ໂຄສົກລັດຖະບານໄດ້ລາຍງານຜົນກອງປະຊຸມລັດຖະບານ ໃນຕອນແລງຂອງມື້ນີ້ 16/09/2019 ວ່າ ປີນີ້ ສປປ ລາວ ໄດ້ປະເຊີນໜ້າ ກັບໄພພິບັດທຳມະຊາດໃນຂອບເຂດທົ່ວປະເທດຢ່າງໜັກໜ່ວງໂດຍສະ ເພາະແມ່ນໄພພິບັດນໍ້າຖ້ວມທີ່ເກີດຂຶ້ນຢູ່ 6 ແຂວງພາກ ກາງ ແລະ ພາກໃຕ້ ໃນທ້າຍເດືອນສິງຫາ ຫາ ຕົ້ນເດືອນກັນຍາ 2019 ທີ່ຜ່ານມາ.

ທ່ານ ຈະເລີນ ເຢຍປາວເຮີ ລັດຖະມົນຕີ ປະຈຳສຳນັກງານນາຍົກ, ໂຄສົກລັດຖະບານ ໄດ້ກ່າວຕໍ່ສື່ມວນຊົນໃນການຖະແຫຼງຂ່າວພາຍຫຼັງກອງປະຊຸມດັ່ງ ກ່າວວ່າ: ນັບແຕ່ເດືອນມັງກອນ ຫາ ເດືອນກັນຍາ 2019 ນີ້, ໄດ້ເກີດໄພພິບັດນໍ້າຖ້ວມ, ລົມພະຍຸພັດ, ຟ້າຜ່າ, ດິນເຈື່ອນ, ໄຟໄໝ້ ແລະ ສັດຕູພືດທໍາ ລາຍຜົນລະປູກຢູ່ 13 ແຂວງ ອັນໄດ້ ສົ່ງຜົນກະທົບໂດຍກົງຕໍ່ປະຊາຊົນ ໃນ 112 ເມືອງ, 2.072 ບ້ານ, 179.068 ຄອບຄົວ, 579.299 ຄົນ, ຍິງ 56.636 ຄົນ, ເສຍຊີວິດ 28 ຄົນ ແລະ ສູນຫາຍ 7 ຄົນ.
ສະເພາະໄພພິບັດນໍ້າຖ້ວມທີ່ເກີດຂຶ້ນ ໃນພາກກາງແລະພາກໃຕ້ນັ້ນລວມມີ 6 ແຂວງ ຄື: ແຂວງຄໍາມ່ວນ, ສະຫວັນນະເຂດ, ສາລະວັນ, ເຊກອງ, ຈໍາປາສັກ ແລະ ແຂວງອັດຕະປືອັນໄດ້ ສົ່ງຜົນກະທົບໂດຍກົງຕໍ່ປະຊາຊົນ 546,000 ກວ່າຄົນ ໃນ 1,655 ບ້ານ ແລະ 47 ເມືອງ. ມີຜູ້ເສຍຊີວິດ 18 ຄົນ ຢູ່ແຂວງສະຫວັນນະເຂດ 3 ຄົນ, ສາລະວັນ 3 ຄົນ, ອັດຕະປື 4 ຄົນ ແລະ ແຂວງຈໍາປາສັກ 8 ຄົນ, ສູນຫາຍ 1 ຄົນ ຢູ່ແຂວງຈໍາປາສັກ. ປະຊາຊົນໄດ້ຖືກຍົກຍ້າຍຫຼາຍກວ່າ 10,000 ຄອບຄົວ ມີເກືອບ 40,000 ຄົນ.

