ຜົນກະທົບຈາກພາຍຸດີເປຼເຊີນ ທີ່ພັດຜ່ານມາເຂົ້າສູ່ປະເທດລາວ ໂດຍ ສະເພາະແມ່ນ ເຂດພາກກາງ ແລະພາກ ໃຕ້, ນັບແຕ່ທ້າຍເດືອນສິງຫາ ເປັນຕົ້ນມາ, ໄດ້ສົ່ງຜົນເຮັດໃຫ້ມີຟ້າລົມແຮງຝົນຕົກ ໜັກຫຼາຍພື້ນທີ່ ແລະທີ່ຮ້າຍແຮງກວ່ານັ້ນແມ່ນສະພາບນໍ້າອັ່ງຂຶ້ນຖ້ວມບ້ານເຮືອນ ແລະພື້ນທີ່ທຳການຜະລິດຂອງປະຊາຊົນ ໃນແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ ແລະອັດ ຕະປື, ຕະຫຼອດຮອດເສັ້ນທາງຄົມມະນາ ຄົມຈຳນວນໜຶ່ງຖືກຕັດຂາດ ແລະຄາດ ວ່າລະດັບນໍ້າຍັງຈະສືບຕໍ່ຍຶ່ງສູງຂຶ້ນຕື່ມ, ຊຶ່ງປະຈຸບັນ ໜ່ວຍງານທີ່ກ່ຽວຂ້ອງໄດ້ ເຂົ້າໄປຊ່ວຍແກ້ໄຂສຸກເສີນແລ້ວບາງ ພື້ນທີ່ ແລະຫຼ້າສຸດຫ້ອງວ່າການສຳນັກງານນາຍົກລັດຖະມົນຕີ ກໍໄດ້ອອກ ແຈ້ງການໃຫ້ 5 ກະຊວງ, ນະຄອນ ຫຼວງ ແລະບັນດາແຂວງທົ່ວປະເທດ ຊີ້ນຳ ແລະຮັບມື-ແກ້ໄຂໄພນໍ້າຖ້ວມ.

 

ສຳລັບແຂວງເຊກອງແມ່ນໄດ້ເລີ່ມ ມາແຕ່ວັນທີ 30 ສິງຫາເປັນຕົ້ນມາ ນໍ້າ ໃນຫ້ວຍ, ຕ່າງໆທີ່ເປັນສາຂາຂອງນໍ້າ ເຊກອງເພີ່ມຂຶ້ນຢ່າງໄວໄຫຼເຂົ້າຖ້ວມໂຮງຮຽນ, ເສັ້ນທາງຄົມມະນາຄົມ, ເນື້ອ ທີ່ການຜະລິດ ແລະບ້ານເຮືອນຂອງປະ ຊາຊົນເສຍຫາຍຫຼາຍພໍສົມຄວນ ໂດຍສະ ເພາະເມືອງລະມາມ, ທ່າແຕງ, ກະລຶມ ແລະເມືອງດາກຈຶງ, ຈາກເຫດດັ່ງກ່າວ ການນໍາຂອງແຂວງ ແລະການນໍາຂອງ ແຕ່ລະເມືອງກໍໄດ້ສົ່ງກໍາລັງທະຫານ ລວມທັງຂະແໜງການກ່ຽວຂ້ອງລົງຊ່ວຍເຫຼືອປະຊາຊົນທີ່ໄດ້ຮັບຜົນກະທົບ, ສ່ວນຕົວເລກຜົນເສຍຫາຍແມ່ນຍັງ ຢູ່ໃນຂັ້ນຕອນການລວບລວມຂອງພາກ ສ່ວນກ່ຽວຂ້ອງ.ສ່ວນແຂວງຈຳປາສັກໃນເທສະ ບານແຂວງ ແລະເມືອງຕ່າງໆກໍຖືກຜົນ ກະທົບໃນວົງກວ້າງ ສະເພາະເມືອງສຸຂຸມາ ຄະນະກຳມະການປ້ອງກັນ ແລະຄວບ ຄຸມໄພພິບັດຂັ້ນເມືອງ ໄດ້ເຜີຍໃຫ້ຮູ້ວ່າ: ມີ 29 ບ້ານ ແລະ 4 ບ້ານທີ່ໜັກກວ່າໝູ່ຄື: ບ້ານລາດ, ບ້ານໂພ, ບ້ານບົກ ແລະບ້ານ ມ່ວງ, ໂດຍໃນ 4 ບ້ານນີ້ ນໍ້າໄດ້ໄຫຼຖ້ວມ ເຮືອນເລິກປະມານ 1-2 ແມັດ.

