ບໍລິຄໍາໄຊ ເລັ່ງປາບປາມ ພະນັກງານໃຊ້ອໍານາດໜ້າທີີ ເພື່ອຜົນປະໂຫຍດສ່ວນຕົວ

0
264

ບໍລິຄໍາໄຊ: ເພື່ອຕີລາຄາຄືນ ການຈັດຕັ້ງປະຕິບັດວຽກງານກວດກາໃນທົ່ວແຂວງບໍລິຄຳໄຊ ກອງປະຊຸມສ່ອງແສງວຽກງານກວດກາ 6 ເດືອນຕົ້ນປີ 2019 ໄດ້ຈັດຂຶ້ນໃນວັນທີ 3 ກໍລະກົດ 2019 ຢູ່ຫ້ອງປະຊຸມຫ້ອງວ່າການປົກຄອງແຂວງ ພາຍໃຕ້ການເປັນປະທານຂອງ ທ່ານ ສາຍຄຳ ວົງຄຳທອງ ຮອງປະທານຄະນະກວດກາພັກແຂວງ ມີບັນດາຜູ້ກວດກາໜ່ວຍພັກ, ກວດກາຄະນະພັກຮາກຖານອ້ອມຂ້າງແຂວງ, ຜູ້ກວດກາຄະນະພັກ ປກຊ-ປກສ, ປະທານ-ຮອງປະທານຄະນະກວດກາພັກ 7 ຕົວເມືອງ ພ້ອມດ້ວຍຄະນະກວດກາ ແລະ ພະນັກງານໃນຄະນະກວດກາພັກແຂວງ ເຂົ້າຮ່ວມ.

ກອງປະຊຸມ ໄດ້ຮັບຟັງການລາຍງານສະພາບການຈັດຕັ້ງປະຕິບັດວຽກງານກວດກາຂອງແຕ່ລະພາກສ່ວນ ເຫັນວ່າ ວຽກງານກວດກາໃນທົ່ວແຂວງໄລຍະຜ່ານມາ ໄດ້ຮັບການຈັດຕັ້ງປະຕິບັດຢ່າງຕັ້ງໜ້າ ແລະ ມີການຫັນປ່ຽນດີຂຶ້ນເລື້ອຍໆ ເຮັດໃຫ້ທຸກໆການຈັດຕັ້ງ ແລະ ການພັດທະນາເສດຖະກິດ-ສັງຄົມ ດຳເນີນໄປຢ່າງຖືກຕ້ອງຕາມລະບຽບກົດໝາຍ, ມີຄວາມໂປ່ງໃສ ແລະ ມີປະສິດທິຜົນສູງ, ການຄຸ້ມຄອງຂອງພັກ-ລັດ ມີຄວາມປອດໃສເຂັ້ມແຂງຢ່າງໜັກແໜ້ນ ຍົກສູງຄວາມເຊື່ອໝັ້ນ ແລະ ເປັນທີ່ໄວ້ວາງໃຈຂອງປະຊາຊົນບັນດາເຜົ່າ.

ນອກຈາກດ້ານດີ ທີ່ໄດ້ຍົກຂື້ນມາແລ້ວ ກໍ່ຍັງໄດ້ມີບັນຫາຈຳນວນໜຶ່ງ ທີ່ຍັງຄົງເປັນຂໍ້ຄົງຄ້າງ ເປັນຕົ້ນແມ່ນບັນຫາ: ການນຳໃຊ້ອຳນາດ, ໜ້າທີ່ວຽກງານ ໃນທາງທີ່ບໍ່ຖືກຕ້ອງ ເພື່ອຫວັງຜົນປະໂຫຍດ ຂອງພະນັກງານສັງກັດລັດຈຳນວນໜຶ່ງ, ການຈັບຈອງ, ຊື້-ຂາຍດິນ ທີ່ຜິດກັບລະບຽບກົດໝາຍ, ບັນຫາໜີ້ສິນຂອງພະນັກງານ ເນື່ອງຈາກການກູ້ຢືມເງິນກອງທຶນ ແລະ ເງິນບຸກຄົນ ແລະ ອື່ນໆ.

ຈາກນັ້ນ ບັນດາຜູ້ແທນກອງປະຊຸມ ກໍ່ໄດ້ມີການຄຳສະເໜີ, ແລກປ່ຽນຄຳຄິດຄຳເຫັນເຊິ່ງກັນ ແລະ ກັນ ເພື່ອຊອກຫາວິທີປັບປຸງ, ແກ້ໄຂ ແລະ ພັດທະນາວຽກງານກວດກາໃຫ້ດີຂຶ້ນເປັນລຳດັບ ແນໃສ່ຫຼຸດຜ່ອນບັນຫາຂໍ້ຄົງຄ້າງຕ່າງໆໃນຕໍ່ໜ້າ.

ພາບ-ຂ່າວ: bolikhamxay.gov.la

LEAVE A REPLY

Please enter your comment!
Please enter your name here