ຜົນກະທົບຈາກໄພນໍ້າຖ້ວມໃນປີ 2019 ແມ່ນໜັກໜ່ວງ ໂດຍສະເພາະ ແມ່ນຢູ່ບັນດາແຂວງດັ່ງກ່າວຖືກນໍ້າ ຖ້ວມໜັກ ໃນຮອບ 40 ກວ່າປີ, ຊຶ່ງເຮັດໃຫ້ມີຜົນກະທົບເປັນບໍລິເວນ ກວ້າງ ແລະ ເສຍຫາຍທາງດ້ານຊິວິດ, ຊັບສິນ, ໂຄງລ່າງພື້ນຖານ ແລະ ພື້ນຖານການຜະລິດຢ່າງໜັກ.
ທ່ານ ຈະເລີນ ກ່າວຕື່ມອີກວ່າ: ຕໍ່ກັບ ສະພາບການດັ່ງກ່າວ, ລັດຖະບານ ກໍ່ໄດ້ເອົາໃຈໃສ່ຊີ້ນໍາຢ່າງໃກ້ຊິດ ແລະ ບັນດາກະຊວງທີ່ກ່ຽວຂ້ອງ, ກຳລັງ ປກຊ-ປກສ, ບັນດາແຂວງ ແລະ ອົງການຊ່ວຍເຫຼືອສັງຄົມຕ່າງໆ ກໍ່ໄດ້ ສຸມທຸກກຳລັງແຮງ, ພາຫະນະ ແລະ ວັດຖຸອຸປະກອນ ເຂົ້າໄປຊ່ວຍ ເຫຼືອ ປະຊາຊົນທີ່ໄດ້ຮັບຜົນກະທົບຢ່າງທັນການ, ຊຶ່ງສາມາດຫຼຸດຜ່ອນຄວາມ ເສຍຫາຍທາງດ້ານຊີວິດ ແລະ ຊັບສິນ ໄດ້ດີສົມພໍຄວນ ແຕ່ກໍ່ໄດ້ພົບກັບອຸປະ ສັກຕ່າງໆຫຼາຍປະການ.

ກອງປະຊຸມລັດຖະບານໄດ້ປຶກສາຫາລື ວິທີການແກ້ໄຂໄພພິບັດນໍ້າຖ້ວມ ໃນ ທົ່ວປະເທດ ປີ 2019 ໃນຕອນບ່າຍ ຂອງມື້ນີ້ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ຊີ້ນຳໃຫ້ແຕ່ ລະກະຊວງຮີບຮ້ອນເອົາໃຈໃສ່ຢ່າງ ຈິງຈັງໃນການແກ້ໄຂໄພພິບັດທາງ ທຳມະຊາດໂດຍສະເພາະໄພນ້ຳຖ້ວມທີ່ເກີດຂຶ້ນໃນ 6 ແຂວງພາກກາງ ແລະ ພາກໃຕ້ໃນຄັ້ງນີ້.

 

ໂດຍສະເພາະແມ່ນໃຫ້ຄະນະຮັບຜິດ ຊອບແກ້ໄຂໄພພິບັດ ຢູ່ແຕ່ລະແຂວງ ສົມທົບກັບ ຄະນະກຳມະການປ້ອງ ກັນ ແລະ ຄວບຄຸມໄພພິບັດແຫ່ງຊາດ ສືບຕໍ່ຈັດຕັ້ງຊີ້ນຳຢ່າງໃກ້ຊິດໃນການ ແກ້ໄຂ ແລະ ຊ່ວຍເຫຼືອປະຊາຊົນ ທີ່ ຍັງຢູ່ສູນພັກຊົ່ວຄາວ, ຮັບປະກັນໃຫ້ ເຂົາເຈົ້າມີເຂົ້າກິນ, ນ້ຳດື່ມ-ນ້ຳສະອາດ ໃຊ້ ອັນນີ້ກໍ່ເພື່ອບໍ່ໃຫ້ເກີດພະຍາດ ລະບາດ, ໃຫ້ມີຄວາມສະຫງົບ. ພ້ອມກັນນີ້ ກໍ່ໃຫ້ສືບຕໍ່ປຸກລະດົມທົ່ວ ສັງຄົມຊ່ວຍເຫຼືອປະຊາຊົນທີ່ໄດ້ຮັບ ຜົນກະທົບຈາກໄພພິບັດດັ່ງກ່າວ.
ທ່ານ ນາຍົກຍັງໄດ້ແນະນຳໃຫ້ສຸມທຸກ ກຳລັງທະຫານ, ຕຳຫຼວດ ແລະ ທຸກໆພາກສ່ວນ ລວມທັງ ພາຫະນະ ທີ່ຈຳເປັນຕ່າງໆ ພ້ອມທັງ ຊີ້ນຳລະ ອຽດເພື່ອສຸມໃສ່ຊ່ວຍເຫຼືອ ປະຊາຊົນ ໃນການຍົກຍ້າຍຈາກທີ່ພັກຊົ່ວຄາວ ກັບຄືນ ໄປບ້ານເຮືອນຂອງພວກ ເຂົາເຈົ້າ. ພ້ອມທັງເອົາເຄື່ອງຂອງຊ່ວຍເຫຼືອ ທີ່ໄດ້ຮັບຈາກການບໍລິຈາກໃຫ້ໄປຮອດໄປເຖິງ ປະຊາຊົນຢ່າງແທ້ຈິງ. ພ້ອມດຽວກັນນີ້, ໃຫ້ແຕ່ລະຂະແໜງ ການ ແລະ ທ້ອງຖິ່ນ ຕ້ອງສຸມໃສ່ວຽກ ງານແກ້ໄຂໄພພິບັດເປັນວຽກຈຸດສຸມ, ສຳຄັນໂດຍມີການວາງແຜນ ແລະ ມີຜູ້ ຊີິ້ນຳນໍາພາໃນການຈັດຕັ້ງປະຕິບັດ ຕົວຈິງ.

