ຄະ­ນະ​ນຳ​ດ້ານ​ການ­ທ່ອງ­ທ່ຽວ​ຈາກ ພາກ​ລັດ ແລະ ເອ­ກະ​ຊົນ ສປປ ລາວ ໄດ້​ເຂົ້າ​ຮ່ວມ​ພິ­ທີ​ເປີດ​ງານ​ເທ​ສະ­ການ​ທ່ອງ ທ່ຽວ​ສາ­ກົນ ຢູ່​ແຂວງ​ຫູ​ໜານ ສປ ຈີນ ປະ­ຈຳ​ປີ 2019 ໃນ​ວັນ​ທີ 22 ກັນ­ຍາ 2019 ໂດຍ​ຂະ­ແໜງ​ທ່ອງ​ທ່ຽວ ທັງ​ພາກ​ລັດ ແລະ ເອ­ກະ​ຊົນ ເຂົ້າ​ຮ່ວມ​ກັບ​ບັນ­ດາ​ປະ­ເທດ​ອື່ນໆ​ໃນ​ທົ່ວ​ໂລກ ປະ­ມານ 500 ກວ່າ​ຄົນ.

 

ຄະ­ນະ​ທ່ອງ​ທ່ຽວ​ລາວ​ນຳ​ໂດຍ​ທ່ານ ສະ­ຫວັນ​ຄອນ ຣາ​ຊ​ມຸນ­ຕີ ຮອງ​ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ບັນ­ດາ​ບໍ­ລິ­ສັດ​ທ່ອງ​ທ່ຽວ ຈາກ ສປປ ລາວ ໄດ້​ເດີນ­ທາງ​ໄປ​ເຂົ້າ​ຮ່ວມ​ເທ​ສະ­ການ​ດັ່ງ­ກ່າວ ເພື່ອ​ເພີ່ມ​ທະ­ວີ​ການ​ຮ່ວມ​ມື​ດ້ານ​ການ­ທ່ອງ­ທ່ຽວ ການ​ຄ້າ ແລະ ການ​ລົງ­ທຶນ ຂອງ​ສອງ​ປະ­ເທດ ລາວ-ຈີນ. ງານ​ເທ­ສະ​ການ­ທ່ອງ­ທ່ຽວ​ໃນ​ຄັ້ງ​ນີ້ ຈະ​ເປັນ​ນິ­ມິດ​ໝາຍ​ທີ່​ດີ ໃຫ້​ແກ່​ການ​ເສີມ​ສ້າງ​ສາຍ​ພົວ­ພັນ​ຮ່ວມ​ມື​ມີ​ຄວາມ​ແໜ້ນ​ແຟ້ນ​ຍິ່ງໆ​ຂຶ້ນ ໂດຍ​ສະ­ເພາະ ແມ່ນ​ແນ­ໃສ່​ການ​ກະ­ຕຸກ​ຊຸກ­ຍູ້ ເພີ່ມ​ທະ­ວີ​ການ​ຮ່ວມ​ມື​ດ້ານ​ການ­ທ່ອງ­ທ່ຽວ ການ​ຄ້າ ແລະ ການ​ລົງ­ທຶນ ຂອງ ສອງ​ປະ­ເທດ​ໃຫ້​ນັບ​ມື້​ນັບ​ກວ້າງ­ຂວາງ​ຍິ່ງ​ຂຶ້ນ.