 

ແຂວງສາລະວັນ ທ່ານ ພູທົງ ຄຳ ມະນີວົງ ຮອງເຈົ້າແຂວງ ທັງເປັນປະ ທານຄະນະກຳມະການຄວມຄຸມໄພພິ ບັດຂັ້ນແຂວງໄດ້ລາຍງານໃຫ້ຮູ້ວ່າ: ນໍ້າ ຖ້ວມສູງເປັນບໍລິເວນກວ້າງ ແລະໜັກ ສຸດແມ່ນ 3 ເມືອງຄື: ເມືອງສາລະວັນ ລວມມີ 75 ບ້ານ ແລະ 40 ບ້ານຖືກຕັດ ຂາດ, ເມືອງວາປີມີ 55 ບ້ານ, ບ້ານທີ່ ຖືກຕັດ ຂາດ 21 ບ້ານ ແລະເມືອງຄົງເຊ ໂດນ 75 ບ້ານຖືກຖ້ວມ, ມີ 40 ບ້ານຖືກ ຕັດຂາດ ແລະມີສ່ວນໜຶ່ງຂອງເມືອງຕຸ້ມ ລານກໍ່ຖືກຖ້ວມເຊັ່ນກັນ, ຕໍ່ສະພາບການ ດັ່ງກ່າວປະຈຸບັນ ແຂວງໄດ້ນຳໃຊ້ເຮືອ, ເພື່ອຊ່ວຍເຫຼືອປະຊາຊົນທີ່ຢູ່ໃນເຂດ ປະສົບໄພ, ປະຈຸບັນເຮືອທີ່ມີຍັງບໍ່ພຽງພໍ ກັບຄວາມຕ້ອງການ ເພາະເສັ້ນທາງ ຫຼາຍເສັ້ນຖືກຕັດຂາດບໍ່ສາມາດໃຊ້ ລົດເຂົ້າຊ່ວຍເຫຼືອໄດ້ ໃຊ້ພຽງເຮືອ ເນື່ອງຈາກນໍ້າຖ້ວມສູງ, ແຕ່ແຂວງກໍ ໄດ້ຕັ້ງຈຸດອົບພະຍົບຊົ່ວຄາວ 3 ຈຸດຄື: ວິທະຍາໄລຄູສາລະວັນ, ສະໂມສອນແຂວງ ແລະສູນການສຶກສານອກໂຮງຮຽນເພື່ອຮັບມືກັບສະພາບດັ່ງກ່າວ.

 