ທ່ານນາຍົກຍັງໄດ້ຮຽກຮ້ອງມາຍັງຂະແໜງການ ແລະ ທ້ອງຖິ່ນ ກະກຽມ ຟື້ນຟູການຜະລິດ ພາຍຫຼັງນ້ຳບົກແຫ້ງ ລົງ ເພື່ອເຮັດໃຫ້ການ ຜະລິດເຂົ້າ ສູ່ສະພາບປົກກະຕິ ແນໃສ່ຮັບປະກັນ ດ້ານສະບຽງອາຫານ ໂດຍສະເພາະ ການຈັດສັນແນວພັນ, ປັດໄຈການ ຜະລິດ, ພາຫະນະການຜະລິດ ແລະ ອື່ນໆ ໃຫ້ທັນການ. ເອົາໃຈໃສ່ປັບປຸງໂຄງລ່າງພື້ນຖານໂດຍສະເພາະ ສ້ອມແປງເສັ້ນທາງ ໃຫ້ສາ ມາດໄປ-ມາໄດ້, ສ້ອມແປງໂຮງຮຽນ, ໂຮງໝໍ, ສຸກສາລາ ໃຫ້ສາມາດເປີດ ນຳໃຊ້ໄດ້.

 

ນອກຈາກນີ້ ທ່ານ ທອງລຸນ ຍັງຊີ້ນຳໃຫ້ສູນບັນຊາການແກ້ໄຂໄພພິບັດ ຢູ່ຂັ້ນສູນກາງ ແລະ ທ້ອງຖິ່ນມີ ການປະສານງານກັນຢ່າງວ່ອງໄວ, ຄ່ອງຕົວ ສາມາດແກ້ໄຂບັນຫາໄດ້ຢ່າງ ທັນການ. ພ້ອມກັນນີ້ ໃຫ້ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເອົາໃຈໃສ່ລົງຕິດຕາມ ແລະ ລາຍງານສະພາບຕົວຈິງ ໃນການແກ້ໄຂບັນຫາໄພພິບັດໃນຄັ້ງນີ້ ຢ່າງໃກ້ຊິດ ເພື່ອໃຫ້ສັງຄົມໄດ້ຮັບຊາບ ຂໍ້ມູນທີ່ຖືກຕ້ອງ, ລະອຽດ, ຈະແຈ້ງ ແລະ ທັນການ. ທັງເປັນການປຸກລະ ດົມ, ເຕົ້າໂຮມຄວາມສາມັກຄີທົ່ວ ສັງຄົມ ແລະ ສຶກສາອົບຮົມການເມືອງ ແນວຄິດ ໃຫ້ປະຊາຊົນ. ພ້ອມກັນນັ້ນ, ໃຫ້ເອົາໃຈໃສ່ຕິດຕາມ ແລະ ແກ້ໄຂ ການອອກຂ່າວທີ່ບໍ່ມີມູນຄວາມຈິງ, ໃສ່ຮ້າຍປ້າຍສີ ແລະ ອື່ນໆຂອງບຸກ ຄົນຜ່ານສື່ສັງຄົມອອນລາຍ ຈຳນວນ ໜຶ່ງຢ່າງທັນການ.

ທ່ານ ນາຍົກຍັງໄດ້ຊີ້ນຳໃຫ້ສືບຕໍ່ຮຽກ ຮ້ອງມາຍັງທຸກພາກສ່ວນທົ່ວສັງຄົມ ໃຫ້ຮ່ວມແຮງ-ຮ່ວມໃຈກັນ, ປຸກລະ ດົມການຊ່ວຍເຫຼືອ, ການຮ່ວມມື ທັງພາຍໃນ ແລະ ຕ່າງປະເທດ.

ບົດຂ່າວ: ວຽງຈັນທາຍ
ພາບ: ຫ້ອງການ ສນຍ

1 COMMENT

LEAVE A REPLY

Please enter your comment!
Please enter your name here