 

ແຂວງ​ຫູ​ໜານ ແລະ ສປປ ລາວ ໄດ້​ເພີ່ມ​ທະ­ວີ​ການ​ຮ່ວມ​ມື​ທາງ​ດ້ານ​ວັດ­ທະ­ນະ­ທຳ ແລະ ທ່ອງ​ທ່ຽວ ໃຫ້​ແທດ­ເໝາະ​ກັບ​ສະ­ພາບ​ການ​ຕົວ​ຈິງ ນັບ​ແຕ່​ເດືອນ​ກໍ­ລະ­ກົດ 2018 ທີ່​ຜ່ານ​ມາ ໄດ້​ລິ​ເລີ່ມ​ໂຄງ­ການ​ເຊື້ອ​ເຊີນ​ນັກ​ທ່ອງ​ທ່ຽວ​ຈາກ​ຫູ​ໜານ​ຫຼາຍ ກວ່າ 10.000 ຄົນ ມາ​ຢ້ຽມ­ຢາມ ສປປ ລາວ ຊຶ່ງ​ໄດ້​ສຳ­ເລັດ​ຕາມ​ລະ­ດັບ​ຄາດ­ໝາຍ. ພາຍ­ຫຼັງ​ເປີດ​ປີ​ທ່ອງ​ທ່ຽວ ລາວ-ຈີນ 2019 ເປັນ­ຕົ້ນ​ມາ ອີງ​ຕາມ​ສະ­ຖິ­ຕິ 6 ເດືອນ​ຕົ້ນ​ປີ ໄດ້​ມີ​ນັກ​ທ່ອງ​ທ່ຽວ​ເຂົ້າ​ມາ​ທ່ຽວ​ລາວ 2 ລ້ານ​ກວ່າ​ຄົນ ເພິ່ມ​ຂຶ້ນ 5% ຖ້າ​ທຽບ­ໃສ່​ໄລ­ຍະ​ດຽວ​ກັນ​ໃນ​ປີ 2018 ໃນ​ນັ້ນ ຈຳ­ນວນ​ນັກ​ທ່ອງ​ທ່ຽວ​ຈີນ​ມີ​ເຖິງ 5 ແສນ​ກວ່າ​ຄົນ ເພີ່ມ​ຂຶ້ນ 13% ໃນ​ຕົວ​ເລກ​ຄາດ­ໝາຍ 1 ລ້ານ​ເທື່ອ​ຄົນ.

 

ນອກ​ນີ້ ຄະ­ນະ​ນຳ​ທ່ອງ​ທ່ຽວ​ຝ່າຍ​ລາວ​ຈະ​ໄດ້​ຮ່ວມ​ກັບ​ເພື່ອນ​ມິດ​ຈາກ​ປະ­ເທດ​ຕ່າງໆ ຢ້ຽມ­ຢາມ​ສະ­ຖານ­ທີ່​ທ່ອງ​ທ່ຽວ ພາຍ​ໃນ​ແຂວງ​ຫູ​ໜານ ແລະ ສຳ­ຜັດ​ກັບ​ທິວ​ທັດ​ທຳ​ມະ​ຊາດ ຊີມ​ອາ­ຫານ​ອັນ​ແຊບ​ຊ້ອຍ​ຂອງ​ແຂວງ​ຫູ​ໜານ ແລະ ພ້ອມ​ດຽວ​ກັນ​ນັ້ນ ກໍ​ຈະ​ໄດ້​ຖອດ​ຖອນ​ບົດ­ຮຽນ​ແລກ­ປ່ຽນ​ປະ­ສົບ​ການ ໃນ​ການ​ພັດ­ທະ­ນາ​ວັດ­ທະ­ນະ­ທຳ ແລະ ທ່ອງ​ທ່ຽວ​ຂອງ​ແຂວງ​ຫູ​ໜານ ເພື່ອ​ນຳ​ເອົາ​ບົດ­ຮຽນ​ອັນ​ລ້ຳ​ຄ່າ​ດັ່ງ­ກ່າວ​ນັ້ນ ກັບ​ໄປ​ສົມ­ທົບ​ກັບ​ພະ­ແນກ­ການ​ທີ່​ກ່ຽວ­ຂ້ອງ ເພື່ອ​ໝູນ​ໃຊ້​ໃຫ້​ເກີດ​ປະ­ໂຫຍດ​ສູງ​ສຸດ.

 

ທີ່ມາ: ນສພ ວຽງຈັນໃຫມ່

LEAVE A REPLY

Please enter your comment!
Please enter your name here