Monday, November 29, 2021

ກະກຽມຈັດກອງປະຊຸມສໍາມະນາ ການຮ່ວມມືພັດທະນາອຸດສາຫະກຳ ເຕັກໂນໂລຊີລະດັບສູງ ລາວ-ຈີນ ຄັ້ງທີ I

ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ​​ ກະຊວງ​ວິທະຍາສາດ ແລະ ເຕັກໂນໂລຊີ (ກວຕ) ໄດ້ຖະແຫຼງຕໍ່ສື່ມວນຊົນໃນຕອນແລງວັນທີ 13 ກັນຍາ 2019 ຢູ່ ກວຕ ກ່ຽວກັບກອງປະຊຸມສໍາມະນາ ການຮ່ວມມືພັດທະນາອຸດສາຫະກຳ ເຕັກໂນໂລຊີລະດັບສູງ ລາວ-ຈີນ ຄັ້ງທີ I ປີ 2019 ທີ່ຈະໄຂຂື້ນລະຫວ່າງວັນທີ 11-16 ຕຸລາ 2019 ທີ່ ຫໍປະຊຸມແຫ່ງຊາດ.
ກອງປະຊຸມດັ່ງກ່າວ ຈະມີຫຼາຍກິດຈະກໍາ ທີ່ສຳຄັນ ເຊັ່ນ: ກອງປະຊຸມສຳມະນາ ກ່ຽວກັບ ການຮ່ວມມືພັດທະນາອຸດສາຫະກຳເຕັກໂນໂລຊີລະດັບສູງ ລາວ-ຈີນ ຄັ້ງທີ I, ກອງປະຊຸມວຽກງານວິທະຍາສາດ ແລະ ເຕັກໂນໂລຊີ ທົ່ວປະເທດ ຄັ້ງທີ III, ກອງປະຊຸມສຳມະນາລະດັບຊາດກ່ຽວກັບການພັດທະນາວິທະຍາດ ແລະ ເຕັກໂນໂລຊີ ໃນຍຸກອຸດສາຫະກຳ 4.0, ງານສະເຫຼີມສະຫຼອງສັບປະດາວິທະຍາສາດແຫ່ງຊາດ, ງານປະກວດແນວຄວາມຄິດສ້າງສັນສິ່ງປະດິດສ້າງ ແລະ ງານສະແດງຜົນງານການຄົ້ນຄວ້າ ແລະ ຜະລິດຕະພັນເຕັກໂນໂລຊີທີ່ທັນສະໄໝ.

ກອງປະຊຸມສຳມະນາກ່ຽວກັບການຮ່ວມມືພັດທະນາອຸດສາຫະກຳເຕັກໂນໂລຊີລະດັບສູງ ລາວ-ຈີນ ຄັ້ງທີ I ຈະຈັດຂຶ້ນໂດຍການຮ່ວມມື ລະຫວ່າງ ກວຕ, ສປປ ລາວ ແລະ ຫ້ອງການຜູ້ຕາງໜ້າສະພາສົ່ງເສີມການຄ້າສາກົນ ສປ ຈີນ ຂະແໜງ ອຸດສາຫະກຳການກໍ່ສ້າງ ປະຈຳ ສປປ ລາວ, ບໍລິສັດທີ່ປຶກສາການລົງທຶນ ແລະ ກໍ່ສ້າງເຂື່ອນໄຟຟ້າຈຳກັດຜູ້ດຽວ (IHC) ແລະ ບໍລິສັດພັດທະນາວິທະຍາສາດເຕັກນິກປັກກິ່ງ ເຈີ່ນຕີ, ຜູ້ປະກອບການທຸລະກິດ, ບັນດາບໍລິສັດ ແລະ ຫ້າງຮ້ານຕ່າງໆຈາກພາຍໃນ ແລະ ຈາກຕ່າງປະເທດ.

