່ປະຊາຊົນບັນດາເຜົ່າທີ່ນໍາໃຊ້ຍານພາຫະນະ ພາຍໃນແຂວງສາລະວັນໃຫ້ຮີບຮ້ອນຕື່ນຕົວ ປະກອບສ່ວນພັນທະຂອງຕົນຢ່າງຕັ້ງໜ້າເວົ້້າລວມ, ເວົ້າສະເພາະແມ່ນເສຍຄ່າທໍານຽມທາງປະຈໍາປີ ໃຫ້ມີຄວາມຕື່ນຕົວ ໃນການແຈ້ງ ແລະ ຊໍາລະຄ່າທໍານຽມໃຫ້ຫລາຍຂຶ້ນ.

ພາບ-ຂ່າວ: ກິນດາວັນ
MEDIALAOS

LEAVE A REPLY

Please enter your comment!
Please enter your name here