ຫ້ອງການ ຄະນະກຳມະການຊາຍແດນແຫ່ງຊາດ ກະຊວງການຕ່າງປະເທດ ຢືນຢັນວ່າ: ບັນຫາຊາຍແດນ ລາວ ແລະ ກຳປູເຈຍ ບໍ່ໄດ້ເປັນດັ່ງທີ່ສື່ບາງແຫ່ງທັງພາຍໃນ ແລະ ຕ່າງປະເທດ ໄດ້ອອກຂ່າວຜ່ານທາງ ສື່ອອນລາຍໃນໄລຍະຜ່ານມາ ເປັນຂ່າວທີ່ບໍ່ມີມູນຄວາມຈິງ ເປັນການສ້າງສະຖານະການ ເພື່ອເຮັດໃຫ້ສອງປະເທດ ລາວ-ກຳປູເຈຍ ມີຄວາມເຂົ້າໃຈຜິດຕໍ່ກັນ.

ທ່ານ ອານຸສິນ ຂັດຕິຍະລາດ ຮອງຫົວໜ້າຫ້ອງການຄະນະ ກຳມະການຊາຍແດນແຫ່ງຊາດ ກ່າວໃນພິທີຖະແຫລງຂ່າວໃນວັນທີ 27 ສິງຫາ 2019 ນີ້ວ່າ: ບໍລິເວນດັ່ງກ່າວແມ່ນຢູ່ໃນ ສະພາວະປົກກະຕິ, ບໍ່ໄດ້ມີການປະເຊີນໜ້າກັນ, ບໍ່ມີຄວາມເຄັ່ງຕຶງ, ບໍ່ມີບັນຫາຮ້າຍແຮງ, ບໍ່ມີການປະທະກັນດ້ວຍກຳລັງ ແລະ ບໍ່ມີເຫດການ ທີ່ບໍ່ເພິ່ງປາຖະໜາເກີດຂຶ້ນ ແຕ່ປະການໃດ. ການຖະແຫລງຂ່າວຄັ້ງນີ້ ກໍເນື່ອງຈາກວ່າ ໃນອາທິດທີ່ຜ່ານມາໄດ້ມີກະແສຂ່າວປອມ ທີ່ແຜ່ກະຈາຍໃນສື່ອອນລາຍ ກ່ຽວກັນສະຖານະ ການຄວາມບໍ່ສະຫງົບ ໃນບໍລິເວນຊາຍແດນ ລາວ-ກຳປູເຈຍ ເຂດຍອດເຊລຳເພົາ ເຊິ່ງເບື້ອງລາວຂຶ້ນກັບເມືອງມູນລະປະໂມກ ແຂວງຈຳປາສັກ, ສ່ວນເບື້ອງກຳປູເຈຍ ຂຶ້ນກັບເມືອງແສບ ແຂວງເພຣຍວິເຮຍ.

 

ຂ່າວທີ່ບໍ່ມີມູນຄວາມຈິງ ກ່ຽວກັບບັນຫາຊາຍແດນ ລາວ-ກຳປູເຈຍ ໃນໄລຍະຜ່ານມາ, ນອກຈາກຈະເປັນການສ້າງສະຖານະການ ເພື່ອເຮັດໃຫ້ສອງປະເທດ ເກີດມີຄວາມເຂົ້າໃຈຜິດຕໍ່ກັນແລ້ວ, ຍັງເປັນການທຳລາຍ ພາບພົດທີ່ດີລະຫວ່າງ ສອງປະເທດ ທີ່ມີຕໍ່ກັນມາໂດຍຕະຫລອດ. ສອງປະເທດ ຍາມໃດກໍຖືວ່າເປັນບ້ານແກ່ວເມືອງດອງ, ເປັນບ້ານໃກ້ເຮືອນຄຽງທີ່ດີ, ເຄີຍຮ່ວມທຸກຮ່ວມສຸກນຳກັນມາ, ທັງສອງປະ ເທດແມ່ນໃຫ້ຄວາມເຄົາລົບ ຄວາມເປັນເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ ແລະ ກັນ.

ສຳລັບການແກ້ໄຂບັນຫາຊາຍແດນ ລະຫວ່າງ ລາວ ແລະ ກຳປູເຈຍ, ສອງຝ່າຍແມ່ນຢຶດໝັ້ນຕາມແນວທາງສັນຕິວິທີ ໂດຍຜ່ານການເຈລະຈາ ເພື່ອເຮັດໃຫ້ຊາຍແດນ ຮ່ວມຂອງສອງປະເທດ ໃຫ້ກາຍເປັນຊາຍແດນ ແຫ່ງສັນຕິພາບ, ມິດຕະພາບ ແລະ ການຮ່ວມມື.

 

ຂ່າວ: ຊາຍຄົນເດີມ, ພາບ: ເກດສະໜາ

1 COMMENT

LEAVE A REPLY

Please enter your comment!
Please enter your name here