 

ກອງປະຊຸມນີ້ ເປັນກອງປະຊຸມຮ່ວມມືກ່ຽວກັບການພັດທະນາຂົົງເຂດເຕັກໂນໂລຊີ ຄັ້ງທໍາອິດ ຢູ່ ສປປ ລາວ, ເປັນເຫດການປະຫວັດສາດທີ່ສໍາຄັນຂອງການຮ່ວມມື ແລກປ່ຽນ ແລະ ເລືອກເຟັ້ນເອົາເຕັກໂນໂລຊີ ທີ່ກ້າວໜ້າ ທັນສະໄໝ ແລະ ເໝາະສົມ ເພື່ອດຶງດູດການລົງທຶນເຂົ້າໃນການພັດທະນາ ເຂດເຕັກໂນໂລຊີ ລະດັບສູງ ຢູ່ ສປປ ລາວ ປະກອບສ່ວນໃນການພັດທະນາພື້ນຖານໂຄງລ່າງດ້ານວິທະຍາສາດ ແລະ ເຕັກໂນໂລຊີໃຫ້ມີລັກສະນະເປັນລະບົບ ຄົບຊຸດ ເຊັ່ນ: ການຄົ້ນຄວ້າ ແລະ ພັດທະນາ, ການເຜີຍແຜ່ ສົ່ງເສີມການນໍາໃຊ້ຜົນການຄົ້ນຄວ້າວິທະຍາສາດ ແລະ ເຕັກໂນໂລຊີ, ການພັດທະນາອຸດສາຫະກໍາການຜະລິດ, ການບໍລິການ ຕິດພັນກັບການພັດທະນາຊັບພະຍາກອນມະນຸດດ້ານວິທະຍາສາດ ແລະ ເຕັກໂນໂລຊີ ດ້ວຍການສ້າງສະຖາບັນການສຶກສາ, ສູນຝຶກອົບຮົມ, ການເຕົ້າໂຮມເອົາບັນດາເຕັກໂນໂລຊີ ທີ່ກ້າວໜ້າ ທັນສະໄໝທີ່ຕິດພັນກັບເຕັກໂນໂລຊີໃນແຕ່ລະຍຸກ (ອຸດສາຫະກໍາ 4.0) ແລະ ສູນວິທະຍາສາດ, ເຕັກໂນໂລຊີ ແລະ ນະວັດຕະກໍາຕ່າງໆເພື່ອສົ່ງເສີມຜະລິດຕະພັນທ້ອງຖິ່ນເປັນຕົ້ນ.
ໃນກອງປະຊຸມດັ່ງກ່າວ ຈະໄດ້ຈັດງານວາງສະແດງຜົນງານການຄົ້ນຄວ້າ, ຜະລິດຕະພັນເຕັກໂນໂລຊີ, ການເລີ່ມກິດຈະການນະວັດຕະກໍາໃໝ່ (startup) ຈາກບັນດາມະຫາວິທະຍາໄລ, ສະຖາບັນການຄົ້ນຄ້ວາ, ບັນດາກະຊວງ, ຂະແໜງການຕ່າງປະເທດ ເຊັ່ນ: ສປ ຈີນ, ປະເທດໄທ ປະມານ 100 ກວ່າຮ້ານວາງສະແດງ (ບູດ) ຊຶ່ງຈະມີເຕັກໂນໂລຊີທີ່ທັນສະໄໝໃນຍຸກການພັດທະນາເຕັກໂນໂລຊີ 4.0 ຫຼື ອຸດສາຫະກຳ 4.0 ເຊັ່ນ: ເຕັກໂນໂລຊີ ຊີວະພາບ, ເຕັກໂນໂລຊີ ຂໍ້ມູນຂ່າວສານ ກໍຄື ການນຳໃຊ້ເຕັກໂນໂລຊີ ດິຈິຕອນ Big data, Internet of thing (IOT) ແລະ ປັນຍາປະດິດ (AI) ເປັນຕົ້ນ.

