ທ່ານເຈົ້າແຂວງໄຊສົມບູນ ລົງພົບປະໂອ້ລົມພະນັກງານຫຼັກແຫຼ່ງ ພະແນກແຮງງານ ແລະ ສະຫວັດດີການສັງຄົມ ແຂວງ

0
655

ທ່ານ ພົຕ ຄຳລຽງ ອຸທະໄກສອນ ເຈົ້າແຂວງໄຊສົມບູນ ໄດ້ລົງພົບປະໂອ້ລົມພະນັກງານຫຼັກແຫຼ່ງ ແລະ ພະນັກງານ-ລັດຖະກອນ #ພະແນກແຮງງານ ແລະ ສະຫວັດດີການສັງຄົມ ແຂວງ ໃນຕອນເຊົ້າຂອງວັນທີ 4 ກໍລະກົດ 2019 ນີ້ ທີ່ສະໂມສອນເມືອງອະນຸວົງ ໂດຍການຕ້ອນຮັບຂອງທ່ານ ສົມບູນ ສອນລິດທິເດດ, ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງ ພ້ອມດ້ວຍພະນັກງານ-ລັດຖະກອນ ພາຍໃນພະແນກ ເຂົ້າຮ່ວມ.

ໂອກາດນີ້ ທ່ານ ສົມບູນ ສອນລິດທິເດດ ໄດ້ກ່າວຕ້ອນຮັບ ພ້ອມທັງລາຍງານສະພາບການເຄື່ອນໄຫວວຽກງານຮອບດ້ານ ໃນໄລຍະຜ່ານມາ ໃຫ້ທ່ານເຈົ້າແຂວງໄດ້ຮັບຊາບ. ໂອກາດດັ່ງກ່າວ ທ່ານ ພົຕ ຄຳລຽງ ອຸທະໄກສອນ ໄດ້ມີຄຳເຫັນໂອ້ລົມ ຕໍ່ພະນັກງານຫຼັກແຫຼ່ງຂອງພະແນກ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ຄະນະພັກ-ຄະນະນຳ ຂອງພະແນກແຮງງານ ແລະ ສະຫວັດດີການສັງຄົມ ແຂວງ ທີ່ໄດ້ຕັດສິນໃຈສູງຜ່ານຜ່າທຸກຄວາມຫຍຸ້ງຍາກນາໆປະການ ເຂົ້າໃນການຈັດຕັ້ງປະຕິບັດຂົງວຽກງານຂອງຕົນ ທີ່ຂັ້ນເທິງມອບໝາຍໃຫ້ ດ້ວຍຄວາມຮັບຜິດຊອບສູງ ຈົນສາມາດຍາດໄດ້ຜົນສຳເລັດໂດຍພື້ນຖານ.

ພ້ອມນີ້ ທ່ານໄດ້ເນັ້ນໜັກໃຫ້ການນຳຂອງພະແນກ ຈົ່ງສືບຕໍ່ພັດທະນາວຽກງານແຮງງານ ແລະ ສະຫວັດດີການສັງຄົມ ແຂວງ ໃຫ້ໄດ້ຮັບການເຄື່ອນໄຫວຢ່າງຕໍ່ເນື່ອງ ແລະ ຮັດກຸມຂຶ້ນກວ່າເກົ່າ ໂດຍສຸມໃສ່ການແກ້ໄຂຄວາມທຸກຍາກ ຂອງປະຊາຊົນບັນດາເຜົ່າ ເປັນໜ້າທີ່ຕົ້ນຕໍ ໄປຄຽງຄູ່ກັບວຽກງານແຮງງານ ໂດຍສະເພາະ ແມ່ນການເພີ່ມທະວີຊຸກຍູ້ສົ່ງເສີມດ້ານສີມືແຮງງານ ໃຫ້ປະຊາຊົນມີອາຊີບທີ່ແນ່ນອນ ລວມໄປເຖິງວຽກງານສະຫວັດດີການສັງຄົມ ກໍຕ້ອງໄດ້ມີການຈັດຕັ້ງປະຕິບັດ ສອດຫ້ອຍກັນໄປຢ່າງແຂງແຮງ ແລະ ກວ້າງຂວາງ ເພື່ອປະກອບສ່ວນທີ່ສຳຄັນ ເຂົ້າໃນການພັດທະນາເສດຖະກິດ-ສັງຄົມ ຂອງແຂວງໄຊສົມບູນ ໃຫ້ມີບາດກ້າວຂະຫຍາຍຕົວດີຂຶ້ນເລື້ອຍໆ ແລະ ພ້ອມກັນຈັດຕັ້ງປະຕິບັດຂົງເຂດວຽກງານແຮງງານ ແລະ ສະຫວັດດີການສັງຄົມ ແຂວງໄຊສົມບູນ ໃຫ້ມີຖ່ວງທ່າພົ້ນເດັ່ນ ແລະ ມີປະສິດທິຜົນດີຂຶ້ນກວ່າເກົ່າ ໃນຕໍ່ໜ້າ.

ພາບ-ຂ່າວ: ຈິນລະວອນ ວໍລະສົມບູນ

LEAVE A REPLY

Please enter your comment!
Please enter your name here