ແຂວງສະຫວັນະເຂດແມ່ນເມືອງເຊ ໂປນ ນໍ້າເຊບັ້ງຫຽງ, ເຊກອກ, ນໍ້າຫ້ວຍ ຮ່ອງຄອງບຶງຍຶ່ງຂຶ້ນຢ່າງໄວວາ, ຖ້ວມ ເນື້ອທີ່ນາ, ເຮືອນປະຊາຊົນອາໄສຢູ່ຕາມ ແມ່ນໍ້າຫຼັກ, ເຮັດໃຫ້ເສັ້ນທາງຫຼາຍເສັ້ນ ຖືກນໍ້າເຊາະເຈື່ອນ, ເປ່ເພ, ການສັນຈອນ ໄປມາພົບຄວາມຫຍຸ້ງຍາກ ແລະບ້ານ ທີ່ໄດ້ຮັບຜົນກະທົບ ມີ 8 ບ້ານ, ນອກນັ້ນ ຍັງມີເສັ້ນທາງເຂົ້າບ້ານວິລະຫ້ວຍຈັງ, ຫ້ວຍມາລາ, ບ້ານແກ້ງກີວຫ້ວຍກີ, ບ້ານເຊໂປນ, ບ້ານສົບນໍ້າ, ທາງເຂົ້າ ວິທະຍາໄລເຕັກນິກ, ວິຊາຊີບສະຫວັນ ນະເຂດ, ວິທະຍາເຂດເຊໂປນ ແລະອື່ນໆ ລະດັບນໍ້າວັນທີ 4 ກັນຍາ ແທກໄດ້ 18 ແມັດ ຊຶ່ງຢູ່ຂັ້ນອັນຕະລາຍ.

 

ແຂວງຄໍາມ່ວນ ມາຮອດປະຈຸບັນ ຖືກຖ້ວມແລ້ວມີ 5 ເມືອງ, 83 ບ້ານ, ມີ 6 ພັນຄອບຄົວ, ພົນລະເມືອງ 20 ພັນຄົນ, ມີເນື້ອທີ່ນາປີຖືກນໍ້າຖ້ວມ 3,54 ພັນເຮັກຕາ, ໃນນີ້ ເມືອງໜອງ ບົກຖ້ວມ 19 ບ້ານ, 763 ຄອບ ຄົວ, ເນື້ອທີ່ນາປີຖືກນໍ້າຖ້ວມ 921,73 ເຮັກ ຕາ; ເມືອງຍົມມະລາດນໍ້າຖ້ວມ 8 ບ້ານ, ມີ 1,2 ພັນຄອບຄົວພັນຄົນ, ເນື້ອທີ່ນາ ປີຖືກນໍ້າຖ້ວມ 517 ເຮັກຕາ; ເມືອງໄຊ ບົວທອງນໍ້າຖ້ວມ 13 ບ້ານ, ມີ 322 ຄອບ ຄົວ, ເນື້ອທີ່ນາປີຖືກນໍ້າຖ້ວມ 478,12 ເຮັກຕາ; ເມືອງບົວລະພານໍ້າຖ້ວມ 25 ບ້ານ, ມີ 2 ພັນຄອບຄົວ, ມີ 14 ພັນຄົນ, ເນື້ອທີ່ນາປີຖືກນໍ້າຖ້ວມ 1,15 ພັນເຮັກ ຕາ; ເມືອງເຊບັ້ງໄຟນໍ້າຖ້ວມ 18 ບ້ານ, 1 ພັນຄອບຄົວ, ເນື້ອທີ່ນາປີຖືກນໍ້າຖ້ວມ 1,74 ພັນເຮັກຕາ, ເສຍຫາຍ 467 ຄອບ ຄົວ, ຂະນະທີ່ມາຮອດວັນທີ 3 ກັນຍາ ເຫັນວ່າ ແຕ່ລະຈຸດຂອງເມືອງຢູ່ລຽບເຊ ບັ້ງໄຟລະດັບນໍ້າແມ່ນສືບຕໍ່ເພີ່ມຂຶ້ນຢູ່.