ໃນໄລຍະງານມະຫາກຳດັ່ງກ່າວນີ້ ຍັງຈະໄດ້ຈັດບັນດາກອງປະຊຸມຕ່າງໆ ເຊັ່ນ: ກອງປະຊຸມວຽກງານວິທະຍາສາດ ແລະ ເຕັກໂນໂລຊີ ທົ່ວປະເທດ ຄັ້ງທີ III, ກອງປະຊຸມສຳມະນາລະດັບຊາດ ກ່ຽວກັບການພັດທະນາວິທະຍາສາດ ແລະ ເຕັກໂນຊີໃນຍຸກ 4.​0 ເພື່ອເຜີຍແຜ່ຄວາມຮູ້ຄວາມໝາຍ ຄວາມສຳຄັນກ່ຽວກັບວຽກງານວິທະຍາສາດ ແລະ ເຕັກໂນໂລຊີ ໃນຍຸກອຸດສາຫະກໍາ 4.0 ໃຫ້ແກ່ບັນດາຂະແໜງການ, ພາກສ່ວນທຸລະກິດ ແລະ ນັກຮຽນນັກສຶກສາຈາກພາກສ່ວນຕ່າງໆ, ກອງປະຊຸມສຳມະນາກ່ຽວກັບ ການຮ່ວມມື ການຄົ້ນຄວ້າ ແລະ ໂຄງການແລກປ່ຽນທາງດ້ານວິທະຍາສາດ ແລະ ເຕັກໂນໂລຊີ ທີ່ສະໜັບສະໜູນໂດຍປະເທດຍີ່ປຸ່ນ, ງານສະເຫຼີມສະຫຼອງສັບປະດາວິທະຍາສາດແຫ່ງຊາດ, ງານປະກວດແນວຄວາມຄິດສ້າງສັນສິ່ງປະດິດ ແລະ ງານວາງສະແດງຜົນງານການຄົ້ນຄວ້າ ແລະ ຜະລິດຕະພັນເຕັກໂນໂລຊີທີ່ທັນສະໄໝ.
ທ່ານກ່າວວ່າ: ຂ້າພະເຈົ້າ ເຊື່ອໝັ້ນວ່າກອງປະຊຸມສຳມະນາ ແລະ ການວາງສະແດງເຕັກໂນໂລຊີ ຄັ້ງນີ້ ຈະເປັນເວທີແລກປ່ຽນການຮ່ວມມືທາງດ້ານການຄົ້ນຄວ້າ ແລະ ເປັນເວທີການຮ່ວມມືລົງທືນທາງດ້ານວິທະຍາສາດ ແລະ ເຕັກໂນໂລຊີ ລະຫວ່າງ ພາກລັດ, ເອກະຊົນ, ສະຖາບັນຄົ້ນຄວ້າ, ມະຫາວິທະຍາໄລ, ພາກທຸລະກິດ ແລະ ຜູ້ປະກອບການ ທັງພາຍໃນ ແລະ ຕ່າງປະເທດ ແນໃສ່ສົ່ງເສີມການນຳໃຊ້ເຕັກໂນໂລຊີລະດັບສູງ ເຂົ້າໃນການຊຸກຍູ້ການພັດທະນາເສດຖະກິດ-ສັງຄົມ ຢູ່ ສປປ ລາວ, ເຮັດໃຫ້ວຽກງານວິທະຍາສາດ ແລະ ເຕັກໂນໂລຊີ ເປັນກຳລັງຂັບເຄື່ອນທີ່ເຂັ້ມແຂງປະກອບສ່ວນເຂົ້າໃນການພັດທະນາເສດຖະກິດ – ສັງຄົມ, ເປົ້າໝາຍການພັດທະນາຂອງປະເທດ ການຫັນເປັນອຸດສະຫະກຳ ແລະ ທັນສະໄໝ, ການແກ້ໄຂຄວາມທຸກຍາກ ແລະ ບັນລຸເປົ້າໝາຍການພັດທະນາແບບຍືນຍົງSDGs.

 

ທ່ານຍັງໄດ້ເຊີນຊວນບັນດາຂະແໜງການພາກລັດ, ສະຖາບັນຄົ້ນຄວ້າ, ສະຖາບັນການສືກສາ, ມະຫາວິທະຍາໄລ, ພາກທຸລະກິດ ເອກະຊົນ ແລະ ຜູ້ປະກອບການ ທັງພາຍໃນ ແລະ ຕ່າງປະເທດປະກອບສ່ວນ ເຂົ້າຮ່ວມງານມະຫາກໍາວິທະຍາສາດ ແລະ ເຕັກໂນໂລຊີ ເຊັ່ນ: ງານສະແດງຜົນງານຂອງການຄົ້ນຄວ້າ ແລະ ຜະລິດຕະພັນເຕັກໂນໂລຊີ ທີ່ທັນສະໄໝ ຢ່າງຟົດຟື້ນ.

ຂ່າວ: ນ. ທັດສະນີ ພົງບັນດິດ

ພາບ: ບາລະຄອນ ສຸວັນນະພາສີ

 

- Advertisment -

Most Popular