 

ແນວໃດກໍດີ, ເພື່ອເຮັດໃຫ້ສະພາບໄພທຳມະຊາດຄັ້ງນີ້ໄດ້ຮັບການແກ້ໄຂໂດຍໄວ, ຫ້ອງວ່າການສຳນັກງານນາ ຍົກລັດຖະມົນຕີ ກໍໄດ້ອອກແຈ້ງ ການສະ ບັບເລກທີ 1522/ຫສນຍ, ລົງວັນທີ 4 ກັນຍາ 2019, ໂດຍເນັ້ນໃຫ້ບັນດາກະ ຊວງທີ່ກ່ຽວຂ້ອງ ແລະທ້ອງຖິ່ນໃນທົ່ວ ປະເທດ ສຸມທຸກກຳລັງແຮງ ເພື່ອຕ້ານ ແລະແກ້ໄຂໄພນໍ້າຖ້ວມທີ່ກຳລັງເກີດຂຶ້ນ ໃນປະຈຸບັນ ແລະອາດເກີດຂຶ້ນໜັກໜ່ວງ ໃນຊ່ວງລະດູຝົນນີ້, ໃນນັ້ນໄດ້ມອບໃຫ້ນະ ຄອນຫຼວງວຽງຈັນ ແລະບັນດາແຂວງທົ່ວປະເທດມີມາດຕະການໃນການແກ້ ໄຂໄພນໍ້າຖ້ວມທີ່ເກີດຂຶ້ນຢ່າງຮອບດ້ານ ແລະທັນການ, ພ້ອມທັງແຈ້ງເຕືອນໄພ ໂດຍສະເພາະບັນດາແຂວງພາກໃຕ້, ນອກນັ້ນ ກໍໃຫ້ກະຊວງແຮງງານ ແລະ ສະຫວັດດີການສັງຄົມລົງສົມທົບກັບ ກຳລັງປ້ອງກັນຊາດປ້ອງກັນຄວາມສະ ຫງົບ, ທ້ອງຖິ່ນ ແລະພາກສ່ວນທີ່ກ່ຽວ ຂ້ອງລົງໄປຊ່ວຍເຫຼືອຜູ້ປະສົບໄພໃຫ້ ທັນສະພາບການ, ສ່ວນກະຊວງໂຍທາ ທິການ ແລະຂົນສົ່ງ ແມ່ນໃຫ້ຕິດຕາມ ແລະແກ້ໄຂສະພາບເສັ້ນ ທາງທີ່ເປ່ເພ ຈາກໄພນໍ້າຖ້ວມ ແລະເດັດຂາດບໍ່ໃຫ້ ການສັນຈອນຖືກຕັດຂາດ;

 

ກະຊວງຊັບພະຍາຍກອນທຳມະຊາດ ແລະສິ່ງແວດລ້ອມເປັນເຈົ້າ ການຕິດຕາມ ແລະ ເຝົ້າລະວັງສະພາບການປ່ຽນແປງດິນຟ້າອາກາດຢ່າງເປັນປົກກະຕິ, ແຈ້ງເຕືອນ ແນະນຳຂົງເຂດທີ່ມີຄວາມສ່ຽງໃຫ້ມີ ສະຕິ; ສຳລັບກະຊວງກະສິກຳ ແລະປ່າ ໄມ້ ແມ່ນໃຫ້ກຽມສະໜັບສະໜູນທາງ ດ້ານເຕັກນິກວິຊາການ ແລະແນວພັນ ເພື່ອໃຫ້ປະຊາຊົນທີ່ໄດ້ຮັບຜົນກະທົບ ຈາກໄພນໍ້າຖ້ວມ ສາມາດຟື້ນຟູການ ຜະລິດ ແລະດຳລົງຊີວິດເປັນປົກກະຕິ ແລະໃຫ້ກະຊວງພະລັງງານ ແລະບໍ່ແຮ່ຊີ້ນຳບັນດາເຂື່ອນໄຟຟ້າເປັນເຈົ້າການ ຕິດຕາມລະດັບນໍ້າ ແລະບໍລິຫານນໍ້າໃນອ່າງຂອງບັນດາເຂື່ອນຕ່າງໆແຕ່ຫົວທີ ເພື່ອຮັບປະກັນການປ່ອຍນໍ້າບໍ່ໃຫ້ສົ່ງຜົນກະທົບຕໍ່ປະຊາຊົນ.

 

———-
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

LEAVE A REPLY

Please enter your comment!
Please enter your name here